شیدے نوں اُنج اِیہ موج ہے جو اوس کول رنگ رنگ دا بندہ آوندا ہے تے رنگ رنگ دیاں خبراں دیندا ہے۔ اج دسن لگا کہ اک گاہک شنگھائی چین توں ہو کے آیا سی۔ اوہ کہن لگا کہ جنہاں امریکیاں نوں امریکہ وچ روزگار نہیں لبھدا اوہ چین نوں نس رہے ہین تے سینکڑیاں امریکی نوجوان صرف شنگھائی وچ ہی نوکری کردے دِسدے نیں۔
میں کہیا شیدیا اوہ نالائق امریکی ہوون گے نہیں تے ساری دنیا تے امریکہ نسدی ہے تے امریکی نس کے چین جان گے بھلا؟ لوکیں پھوڑ مارن لگے وی کجھ سوچدے نہیں۔
شیدا ہسن لگ پیا کہندا ایہہ تے توں ٹھیک کہنا پر اوہ بندہ کہندا سی جو اوس جِنے وی امریکی شنگھائی وچ ویکھے اوہ بڑے پڑھے لکھے سن تے وڈیاں وڈیاں جاباں
کر رہے سن۔ اوس بندے نے کُجھ کولوں پُچھیا وی بئی تُسیں ایتھے کیوں آئے او، تے اوہ کہن لگے کہ ہن امریکہ وچ ہر شے تے چین توں بن کے جاندی ہے تے جاباں وی چین وچ ہی ہوون گیاں نا!
میں ایہہ سُن کے حیران ہی ہو گیا، پر میرے دل نوں گل لگ گئی جو جے امریکہ تے دنیاں دیاں باقی تھاواں تے چین دیاں بنیاں شیواں ہی وِک رہیاں ہین تے پھیر نوکریاں وی تے چین وچ ہی ہوون گیاں نا۔
میں ایسے چھچھوپنج وچ گھر آکے انٹرنیٹ تے پھولا پھالی کیتی، شیدے دا بندہ سچا سی۔ میں اک تریئیاں سالاں دے امریکی مُنڈے دا انٹرویو پڑھیا جیہڑا نیویارک توں آکے شنگھائی وچ لکھاری دی نوکری کر رہیا سی۔
اوس مُنڈے نے کہیا مینوں نیویارک وچ لکھاری دی نوکری لبھ ہی نہیں سی سکدی۔ اوتھے تے میں اپنی ماں دی منت کرکے کار دی رائیڈ لیندا ساں۔ ایتھے شنگھائی وچ مینوں چنگی بھلی نوکری لبھی ہوئی آ۔ اک کم مُکدا تے دوجا مِل جاندا۔
اگلے دن میں شیدے نوں دسیا جو تیرا بندہ ٹھیک ہی کہندا سی جو امریکیاں دا امریکہ چین ہے۔ پھیر میں پُچھیا شیدیا ، ساڈے پاکستان دا کیہہ بنے گا، ساڈی امریکہ بنن دی واری نہیں آوے گی؟
شیدا زور نال ہسیا تے کہن لگا ساڈا حال تے مراثی دے مُنڈے والا ہے جیس نے نمبردار دے مرن تے ماں کولوں پچھیا سی اماں ہُن کون نمبردار بنے گا تے ماں کہیا اوس دا پُتر۔ پھیر مُنڈا کہن لگا جے اوہ وی مرگیا تے پھیر؟ ماں نے کہیا اوس دا پُتر۔ مُنڈے نے وی ماں دی جان نہ چھڈی تے پھیر پُچھیا جے اوہ وی مرگیا تے پھیر ماں؟
ماں نے ست کے کہیا "ویکھ پُتر جے سارا پِنڈ وی مرجاوے پھیر وی تینوں کسے نے نمبردار نہیں بناونا"
تے بونگیا ساری دُنیا ڈُب وی جاوے پاکستان نے امریکہ کوئی نہیں او بننا۔
