کئیاں دناں توں سوچ رہیاں تہاڈے نال گلاں کراں تے تہانوں مزیدار خبراں سناواں۔ پر دل ہی نہیں کردا خبراں پڑھن نوں۔ ایتھے لوکاں نوں روٹی دی پئی ہوئی اے تے جنس دا کوئی کیہہ کرے؟ پر مینوں ڈر ہے بھکھیاں نے ہُن باقی دا زور وی نیانے جمن تے لا دینا ہے تے ہور بھکھے ہو جانا ہے۔ رب جاندا بھکھے ایہہ سب کجھ کیویں کر لیندے نیں؟
ایس توں یاد آیا جو کسے کاہڈے نے خفیہ کیمرے لا کے پتہ لا لیا ہے جو چین دا پانڈہ کیس طرحاں جنسی فعل کردا ہے۔پتہ نہیں کاہڈیاں نوں پانڈے دے خفیہ جنسی راز لبھ کے کیہہ ملے گا؟ ہاں ایس توں ایہہ پتہ ضرور لگدا ہے جو بندیاں نوں اک دوجے دے جنسی راز معلوم کرن دا بڑا ٹھرک ہے۔
میں سنیا عورتاں تے کھل کھلا کے اِک اک تفصیل اکدوجی نوں دسدیاں نیں۔ ایسے لئی اوہ لطیفہ بنیا ہویا نا ۔کہ اک عورت نے دوجی کولوں پچھیا بئی بندے آپو وچ کیہہ گلاں کردے نیں ؟ دوجی نے کہیا جیہڑیاں اسیں کرنیاں واں۔ تے پہلی کہن لگی ''ہائے میریا ربّا، کنے گندے نیں''
خیر میں گل کر رہیا ساں جو میرا لکھن نوں دل کیوں نہیں کردا؟ سچی گل ہے میں جد وی روز اخبار وچ خودکُشیاں بارے پڑھنا تے ایہہ ویکھنا جو اوہناں وچوں ستر توں ودھ فیصد زنانیاں ہوندیاں نیں تے زنانیاں وی یا جوان تے یا جوان ماواں، تے میرا دِل بہہ جاندا ہے، میرے سامنے مریاں جوان کُڑیاں تے زنانیاں دیاں لاشاں لٹکن لگ پیندیاں نیں، میں جنس بارے کیہہ لکھاں تے کیویں لکھاں؟
مینوں تے ایہہ لگدا اوہناں دیاں اوہ بھیناں جنہاں اجے خود کشی نہیں کیتی اوہ وی لاشاں ہی نیں جنہاں نال ادھ مرے مرد انج ہی جنس کردے نیں جیویں چرسی جھٹ دے سواد لئی بھریا اک سگریٹ پی لیندے نیں۔ لاشاں دی آپو وچ جنس کیہہ تے اوسدا لکھنا کیہہ۔
سوچیا صرف کھاندے پیندے لوکاں تے ہی لکھیا کراں جنہاں کوئی فکر فاقہ نہیں تے گھراں وچ لگے جنریٹر بیڈ روم وی ٹھنڈے رکھدے نیں۔ پھیر لگدا ایہہ وی مرداراں دی جنس ہے۔ آل دوالے کھلریاں لاشاں وچکار گرجاں تے الاں ہی عیش کردیاں نیں۔ جیوندا بندہ تے لاشاں دی بو نال ہی مر جاندا ہے۔ دسو اہناں گرجاں بارے لکھاں جیہڑیاں لاشاں دی بو وچ پہلاں بلیو فلماں ویکھدیاں تے پھیر جنس کرن دا ڈرماہ کردیاں نیں!
