غُصہ تے پتہ نہیں مینوں ساری دنیا تے ہی چڑھیا ہویا سی پر نکلنا تے اخیر شیدے تے ہی سی۔ میں اج اوس تے چڑھ گیا ''توں ہی رولا پایا سی جرنیل کھا گیا، پی پی آجاوے گی تے کم سدھا ہو جاوے گا۔ کیہہ سدھا ہوئیا؟ بجلی، روٹی ہر شے یاں غائب تے یاں غریب دی پہنچ توں باہر، اوئے ایہہ تے معمولی جج بحال نہ کر سکے اہناں کیہہ کرنا''
شیدے نوں پتہ ہے جد میرا پارہ چڑھیا ہووے پھیر میں سندا نہیں۔ کہن لگا توں بہہ ایتھے تے میں تیرے لئی کوکے دی بوتل لیاونا۔ میں کہیا گولی مار اہناں کوکیاں نوں، جدوں دے ایہہ کوکے ودھے نیں اسیں تھلے توں تھلے ٹرے جانے آں''
شیدا نہ منیا جا کے کوکے دی بوتل پھڑ لیایا تے کہندا توں منہ نال لا تے بولیں نہ۔ ہن میں تینوں نکیاں ہوندیاں دی اک گل سناونا۔ اسیں پنڈ وچ پنج چھ بیلی ہوندے ساں۔ ساڈے وچوں ساقا تھوڑا جھلا سی۔ اسیں کدی کسے دے بیر توڑنے تے کدی گنے بھننے، تے ہور لکھوکھا شرارتاں کرنیاں۔ پر اسیں سارے چالاکی نال پُھٹ جاندے ساں، پھڑیا جاندا سی ساقا۔ وچارے نے بڑا چھتر کھاہدا ساڈی وجہ توں''
میں کہیا یار ایس دا جوڑ کیہہ ہے میری گل نال؟ ایویں ہر گل اپنے پنڈ ول لے جانا۔
کہندا بونگیا، اک تے تینوں سمجھ وی چھیتی نہیں آوندی، ویکھ جرنیل، افسر لوک، کاروباری بندیاں دے ساقے لوک تے اوہناں دے سیاست دان نیں۔ اوہ جد اپنی چوری چُکاری، لُٹ مار چنگی طرحاں کر لیندے نیں تے وچوں کھسک جاندے نیں، ساہمنے آجاندا ساقا۔ ساقا تے ہے ہی جھلا ، اوس چھتر ہی کھانے نیں۔۔اج دے ساقے پیپلز پارٹی والے نیں۔۔۔ اوہ سمجھدے نیں اوہ عیش کر رہے نیں پر اصل گل ہے اوہ چھتر کھا رہے نیں۔
میرا غصہ نہیں لتھیا نیں کہیا اوئے شیدیا توں پھیر سارا الزام پہلیاں تے لا کے اج والیاں نوں بری کر دینا ایں۔ اج مینوں سمجھا پہلیاں کیویں لُٹیا؟ اج میرے ساہمنے ثابت کر!
کہن لگا ایہہ کیہڑا اوکھا کم ہے۔ اچھا ایہہ دس ایس محلے وچ پندرہ سال پہلے کنیاں کاراں سن تے ہُن کنیاں؟''
میں کہیا یار ایس نال کیہہ ثابت ہو جاوے گا؟
کہن لگا کہیا نا توں بونگا ایں۔ ویکھ ایس محلے وچ صرف شیخاں کول کار ہوندی سی، اوس دے کھڑے ہون دا، آون جاون دا کوئی مسئلہ نہیں سی۔ ہُن محلے وچ چالیہہ کاراں نیں، نہ اوہناں دے کھڑے کرن دی تھاں تے نہ لنگھن دی تھاں، محلے وچوں لنگھدیاں لنگھدیاں کدے پندراں ویہہ منٹ لگ جاندے نیں۔توں دس حکومت نے ایہہ سو چیا جو اینیاں کاراں لوکاں کول جان گیاں تے اوہنا ںلئی سڑکاں کتھوں آون گیاں، پٹرول کتھوں آوے گا، اوہ انھے واہ کاراں دی وکری ودھوائی گئے۔
میں کہیا چلو ایس نال ایہہ تے ثابت ہوگیا جو حکومت نے اکھاں بند کیتیاں ہوئیاں سن پر ایہہ لُٹ کھسٹ کیویں ہوئی؟
اوہ جھلیا، ایہہ کاراں بنکاں کولوں قرضے لے کے لئیاں گئیاں؟ ہن محلے دا ہر بندہ بینک دا قرضائی ہے تے اپنی آمدن دا چوکھا حصہ بینک نوں ہر مہینے دیندا ہے۔ بینکاں مال بنایا، پھیر کاراں ویچن والیاں، کاراں بناون والیاں نے بنایا تے حکومت نے کاراں تے ٹیکس لے کے بنایا۔ ایسے طرحاں توں ویکھ محلے دے گھراں وچ کنیاں گھراں وچ فرجاں تے بجلی تے چلن والیاں مشیناں ہوندیاں سن، ہُن ہر گھر وچ نیں ، سب بینک کولوں قرضے لے کے لیاں لوکاں نیں، ایس وچ بینکاں مال بنایا، دوکانداراں بنیایا، شیواں بناون والیاں بنایا تے جھلے کوک اوہ اوہ شیواں لے کے پھسے ہوئے نیں جیہڑیاں نہ اوہ خریدن جوگے سن تے نہ ہی اوہناں دے خرچے جھلن جوگے۔ ہُن توں دس اہناں لئی اینی بجلی کتھوں آوے؟
میں کہیا یار تیری گل وچ گل تے ہے پر پھیر وی؟
شیدا کہندا بونگیا، تینوں دسیا نا ایہہ سب امیر لوک رل کے مال بناوندے رہے تے کسے نے ایہہ نہ سوچیا ، اینیاں کاراں فرجاں تے الم گلم لئی سڑکاں، پٹرول تے بجلی کتھوں آونی ہے؟ سوچنا کنہے سی؟ اہناں لوٹواں دی تے حکومت سی، اوہناں نوں مال بناون نال غرض سی، تے ایہہ وی پتہ سی جو اخیر ملبہ کسے ساقے تے پاکے کجھ سال پردے دے پچھے ہو جاواں گے! لوکیں وی ساقے نیں۔۔اوہناں کر کیہہ لینا اوہناں دا؟
