خبر آئی ہے پئی لہور دے چڑیا گھر توں 30 چوہے چوری کر لئے گئے نیں۔ پہلوں تے خیال آیا پئی پکی گل ہے کسے بلی دا کم ہووے گا فیر چینیاں تے وی شک ہویا پئی کوئی چینی تے نہیں ایدھروں لنگھیا۔ چینی وچ چ نال تے چوہا وی چ نال چینیاں نوں چنگ چانگ کردیاں شیواں چنگیاں لگدیاں نیں چیچوکی ملیاں نوں پٹ کے ویکھیا جاوے تے ضرور چینیاں دیاں ہڈیاں وڈی گنتری وچ مل سکدیاں نیں۔
لہور دے چڑیا گھر توں چوہے چوری کرن دا الزام اوتھوں دے معطل کیتے ہوئے ڈپٹی ڈائریکٹر تے لایا جا رہیا ہے اوہ جاندے جاندے کاوڑ وچ چوہے چک کے لے گئے شکر کرو کاوڑ گھٹ چڑھی ہوئی سی نہیں تاں ہاتھی چک کے لے جاندے۔ پر ایہہ سمجھ وچ نہیں آیا پئی اوہ گن کے 30 چوہے ہی کیوں لے کے گئے نیں کیہ '' چوہا کیلنڈر'' بناون دا پروگرام ہے پہلے دن اک چوہا نکلے گا تے پہلی تاریخ دا اعلان کرے گا تے دوجے دن دوجا تے روز اک اک کر کے باہر آوندے جاون گے تے 30 تاریخ نوں پورے 30 باہر آکے اپنی بتیسی وکھا رہے ہوون گے پہلے چند ویکھ کے مہینہ بدلدا ہے ہن چوہا ویکھ کے بدلیا کرے گا۔ عید تے کئی واری چند نظر نہیں آؤندا ہن چوہا نظر نہ آیا تے معطل کیتے ہوئے ڈپٹی ڈائریکٹر نوں فون کالز مفتی منیب الرحمن توں بہتیاں آؤن گیاں۔ مفتی منیب الرحمن بہت وڈے عالم نیں پر اینا ہولی ہولی بولدے نیں پئی سرحد والے چند دا اعلان پہلوں کردیندے نیں سرحد والیاں دا کہنا ہے پئی جے مفتی ہوراں دے اعلان تے رہندے تے ہمیش بُسی عید ہی کر سکیئے۔ سعودیہ والے وی عید اک دن پہلوں کردے نیں تے اوہناں دا تے بن دا ہے کیوں جو اوتھے اسلام وی اک دن پہلوں آیا سی تے ہو سکدا ہے اوتھے قیامت وی اک دن پہلوں آوے۔
چڑیا گھر توں چوری کیتے گئے چوہیاں نوں جے مفتی ہوراں دے حوالے کر دتا جاوے تے اوہ پہلا چوہا چھڈن وچ وی چار دن لا دین گے۔ ڈپٹی ڈائریکٹر نے 30 چوہے ہو سکدا ہے اکٹھے ایس لئی چکے ہوون پئی 870 چوہے پہلوں ہی اوہناں دے کول ہوون یاں اوہناں تیہاں توں خاندانی منصوبہ بندی دیاں ساریاں حداں مکا کے گنتری پوری کرن تے فیر حج تے کسے بلی نوں گھلن دا پروگرام ہووے۔
بلی توں آئیڈیا آیا پئی چڑیا گھر والیاں نوں ایس چوہے چور دے گھر گن کے 30 بلیاں چھڈ دینیاں چاہی دیاں تے بلیاں اُتے کتے تے کتیاں اُتے چینی چھڈدینے چاہیدے نیں کیوں جو ہو سکدا ہے امریکہ دے کن تے کوئی بلی کسے چوہے تے کوئی کتا کسے بلی نوں چھڈ دیوے پر چینی کسے نوں نہیں چھڈے گا۔ انج پاک چینی دوستی پکی ہووے گی پئی اسیں انج دے نازک کم لئی چینیاں نوں چنیا ہے۔ اودھر ڈپٹی ڈائریکٹر دی یاراں بیلیاں وچ بڑی بدنامی ہوئی پئی ککڑی چور تے ہوندے سی ہن چوہا چور وی آگئے نیں اوہناں دا کہنا ہے پئی الزام لاؤندے ویلے گھٹو گھٹ اوہناں دے مرتبے دا ہی خیال کر لیا جاندا چوہے چوری کرن دا الزام تے کسے چپڑاسی تے وی لایا جا سکدا سی ، چیتے شیر دی چوری دا الزام لگدا تے بڑا آکڑ کے سر چک کے ٹردے نیں ہاں اسیں آں چیتا چور اسیں آں شیر نوں چوری کرن والے۔
اُنج معطل ڈپٹی ڈائریکٹر دی تیویں چوہیاں دے آؤن تے بڑی خوش ہووے گی پہلوں تے گھر وچ اک ہی چوہا سی ہن تن سو اک ہو گئے نیں کیوں جے تیویں دے اگے تے وڈے وڈے شیر وی ڈھیہ جاندے نیں تے چوہا بن کے ساری حیاتی لنگھا دیندے نیں کسے شیر دے ویاہ وچ اک چوہا وی بڑے ٹھمکے لا رہیا سی نیڑے کھلوتے اک شیر نے پچھیا شیر دے ویاہ وچ توں کیوں نچ رہیاں چوہے نے سینے تے ہتھ مار کے کہیا میرے بھرا دا ویاہ ہے میں کیوں نہ نچاں اوہنے کہیا اوہ شیر توں چوہا بھرا کیویں ہو سکدے او چوہے نے رون والا مونہہ بنا کے کہیا 'ویاہ توں پہلوں میں وی شیر سی۔'
بلی شیر دی ماسی تے مشہور ہے پر لگدا ہے چوہا شیر دا ماما یاں پھپھڑ تایا ضرور ہے ایس لئی تے اوہدے وچ اینی آکڑ ہے چوری دے چوہے روزانہ بیگم صاحبہ نوں چھیڑ دے ہون گے تے گیت سناؤندے ہوون گے ''چرا لیا تم نے جو ہم کو کہیں بدل نہ دینا کھسم، تو چور میں تیری چوری بیگم جانیاں، کوئی ہم سے ہم ہی کو چرا لے شوہر کو چور بنا لے ''
جدوں توں چوہے چڑیا گھر توں گئے نیں کسے دا کسے نوں ڈر ہی نہیں رہیا چیتا سرعام پیندا پھر رہیا ہے۔ شیر وڈے گھیر والی شلوار گِٹیاں توں اُتے چک کے ایدھر اودھر بھراواں دا بندہ بندا پھر رہیا ہے ہاتھی چھاتی کڈھ کے سنڈھ لہرا کے مستا رہیا ہے گینڈا آپنے آپ نوں صدر یوگینڈا سمجھن لگیا ہے باندر قلندر مست دی دھن تے دھمالاں پا رہیا ہے نیل دی گاں آپنے آپ نوں نیلی تے ہر ڈھگا اپنے آپ نوں جاوید شیخ سمجھن لگ پئے نیں زیبرا رنگ برنگیاں پٹیاں والے سوئیٹر بدل بدل کے پا رہیا ہے رچھ سڑک دے وچ لمے پیا دھپ سیک رہیا ہے بھالو سارے علاقے دا خالو بنی بیٹھا ہے۔ جانور تے جانور چڑیا گھر وچ ڈیٹ مارن والے جوڑے وی کھلا پھر رہے نیں۔
چوہے کیہ گئے ہر کوئی شیر ہویا پھردا ہے کسے نوں کسے دا ڈر ہی نہیں رہیا۔ چڑیا گھر دے ایس ٹٹے پھٹے نظام تے چڑی مونہہ لکائے پھر رہی ہے کیوں جو ناں تے اوہدا ہی بدنام ہو رہیا ہے شیر گھر ہوندا تے چیتا گھر ہوندا تے چڑی دے ماڑے موڈھیاں تے اینا بھار نہ ہوندا۔
