اک وڈا پلازما ٹی وی، ڈی وی ڈی پلیئر، اک لکھ بہتر (172,000) ڈالر جیب وچ، ورزش کرن لئی ون سونّا نک سُک، دو فرِجّاں تے کجھ بندوقاں، گنیلسن لینو ڈی سلوا کول زندگی دی ہر سوکھت ہے جیہڑا ایس ویلے برازیل دی اک جیل وچ قید ہے۔
پر ایہہ ساری عیاشی سوموار دے دیہاڑے مُک گئی جدوں وڈے سارے ڈبل بیڈ والے اوہدے سیل تے پولیس نے چھاپہ ماریا۔ پولیس دا ایہہ چھاپہ منشیات دے وپاریاں دے خلاف سیلواڈور شہر دی پولیس دی اک مہم دا حصہ سی۔
پولیس نے دسیا کہ ساری جیل وچ اوہ اکلا ای انج دیاں موجاں مان رہیا سی۔ دوجیاں حوالاتاں دا ایہہ حال ہے کہ اک اک وچ کئی کئی قیدی تاڑے ہوئے نیں تے ایہہ جوان اکلا ای ایتھے عیاشی کر رہیا سی۔
پولیس دا آکھنا ہے کہ ڈی سلوا برازیل دی باہیا ریاست وچ منشیات دا سبھ توں وڈا وپاری ہے۔ پھڑے جاون تے اوہدا آکھنا ہے کہ اوہدے کول ایہہ سارا مال کجھ پرانیاں ڈکیتیاں تے کجھ جیل وچ جواء کھیڈ کے جوڑیا ہویا ہے۔
ریاست دے اک افسر پالو گومز دا آکھنا ہے کہ ہن اسیں ایہہ ویکھیا گے کہ اوہ ایہہ عیاشی جیل پربندھیاں نال رل کے تے نہیں سی کر رہیا؟ اوہدا آکھنا سی کہ ایہدے وچ حیرانی والی کوئی گل نہیں ہووے گی جے ایہہ پتہ لگے کہ ریاست وچ اغوا، قتل، ڈکیتیاں تے منشیات دے دھندے دیاں ڈوراں جیل وچ بیٹھ کے ہلایاں جا رہیاں نیں۔ حیرانی والی گل تے ایہہ ہے کہ حوالات وچوں اک لکھ بہتر ہزار ڈالر پھڑیا گیا ہے ایہہ کتھوں آیا؟
