پاکستان وچ پیٹرول پجھتر روپیئے تے ڈیزل پچونجا روپیئے تیکر تے اپڑ گیا ہے تے آس ہے کہ اگلے باراں مہینیاں وچ پیٹرول اک سو پنجھی تے ڈیزل اک پنج روپیئے لٹر تیکر اپڑ جاوے گا۔ کیوں جے ایہو طریقہ اے پیٹرول تے سرکاری چھوٹ نوں مکاؤن دا۔
مُل وچ ایس وادھے نال وستاں دی پیداواری لاگت، وستاں دی ڈھوا ڈھوائی دے مُل وی ودھ جاون گے تے انج ملک وچ وسیلیاں دی ساہویں ونڈ ہووے نہ ہووے غریبی دی ساہویں ونڈ دا سُفنا ضرور ای پورا ہو جاوے گا۔
جیہڑے سجناں کول ذاتی سواری اے اوہ ہن اپنے بال بچیاں نال بوہتا ویلا لنگھاؤن گے۔ کیوں جے اک سو پنجھی روپیئے لیٹر پیٹرول وچ تسیں ودھ توں ودھ کم کار تے جاون تے فیر سدھا گھر پرتن دی عیاشی ای کر سکو گے۔ پروہنیاں دا آؤن جان وی گھٹ جاوے گا۔ کیوں جے پروہنے تہاڈے خلوص توں پہلوں تہاڈے گھر تیک کلومیٹر مِنیا کرن گے۔آٹے دیاں روٹیاں گن کے پکیا کرن گیاں تے رج کے کھاون دی بھیڑی عادت وی مُک جاوے گی جیہدے نال ٹبر دی صحت وی چنگی ہووے گی تے خرچے وی قابو وچ رہن گے۔
ہُن تیکر تے تہتر فیصد آبادی غریبی دی لکیر دے ہیٹھاں ہے۔ پر پیٹرول دے مُل وچ ہوندا وادھا ویکھ کے انج لگدا اے کہ اگلے کجھ مہینیاں وچ غریبی دی لکیر غریب دے ہیٹھاں ہووے گی۔
کارل مارکس نے آکھیا سی کہ ساڈے کول گنواؤن لئی ہے ای کیہ سوائے بیڑیاں دے۔ اج کارل مارکس جیوندا ہوندا تے بیڑی لئی سنگل لین جاندا تے اوہنوں سُرت آ جاندی تے اوہ کُرلاؤندا ہویا چیکاں ماردا کہ ساڈے کول گنواؤن لئی ہے ای کیہ سوائے آپنے آپ دے!
