گاں دا ہندوستان وچ بڑا آدر کیتا جاندا ہے۔مذہبی اتبار نال '' گاؤ ماتا' دا درجہ تے سی ہی پر ہن گجرات دے پنڈ '' لمبودی'' دہ اک گاںVIP بن گئی ہے اوہنوں دوروں دوروں لوک ویکھن آرہے ہین۔ اوہنوں بھگوان دی چمتکار آکھیا جارہیا ہے۔ چمتکار ایہہ ہے جو ایس گاں دے ڈھڈ وچ ہیرا منڈی دریافت ہوئی ہے۔ ہیرا منڈی لہور والی نہیں نہیں تاں گاں گھنگھرو بنھ کے نچ رہی ہوندی۔ تماشبین بین ایس تے نوٹ سٹ رہے ہوندے تے سینگ ہلا ہلا کے سلا رہے ہوندے۔ گجرات دی ایس گاں وچ واقعی ہیریاں دی منڈی دریافت ہوئی ہے تے جدوں وی اوہ گوبر کردی ہے ایس دے گوبر وچوں ہیرے نکل آوندے ہین۔
ایس چمتکار دی جدوں خبر عام ہوئی تے اوتھوں دے اک جیولر موہوبت سانگ گوہل نے دعویٰ کیتا ہے جو ایس گاں دے ڈھڈ وچوں ہیرے پیدا نہیں ہورہے تے نہ کوئی چمتکار ہے سگوں جتھے گاں تے مجھ پٹھے چر دیاں ہین اوتھوں اوہ روز لنگھ دے ہین تے پچھلے دناں وچ اوہدی ہیریاں دی اک گتھلی کِتے ڈگ گئی سی۔ اوہنوں سو فیصد یقین ہے جو اوہدی ہیریاں دی گتھلی کِتے ایسے تھاں ڈگ پئی ہے تے ایس گاں نے گھاہ دے نال نگل لئی ہے۔ ڈھڈ وچ جا کے ایس گتھلی دا مونہہ کھل گیا ہے تے ہن ایہہ گاں ہیرا ہیرا گوبر کر رہی ہے۔ گاں دے مالک گوپال نے جیولر دے ایس بیان نوں جھوٹھ تے بے ایمانی آکھیا کہ انج دا ڈرامہ کر کے اوہ ہیریاں دے قبضہ کرنا چاہندا ہے۔گوپال کہندا ہے جو اک ہیرا کھا کے امراؤ جان ادا تے ثریا بھوپالی ورگی چالاک چتر مر سکدی ہے تے ایہہ معصوم گاں پوری ہیریاں دی گتھلی کھا کے کیویں جیوندی رہ سکدی ہے۔
گوپال نے حکومت کولوں وی مدد منگی ہے جو ایس دی گاں نوں تحفظ دتا جاوے انج نہ ہووے اوہدی گاں نوں اغوا کر لیا جاوے یاں کوئی ڈاکو لے جاوے تے ڈھڈ پاڑ کے سارے ہیرے کڈھ لوے۔ سنن وچ آیا ہے جو کسے انشورنس کمپنی نے گوپال نوں گاں دید لائف انشورنس کروان دی وی صلاح دتی ہے۔ ظاہر ہے قیمتی گاں ہے جیہڑی ددھ توں وکھ ہیرے وی دیندی ہے۔ ہن تاں ایہہ گاؤ ماتا توں '' گاؤ ہیر ماتا'' ہو گئی ہے۔ گوپال نے ایس گاں نوں ووہٹی وانگوں سجایا ہویا ہے تے اوہدے پچھے اک ڈبہ بنھ دتا ہے کِتے گوئے وچ ہیرے ایدھر اودھر نہ ہو جاون ایس لئی ایس ''ڈائمنڈ گوبر'' دی وی پوری حفاظت کیتی جارہی ہے۔
ہن تسی ہی دسو جدوں ایس گاں دی خبر پورے یورپ تیکر جاوے تے اوہدا دماغ خراب ہووے گا یاں نہیں۔ اک پاسے '' میڈ کاؤ '' دوجے پاسے '' ڈائمنڈ کاؤ'' اک دا گوشت کھاون توں وی پرہیز دوجی دا گوا وی ہیریاں نال بھریا۔ اک دی ہیلتھ وی ناقابل خاطر دوجی دی لائف لئی انشورنس والیاں دی آفر۔ اک دا کوئی کھاندا نہیں قیمہ اک دا ہورہیا ہے زندگی دا بیمہ۔ اصل وچ ہندوستانی گاں دی قدر ویکھ کے یورپ دی گاں غصے نال پاگل ہوئی ہے۔ بھارت وچ گاں گاؤ ماتا ہے۔ اوہدی پوجا کیتی جاندی ہے۔ اوہدے پیشاب تیکر پوتر تے ہن گوا وی ہیریاں نال بھریا۔ ہوسکدا ہے یورپ دی ہر گاں دا ڈپریشن اینا ودھ جاوے جو اوہ گل وچ اپنی ہی پوچھ بنھ کے آپ ہتیا تے مجبور ہو جاوے۔ یورپ والیاں نوں اپنی گاں دے مورال نوں اپ کرن لئی کجھ نہ کجھ کرنا پوے گا۔ ٹرینڈ بولداں نوں چھڈنا پوے گا جیہڑے گانے گا کے نچ کے اپنی محبت دا یقین دوا کے آپ ہتیا توں روک سکن، نہیں تاں ڈائنا سارس وانگوں گاں وی صرف فلماں وچ نظر آوے کرے گی۔
یورپ والیاں نوں کالھی نال گاں بہلا تے گاں بچا کمپین شروع کرنی چاہی دی ہے۔موسیقی نال اوہدا ذہن بدلن تے سبھاء نوں چنگا کرن دی کوشش کرنی چاہی دی ہے۔ کیوں جو جانوراں تے ریسرچ کرن والے اک ادارے ولوں پچھلے دناں وچ ایہہ دعویٰ کیتا گیا سی جو موسیقی معصوم نیانیاں وانگوں جانوراں تے وی اثر پاوندی ہے۔ چوہے توں لے کے ہاتھی تیکر تجربہ کر کے ویکھیا تے ایہہ ثابت ہویا جو حقی موسیقی بھرواں اثر کردی ہے۔
بوہت پہلوں راجستھان دے کسے پنڈ وچ اک انج دی گاں دا پتہ لگیا سی جیہڑی کشور کمار دے گیتاں دی شوقین سی۔ جدوں تیکر ایس دے گل وچ ٹیپ ریکارڈر لما کے کشور کمار دی کیسٹ پلے نہیں کیتی جاندی سی اوہ ددھ نہیں دیندی سی سگوں ایتھوں تیکر نوٹ کیتا گیا جے گیت غمگین ہے تے ددھ دی مقدار گھٹ تے جے گیت شوخ ہووے تے ددھ دی مقدار ودھ جاندی ہے۔ شکر ہے ایس زمانے وچ دلیر مہدی مارکیٹ وچ نہیں آئے سی نہیں تاں اوہناں دے بھنگڑے تے ہتھ لائے بناء دھاراں پھٹ پیندیاں تے منی بیگم دی ٹن غزلاں سن کے تے ہوسکدا ہے ددھ دی تھاں ''ٹھرا'' ٹپکن لگا۔
ہیرے دیون والے گاں نوں جے امراؤ جان ادا دا اخیرلا رقص وکھایا جاوے جیس وچ اوہ ہیرا نگل لیندی ہے تے ہوسکدا ہے ڈر کے گاں پوری گتھلی باہر سٹ دیوے۔ یورپ دی گاں تے موسیقی دے اثر چیک کرن لئی اوہناں نوں مائیکل جیکسن دے گیت سنوائے جاون خورے اوہناں دا دماغ کھسکو توں ڈسکو ول اُلر جاوے۔
یمن توں خبر آئی ہے اک پینڈو کڑی شام ویلے اپنی گاں نوں پٹھے پا رہی سی اوہدا موبائل فون کِتے ڈگ گیا۔ جدوں لبھن لئی دوجے فون توں کال کیتی گئی تے گھنٹی گاں دے ڈھڈ وچ وجی۔ اوہنے سوچیا خورے گوئے راہیں اوہدا فون اوہنوں واپس مل جاوے پر کئی دن لنگھن مگروں وی فون حالی تیکر گاں دے ڈھڈ وچ ہے تے اوہنوں اپنے سارے میسیج گاں دے ڈھڈ توں ہی لینے پیندے ہین۔
سوادی گل ایہہ ہے کہ جدوں وی فون دی گھنٹی وجدی ہے تے گاں سواد نال ٹپ دی ہے جیویں اوہدے ڈھڈ وچ گدگدی مچ رہی ہووے ایہہ افواہ کِتے محلے وچ کھلر گئی تے لوک فون دیاں گھنٹیاں وجا وجا کے گاں دا ''ڈانس '' ویکھ رہے ہین۔ ہوسکدا ہے کوئی بولد وی گاں نوں '' مس کالاں '' مار رہیا ہووے کیوں جو کئی کالاں تے اوہ شرما وی جاندی ہے۔
جدوں فون تے گھنٹیاں مار کے ہیلو ہیلو پکار کے چپ کر جاندا سیں اوہ ویلا یاد کر
اجکل موبائل فون وچ ایہو ایہو جئیاں رنگ ٹونز آگئیاں ہین جو سنن والا تبک جاندا ہے۔ کال آوندی ہے تے کِتے چڑیاں دا چیک چیاڑا کِتے ککڑ بانگ دیندا ہے، کِتے بچہ ہسدا ہے، کتے کڑی اک درد بھری چیک ماردی ہے۔ ایس توں وکھ کئی میوزک تے گانیاں دے ٹون وج پیندے ہین۔جے ایس یمنی کڑی دے موبائل وچ کوئی گیت بھریا ہوندا تے ہر کال تے گاں دے ڈھڈ وچ گیت وج رہیا ہوندا تے گاں جھوم رہی ہوندی تے گیت جے اوہدی پسند دا ہوندا تے روس وکھالے لئی زمین تے زور زور کے پوچھ مار رہی ہوندی کہ بند کرو ایہہ بے وقت دی راگنی ہن لانی ہاں گوئے دا ڈگ تے چکو اپنا موبائل تے دفع ہو جاؤ۔
