گوری امیاں نے '' یومِ ابا ''تے ہر نیانے نوں وکھرا ابا وکھایا

پچھلے ہفتے امریکیاں نے بڑا وج گج کے '' یوم ابا'' منایا۔گوری امیاں نے اپنے ہر نیانے نوں وکھرا وکھرا ابا وکھایا۔ کیہہ سواد دی گل ہے ہر نیانے دا اپنا ابا اوہ وکھری گل ہے جو اوہ ہن کسے ہور دا وی ابا ہے کیہہ خودکفیل نیانے ہین ہر اک دا ابا اپنا اپنا ہے۔ ساڈے وسیب دی غربت دا ایہہ وی اک بوہت وڈا ثبوت ہے ست بھین بھرا ہوون یاں اٹھ پر ابا اک ہی ہے۔ اسیں کیہہ کھیہہ '' یوم ابا '' مناواں گے۔ اوہناں دے تے '' فادرز ڈے '' دا پج موجود ہے سال وچ ہر نیانے نوں اپنا اپنا ابا وکھا دتا جاندا ہے کہ اج رج کے جنا ویکھنا ہے ویکھ لوو اگلے سال پھیر لبھنا پوے گا۔ اودوں تیکر ایہہ کسے ہور دا وی ابا بن چکیا ہونا۔مدرز ڈے وی ایسے لئی امریکی مناوندے ہین تاں جو ہر نیانے نوں اوہناں دی امی وکھا دتی جاوے پتر ویکھ تے سہی ایہہ تیری ماں ہے جیہڑی تینوں چھڈ کے کسے ہور دے نال نس گئی سی۔ نیانہ اپنی نسی ہوئی امی نوں ویکھدا تے گاوندا ہے

میرے باپ کو چھوڑنے والی کس کس کو اب چھوڑے گی
اس سے بھی منہ کو موڑ کے آگے کس کی قسمت پھوڑے گی

امریکی اپنے امی ابے انج بدلدے ہین جیویں کپڑے ونٹر وچ لیدر دی پینٹ والا ابا تے فرکے کوٹ والی امی، سمر وچ نیکر والا ابا تے اسکرٹ والی امی تے بوہتی گرمی پے جاوے تے پھیر ایس دا وخت وی نہیں۔

ساڈا اک امریکی دوست '' فادرز ڈے '' مناوندا ہی نہیں ہے اسیں نہ مناون دی وجہ پچھی تے غصے ہو کے بولیا اماں اج تیکر ایہہ ہی نہیں دس سکی جو ایس دا ابا کون ہے۔ دو چار واری وکھرے وکھرے '' ابے '' وکھائے پر کوئی اپنے سر الزام لین نوں تیار ہی نہیں ہویا۔ اوہ کہندا ہے اوہ حالی مایوس نہیں ہویا، ابے دی تلاش جاری ہے، کدی نہ کدی ضرور ملے گا۔ اسیں کہیا حیرانی والی گل ہے تیری امی نوں ایہہ وی چیتا نہیں اودوں کیہدے نال سی ؟ کہن لگا پچھیا کئی وار پچھیا پر اوہناں نوں چیتا نہیں آرہیا۔ اوہ کہندی ہے اوہ اودوں اینی رُجھی ہوئی سی کہ کون کدوں آیا کدوں گیا کجھ چیتا نہیں۔ اُنج اوہنے کئی وار آفر کیتی ہے جیویں دا دل کرے ابا لے لا پر دل ہے کہ من دا نہیں۔ کیوں کہ جیویں دا ابا اوہنوں چنگا لگدا ہے اوہدی ماں نوں پسند نہیں آوندا تے جیہڑا ماں نوں چنگا لگدا ہے اوہ اوہدی سمجھوں باہر ہے۔ انج لگدا ہے جیویں ابا نہیں گھیو دا ڈبہ لے رہے ہین۔

کجھ امریکی نیانے انج دے وی ہین جنہاں دے دو دو ابے دعویدار ہین۔ اماں نوں ایس لئی نہیں پچھ سکدے کہ اماں دوہواں ابیاں نوں لڑدا چھڈ کے کسے تیجے دے کول جا چکیاں ہین تے ظلم دی حد ویکھو بلڈ ٹیسٹ دی رپورٹ دا رزلٹ آوندا ہے تے دوہواں ابیاں دا دعویٰ غلط ہے۔ یعنی نقلی والے لڑ رہے ہین تے اصلی والا غائب ہے تے سواد نال کِتے کور کارنامے کر رہیا ہے تے پیراں دے نشان مٹا رہیا ہے۔ انج دیاں کجھ ماواں وی ہین جنہاں دا ایہہ اسٹائل ہے '' صدقے جاواں پر پھڑی نہ جاواں ''۔

شکر ہے ساڈے وسیب وچ گھٹو گھٹ اینی گڑبڑ نہیں ہے۔ نواں ابا لین نوں جی کیتا تے اماں تعاون نہیں کردی۔ ہاں نویں اماں لینا چاہو تے ابا ڈری ڈری ہاں ضرور کردا ہے۔ پر اوہ وی ہتھ پیر بچا ہے۔ ایہو کارن ہے جو نہ تے ساڈے لوک '' فادرز ڈے '' مناوندے ہین ۔ نہ '' مدرز ڈے '' صرف برگر فیملیز وچ منایا جاندا ہے کیوں جو اوتھے ایہہ جراثیم اپڑ چکے ہین کہ کِتے ''برگرامی'' غائب تے کِتے '' برگر ابا'' سلپ۔ ساڈے وسیب وچ ' کزن'' دا ساک بڑا اہم ہے۔ انج دے سارے وزن کزن ہی چکدے ہین۔ نیانے بڑے مان نال دسدے ہین ساڈی مما دے کزن ہین جیہڑے اسٹیٹس وچ رہندے ہین، سگوں رہندے سی۔ ہن تے ساڈے گھر ہی بوہتا ہوندے ہین ہن تے ساڈے گھر نوں ہی اسٹیٹس بنایا ہویا ہے۔مما کہندی ہے اوہناں دے ایہہ '' کزن'' ڈیڈ نالوں وی چنگے ہین ۔ جدوں توں ڈیڈ نوں شوگر ہوئی ہے اودوں توں اوہناں وی مننا شروع کر دتا ہے۔

کزن دا ساک اینا مقبول ہے جو قبول ہے قبول ہے توں پہلوں کزن کزن ہی کھیڈیا جاندا ہے۔ کئی دوست بڑے مان نال دسدے ہوندے سی فلانی میری کزن ہے۔ جے اوہناں نوں دسیا جاوے جو اوہ تے فلانے فلانے دی وی کزن رہی ہے تے چھیتی نال دفاع کرن لگ پیندے ہین پچھلیاں گلاں جان دیو، اجکل ایہہ صرف میری کزن ہے۔ دوجے ساریاں نوں ساک '' کزنیت توں عاق کر دتا ہویا ہے۔ اصل وچ 'کزنیت ' وچ نیٹ دا بڑا عمل دخل ہے۔ اک پاسیوں نیت خراب ہووے تے '' کزنیت '' دا ساک بوہتا چر نہیں چلدا۔ کوئی کڑی کسے منڈے نوں چاچے، ماسی، یاں مامے دا منڈا بھرا کہہ دیوے تے زہر لگدی ہے تے جے کزن کہہ دیوے تے انج لگدا ہے سیٹ پکی نہ سہی تے چانس تے تاں ہے۔

جنت مینوں ملے نہ ملے آسرا تے ہے۔ اُنج ساڈے ورگیاں نوں جنت وی مل گئی تے کیہہ فیدا ایویںہی جنت دا سیٹ اپ ہی خراب کردیواں گے۔ اک بندے نوں جنت وچ مار پے رہی سی، اللہ نے فرشتیاں نوں کہیا جنت تے نیک لوکاں دی تھاں ہے ایہہ بندہ وی نیک ہی ہووے گا جیہڑا جنت وچ آیا ہے پر اہنوں مار دے کیوں او؟ فرشتے نے جواب دتا دنیا وچ ایس دی ددھ دہی دی ہٹی سی۔ ایتھے آکے وی نہیں ٹل دا تے ددھ دی نہر وچ دہی پا کے ساری نہر جما دتی ہے اہنوں ویلے سر نہ پھڑیا ہوندا تے ہن تیکر سارا سیٹ اپ بدل چکیا ہوندا۔

ظاہر ہے اوہ تھاں پاکستان تھوڑا وا جدوں جیس دا دل کیتا سیٹ اپ بدل دیوے۔ کدی صدر اینا بے اثر کہ موجودگی دا وی احساس نہ ہووے تے کدی اینا طاقتور کہ سارا کجھ الٹ دیوے۔ ددھ دیاں نہراں وچ دہی جمادیوے پھیر دلیلاں وی دیندا پھرے دہی ددھ دی جمی ہوئی دوجی شکل ہے کوئی نویں شے نہیں بس تھوڑا جیا ردوبدل کیتا ہے۔ یعنی آئین وچ صرف ردوبدل ہی تے کیتا ہے اُکا تے نہیں بدلیا۔ پتلا ہے تے ددھ جم گیا تے دہی، لسا ہے تے شریف تے مونہہ زور ہے تے مشرف، پر آون والے ویلے دا کجھ پتہ نہیں جدوں انج دا کوئی آجاوے جیہڑا دہی نوں لسی بنا دیوے تے جمے ہوئے نوں پھرتیلا کر دیوے۔