سویر دا بھُلا جے دوپہریں پرت آوے تے اوہنوں کیہ کہندے نیں؟
وچار ڈیسک
November 19th, 2008
امریکی ریاست کنٹکی دی اک جیل دے جیلر نوں اوس ویلے اونی حیرانی نہیں ہوئی سی جدوں اوہنوں ایہہ پتہ لگا کہ چاڈ ٹوائے ناں دا قیدی نس گیا ہے جنی اوس ویلے ہوئی جدوں اوہنوں پتہ لگا کہ نسن والا قیدی جیل وچ پرتن لئی ترلے پا رہیا ہے۔
چاڈ دا آکھنا ہے "جدوں میں جیل دی گھنٹی وجائی تے اوہناں نوں دسیا کہ میں کون آں تے اوہناں نوں یقین ای نہیں آ رہیا سی۔ اوہناں نال انج پہلوں ہویا کہ کدوں سی۔" 21 ورھیاں دا چاڈ کینٹکی جیل وچ چوری دے الزام وچ چار ورھے دی جیل بھگت رہیا ہے۔
جیل پربندھیاں دا آکھنا ہے کہ سویرے جدوں جیل دا عملہ صفائی کر رہیا سی تے چاڈ ا داء لگ گیا تے اوہ نس گیا۔ اوسے دوپہر اوہ فیر گارے نال لبڑیا ہویا پرت آیا تے دسیا کہ اوہدی بھین نے اوہنوں آکھیا کہ اوہ جیل وچ پرت جاوے نہیں تے اوہدی جان نوں خطرہ ہووے گا۔
جیلر بل ایڈمز دا آکھنا ہے کہ اوہنوں چاڈ دا ایہہ بیان جھوٹھا جاپدا ہے اوہ سارا دن ٹینیسی دریا دے نیڑے کدھرے کھجل ہوندا آیا ہے۔ جیلر نے دسیا کہ اوہدی 14 ورھیاں دی نوکری وچ ایہہ پہلی واری ہویا ہے کہ جیل توں نسا کوئی قیدی اپنے آپ ای پرت آیا ہے۔
چاڈ نے اک مقامی اخبار نوں دسیا کہ "میں بوہا کھلا ویکھا تے دُڑک لا دتی۔ پر میں جو کیتا مینوں اوہدے تے نموشی ہے تے میں اگے توں کدے انج نہیں کراں گا۔"
