نوٹ۔ ایہہ اَج دا لیکھ اوہناں مرداں لئی ہے جیہناں سکول وچ ہاسے مخول دی کلاس پاس کیتی ہوئی اے۔تے اوہ زنانیاں وی ایس لیکھ نوں پڑھ سکدیاں ہین جیہڑیاں ہاسے مخول نوں سمجھن، تے معافی دین دا ول سکھ کے مہربان بن گئیاں ہوئیاں ہین۔ تے کسے وچلے وچکارلے نوں ایس لیکھ دے پڑھن دی کوئی لوڑ نہیں۔ میں اکھر گواؤنے نہیں۔ اکھراں دی عزت سدا قیم رہنی چاہی دی اے۔
لوجی گل میری نہیں جے ۔ ایہہ ڈیوڈ بسونیٹ ناں دے ہک گیانی کیتی اے۔ کہندا اے جو جے کوئی بندہ کسے دوجے دی زنانی اُدھال لے تاں اُدھالن والے دی ایس توں وڈی سزا کوئی نہیں جو اوہ زنانی اوس دے پلے پکی بنھ دتی جائے۔ مینوں چنگڑ محلے دی ہک بزاری بیٹھک یاد آ گئی اے۔ زنانیاں مرد گلی وچ منجیاں ڈاہ کے، موڑھے وچھا کے بیٹھے ہوئے سن۔ ہک دو بُڈھیاں دے لاڑے دی اپنیاں دونہاں بیویاں نال تو تو میں میں ہوگئی تے اوس گلی وچ بیٹھیاں دوہاں نوں طلاق سنا دتی۔ کول بیٹھی ہوئی ہک گوانڈھن اپنی زبان تے قابو نہ رکھ سکی تے اوس آکھیا، ایہہ کیہ کیتا ای۔ دونہواں نوں ای طلاق دے چھڈی او۔ اوس اگوں جواب دتا، توں اپنا مونہہ بند رکھ نہیں تاں تینوں وی طلاق دے چھڈساں۔ اوس گوانڈھن دے کول اوس دا خصم وی بیٹھا سی۔ اوس آکھیا، دے چھڈ، دے چھڈ، میری وی خلاصی ہووے۔
ساشا گتری دا آکھنا اے جو میاں بیوی ویاہ مگروں ہک سِکے دے دو پاسے بن جاندے نیں۔ اوہ دونویں ہک دوجے نال جُڑے تاں ریہندے نیں پر ہک دوجے ول مونہہ نہیں کر سکدے۔ تہاڈا تجربہ کیہ کیہندا اے؟
تے بابے سقراط ہوراں جیہڑی مت دتی اوہ وی چیتے رکھنی چاہی دی اے۔ اوہناں فرمایا جو ویاہ تاں کرنا ہی پیندا اے، تُسیں وی کرو۔ جے گھر والی چنگی لبھ گئی تاں تہاڈی حیاتی سنور گئی، جے ماڑی لبھی تاں تُسیں فلاسفر بن جاسو۔ تہاڈے وچوں کنے فلاسفر نیں؟ گن کے دسو۔
زنانیاں بندے نوں وڈے وڈے کم کرن دی اُشکل دیندیاں نیں پر وڈے کم کرن لگو تاں تہانوں ڈک دیندیاں نیں۔ ایس لئی ہمیشہ ایس چلتر توں ہُشیار رہو۔ایسے لئی ڈومس آکھیا جو ہک سوال اجیہا اے جیہدا جواب میں لبھ ہی نہیں سکیا جو اصل وچ عورت چاہوندی کیہ اے۔ وچارا سگمنڈ فرائیڈ کہندا ہوندا سی جو میں اپنی گھر والی نوں ہک دو شبد کہنا تے اوہ جواب وچ کئی ورقے پڑھ چھڈدی اے۔
ہک بندہ پچھلے پنجتالی ورھیاں توں ویاہیا ہوئیا اے۔کسے اوس کولوں پچھیا جو تیری ایڈی لمی شادی خانہ آبادی دا بھیت کیہ اے؟ اوس آکھیا: اسیں ہفتے وچ ہک واری کسے ریسٹورنٹ وچ جانے ہاں، اوتھے ہک نکی جہی موم بتی بالنے ہاں، ڈنر کھانے ہاں، وجدیاں سازاں دی لے تے نچدے ہاں پر اوہ منگل دی منگل جاندی اے تے میں ہر جمعے نوں جاندا ہاں۔
ہک بندے کولوں کسے جوان مُنڈے پچھیا جو بنک وچ رقم چھیتی نال ہک کھاتے توں دوجے وچ گھلن دا سب توں تیز طریقہ کیہ اے؟ جواب ملیا جو ویاہ کر لئو۔سب کجھ تیزی نال ہون لگ پئے گا۔
جیمز ہولٹ میک گوارا دا کہنا اے جو میں دونہاں بیویاں دے معاملے وچ بد قسمت نکلیا ہاں۔ پہلی تاں مینوں چھد کے ٹُر گئی تے دوجے نہیں گئی۔
ایس لئی اپنے ویاہ نوں کامیاب بنا کے رکھن دے دو ہی نسخے نیں۔ پہلا ایہہ جو اپنی غلطی نوں فوراً من لئو۔ دوجا نسخہ ایہہ ہے جو جے تسیں حق تے ہو تاں چُپ رہوو۔
سالگرہ دا دن بیویاں لئی بڑا یادگار ہوندا اے۔ ایہنوں یاد رکھن دا ہکو طریقہ اے جو ہک واری بھل جاؤ تے ویکھو فیر بیوی تہانوں اجیہا چیتا کرائے گی، جہیڑا تہانوں حیاتی وچ کدیں نہ بھُلے گا۔
سیانے لوکی ویاہ توں پہلے ہر طرحاں دے چاء لاہ لیندے نیں۔اوہناں نوں پتہ ہوندا اے جو زندگی وچ ویاہ دے مگروں ازادی نہیں لبھنی۔
ہک ویہہ سال دا ویاہ دا تجربہ رکھن والے ناکام شوہر دا بیان ہے جو ویہہ سال تائیں میں تے میری بیوی بڑے خوش خوش رہے پر ویہاں سالاں مگروں ساڈی ہک دوجے نال ملاقات ہو گئی۔ کیہو جہی ملاقات؟ سمجھ تاں گئے ہوو گے۔
چنگی بیوی دی نشانی ایہہ ہے جو اوہ جے آپ غلطی تے ہووے تاں اپنے جنے نوں معاف کر دیندی اے۔
ہک جنے اخبار وچ اشتہار دتا: بیوی وانٹد۔ اگلے دیہاڑے ہزاراں خصماں دے سنیہے خط، تار تے فون آئے ، جیہناں دی عبارت ہکو سی جوتوں ایہہ میری بیوی لے لے۔
