پنجاں وچوں اک امریکی نوں حدوں بہتا سون دی عادت ہے: رپورٹ

ہر ویلے تے ہر تھاں نیندر آؤن دی بماری اکلے پاکستانیاں نوں ہی نہیں سگوں دنیا دے سب توں ترقی یافتہ ملک امریکا دے وسنیک ایس معاملے وچ ساریاں کولوں جت گئے نیں۔ اک کھوج وچ دسیا گیا ہے پئی ہر پنجاں چوں اک امریکی حدوں بہتا سون دا عادی ہوندا ہے۔ ایس رپورٹ موجب امریکیاں دی 20 فیصد گنتی حدوں بہتا سون دی لت وچ پئی ہے جدوں کہ یورپی وسنیکاں وچ ایہہ دُر پندراں فیصد دسی جاندی ہے۔

عام طور تے اُچے تے مندے لہجے وچ گل بات کرن دے حساب نال امریکیاں تے یورپی وسنیکاں نوں اک ہی پیمانے وچ تولیا جاندا ہے پر اجوکی کھوج وچ امریکیاں تے یورپی وسنیکاں وچ اک وڈا فرق دسیا گیا ہے۔ اک کاہڈ وچ ٹیکساس، نیو یارک، کیلی فورنیا تے اوہائیو نال سانگا رکھن والے 8 ہزار جواناں کولوں انٹرویو لیا گیا جیہناں کولوں اوہناں دے سون دی عادت جاگن، صحت تے ذہنی خلفشار بارے سوال پچھے گئے۔

کھوج دے تت وچ پتہ لگیا پئی 19.5 فیصد امریکی نیندر دے معاملے وچ درمیانے جئے نکلے جدوں کہ ستاراں فیصد دا کہنا سی پئی اوہناں نوں نوکری کردیاں ، میٹنگ یاں گل بات وچ اکھاں کھلیاں رکھنا بہت اوکھا لگدا ہے۔ انج دی اک کاہڈ برطانیہ، جرمنی، اٹلی ، پرتگال، تے اسپین دے وسنیکاں تے وی کیتی گئی۔ کھوج وچ ایہہ گل وی ساہمنے آئی پئی حدوں بہتا سون دی عادت پاروں لوکی چھیتی موٹاپے دا شکار ہوجاندے نیں۔