وٹ لنگوٹا سُوہا جیہا، بھائیا ننگ مُننگا بوہ پریڑے ہو کے میتھوں ایویں نہ لے پنگا ۔۔۔ بَھج لے بَھج لے جتنا بھجنئی، اوڑک تھک کے ڈگسیں جے میرے ہتھ آ جاسیں میں تینوں گھتساں ڈھنگا ۔۔۔ پڑھ پڑھ نفل نمازاں اپنی بُتّی سری نہ تیتھوں مُلا دے واڑے وچ وڑ کے بوٹی گھوٹ ملنگا ۔۔۔ نالے حج پڑھے وچ مکے نال سیل سپاٹا جیہڑا رب نوں ہتھ لا آوے اوہ ساڈے توں چنگا ۔۔۔۔ زمزم تاں توں پی آیا ایں، چبل پُنا نونہہ چھڈیا ہری دوار وی جا کے ویکھیں جتھے وگدی گنگا ۔۔۔ سڑ جانی اے جھوک اساڈی، مر جانا ایس مِٹی موت سنیہا لے اوسی تیمور جیہا کوئی لَنگا ۔۔۔ مندا بول نہ بولے اُکا، جی آیاں نوں آکھے سوداؔ اے مسکین نمانا، آکھن لوک تلنگا ۔۔۔۔
