وچار وچ ایہہ خبر پڑھ کے جو کیلیفورینا وچ ہائی کورٹ دی اجازت مگروں ہم جنس جوڑیاں دیاں وہیاواں دا ہڑ آگیا۔ مینوں یقین ہے جو ایس دا تعلق جنس نالوں ودھ جائیداد تے دوجیاں دنیا داری دیاں لوڑاں نال ہے۔ وچار دی تصویر وچ جنہاں دو عورتاں نوں ویاہ کردیاں وکھایا گیا ہے جوہ دوہیں نوے سال توں اوپر دی عمر دیاں ہین تے اوس عمر وچ جنس ونس دا کنا اک رول ہو سکدا ہے؟ ایس گل دا اشاراہ مینوں اوس فلم توں لگا جیہڑی مینوں امریکہ توں آئے اک سجن نے وکھائی سی، اوہنوں ایہہ فلم کیوں پسند سی تے اوس پاکستان لیا کے مینوں خاص طور تے کیوں وکھائی ایس بارے وچ میں کافی چر بھنبل بھوسے وچ پیا رہیا۔
خیر فلم دو ہم جنس بُڈیاں مائیاں بارے سی جنہاں نے ساری عمر اک جوڑے وانگ گذاری۔ اوہناں وچ اک درخت توں ڈگ کے مر گئی تے دوجی دی بربادی ہو گئی۔ جذباتی بربادی نہیں معاشی وی کیوں جو مکان مرن والی دے ناں ہی سی حالاں اوہدے پیسے دوہاں مل کے تارے سن۔ مرن والے دے بھتیجے نے آکے مکان تے ہی نہیں ہر نکی وڈھی شے تے وی قبضہ کر لیا ، اوہناں نکیاں نکیاں یادگاری شیواں تے وی جیہڑیاں دوہاں دے پیار دی نشانیاں سن۔
مینوں پکا یقین ہے جو وچار والی خبر دیاں دو نوے توں ٹپیاں مائیاں دے ویاہ پچھے وی ایہو گل ہووے گی جو جے اک مر جاوے تے اوسدا ورثہ دوجی نوں ہی ملے کسے ہور نوں نہ ملے۔ میں ایہہ وی سنیا ہے جو امریکہ وچ بعضیاں سہولتاں صرف ویاہے جوڑیاں نوں ملدیاں ہین۔ مثال دے طور تے جے مرد نوں اپنے کم ولوں ہیلتھ انشورنس ملی ہوئی ہے تے اوہ گھر بیٹھی بیوی نوں وی ملے گی تے بچیاں نوں وی۔ جے بیوی کماؤ ہووے تے مرد نوں اوہو سہولتاں ملدیاں ہین۔ پر جے ہم جنس جوڑا بن کے ساری عمر وی اکٹھے رہن تے اوہناں نوں ایہہ سہولتاں نہیں مل سکدیا۔ پر ہن جے اوہ قانونی طور تے شادی شدہ ہوون گے تے سب سہولتاں اوہناں نوں میاں بیوی وانگ ہی ملن گیاں۔
کجھ سیانیاں ایہہ گل کاہڈ راہیں ثابت وی کیتی ہوئی ہے جو دنیا وچ ویاہ ، ٹبر تے ذاتی جائیداد دے ادارے اک دوجے دی وجہ توں وجود وچ آئے۔ جد کجھ بندیاں دی زمین تے ہور شیواں تے مالکی ہو گئی تے اوہناں عورتاں وی مالکی وچ بنھ لئیاں کیوں جو اوہ چاہندے سن جو اوہناں دی وراثت اوہناں دے نطفے وچوں پیدا ہوون والے نیانے نوں ملے کسے غیر نوں نہ ملے۔ ہولی ہولی مالکی دا نظام خدائی لگن لگ پیا تے سماج وچ ایہہ نظام ہی ربی ہے۔ حالاں پرانیاں ویلیاں وچ جدوں بندہ فطرت دے بہتا نیڑے سی اوسدوں مالکی دا نظام نہیں سی۔
ہن تسیں پُٹھا موڑ ویکھو جو ہم جنسی چنگی آ کہ بھیڑی پر ایہہ سماج دی ریت دے مُڈھ دے خلاف۔ اک طرحاں نال چالو سماج دا رد ہے۔ کیوں جو ہم جنسی وچ بچے دی تخلیق نہیں ہو سکدی تے ایس لئی وراثت دار وی کوئی نہیں جم سکدا۔ پر تسیں ویکھو جو جائیداد تے وراثت دا ادارہ ایڈا تگڑا ہو چکیا ہے جو ہم جنساں نوں جائیداد تے سہولتاں لئی ویاہ دی سند دی لوڑ ہے۔ ایس لئی اخیر جت ذاتی جائیداد دے ادارے دی ہوئی ہے۔
بس جی علم دیاں گلاں منشی علم دین جاندا باقی تے جگ ایویں گھٹا پیا چھاندا
