اک تے میں شیدے دیاں اپنے پنڈ دیاں کہانیاں کولوں عاجز آچکیاں۔ کہندا ایس کہانی وچ وی رمز ہے، لوو ہُن تسیں دسنا کیہہ رمز ہے جیہڑی مینوں سمجھ نہیں آئی۔
کہندا ، جد دی وڈی چوہدرانی مری ہے مہر عثمانے دی سیاست بڑی ٹھس ہو گئی ہے۔ اوہ ہیں الیکشن تے الیکشن ہاری جا رہیا ہے حالاں اوس نے بڑے چالاک تے چالو بندے اپنے آلے دوالے اکھٹے کیتے ہوئے نیں جیہڑے کجھ تے امریکہ تے ولائت توں آوندے نیں چوہدری نوں صلاح دین۔ پر چوہدری دی مری بکری نوں کوئی جیوا نہیں سکیا۔ ہن تے لگدا ہے چوہدری عثمانے دی کدی کوئی کھیڈ ہی نہیں سی ساری کھیڈ چوہدرانی دی سی، تے اوس نوں ایہہ ورثے وچ اپنے پیو مہر سیف کولوں ملی سی۔
اصل وچ علاقے دا وڈا تے مہر سیف ہی سی، تے اوسدی اکو اک دھی سی۔ اوس نے اوسدا ویاہ مہر عثمانے نال کردتا جیہڑا ایویں فقرا تے لٹور جیہا مُنڈا سی۔ پتہ نہیں مہر نوں اوس وچ کیہہ نظریں پیا جو اوس ودحے وڈھے رشتے موڑ کے اک لٹور نال اوسدا ویاہ کیتا۔ میرا خیال ہے مہر سیف بہت گنی تے بندہ پچھانو مشہور سی، اوس سوچیا ہونا ایہہ لٹور یا لنگور شوہر اوہو کرے گا جو میری دھی کروائے گی۔ تے ہویا وی ایہو۔ مہر سیف نے اکھاں بند کیتیاں تے اوس دی دھی، ودھی چوہدرانی نے عثمانے نوں الیکشناں وچ کھڑا کرکے جتوانا شروع کردتا۔
وڈی چوہدرانی بڑی گنی زنانی سن۔ ہر پنڈ دے وڈھے گھراں دی ہر کڑی منڈے دا ناں یاد رکھدی سی تے اوہناں دی خوشی غمی تے موجود رہندی سی، اوہ تے میرے ورگے پنڈ دے کمیاں دے وی ناں رکھدی سی تے جد کدی ٹاکرا ہو جاوے تے انج ملدی سی جو جیویں اوہ سب دی ماں ہووے، شہر دے حلقے وچ ہر دوجے گھر وچ اوس نے کسے کڑی منڈے نوں دھی پتر بنایا ہویا سی۔ اوس ایہہ سب کجھ اپنے پیو کولوں ورثے وچ لیا سی کیوں جو ایہہ سب کجھ مہر سیف دی وراثت سی، اوہ وی ایہو کجھ کردا ہوندا سی۔
ہن تسیں دسو جو جیہڑا بندہ لوکاں دے اینے نیڑے رہوے اوہ الیکشن کیویں ہار سکدا ہے؟ چوہدرانی نے اپنے پیو دی ریت ٹوری رکھی جیس وچ ایہہ وی سی جو کسے وی بندے دی بے عزتی نہیں کرنی بھاویں اوہ کنا وی کھرورا ہووے۔ چوہدرانی دے ایہو گن عثمانے نوں ہر الیکشن جتواندے سن۔ حالاں عثمانہ اپنی بیوی دے ہر بندے نال میل ملاپ تے کھجدا رہندا سی۔ اوہ کدی کدی کہندا وی ہوندا سی ایہہ میری زال جھلی ہے، ایویں کمی کمیناں تے نکیاں نکیاں بندیاں تے ویلا برباد کردی رہندی اے۔ پر چوہدرانی دا اپنا ویہار سی اوہ اوس ساری عمر نبھایا۔
چوہدرانی مری تے مہر عثمانے دے پر نکل پئے۔ اوس بہتا ویلا یاراں بیلیاں نوں لائسنس دوان تے ہور پٹھے سدھے کم شروع کر دتے۔لوکاں نال چوہدرانی والا سانگا توڑ لیا۔ جد الیکشن آیا تے اوس شہر توں چاتر چالاک بندیاں دی ٹیم منگوائی تے اوہناں نال صلاح کیتی جو الیکشن کیویں جتنا ہے، مہر عثما نے اوہ سب کجھ کیتا جو چاتراں دی مجلس نے کہیا۔ اوس اخباراں، رسالیاں تے ٹی وی تے وی اشتہاراں تے پیسے برباد کیتے، پر الیکشن نہ جت سکیا۔ سگوں ہن تے تن الیکشن ہار چکیا۔
اوس نوں اجے تیکر ایہہ سمجھ نہیں آیا جو مہر سیف تے اوس دی دھی کیہہ کردے سن تے کیوں کردے سن۔ اوس نوں سمجھ آونی وی نہیں تے مہر سیف دی کیتی کمائی اخیر لیکھے لگ جانی ہے۔۔۔
لوو جی دسو شیدے دی ایس گل وچ رمز کیہہ ہے؟ سالی اک علاقے دے سیاستدان دی سدھی جیہی کہانی ہے۔ پر اوہ کہندا ایس وچ سمجھن والیاں لئی بڑی رمز ہے؟ تسیں دسو کیہہ رمز ہے؟
