پچھلے دناں وچ ساڈے اک بیلی دی گھر والی تے سوہرا امریکہ اپڑے۔ مصروفیات کارن چھیتی رابطہ نہ ہوسکیا۔ کل اوہناں نال گل ہوئی تے بڑے ہرکھے ہوئے سن۔ اسیں کہیا بھئی بیگم دے آون نال تے تہانوں خش ہوونا چاہی دا سی پر تسی تے ادھار دی اخیر ورگا مونہہ کیتا ہویا ہے۔ اپنا دکھڑا دسدیاں ہوئیاں بولے جیس دیہاڑ بیگم نے آونا سی فلائیٹ دو گھنٹے لیٹ سی ایس لئی اسیں ایسے حساب نال ائیر پورٹ جاون دا پروگرام بنایا۔ پر فلائیٹ دو دی بجائے ڈیڈھ گھنٹہ لیٹ ہوئی تے ساڈے توں پہلوں اپڑ گئی۔ اسیں اپنے سارے فون نمبر دتے ہوئے سی تے تاکید کیتی سی جے دیر سویر ہو جاوے تے فون کر دیو۔
سوہرے نے فون ملایا اسیں تے راہ وچ سی ایس لئی آنسرنگ مشین تے ساڈی آواز وچ ریکارڈنگ سی تے سوہرا ہیلو ہیلو کردا رہیا تے جدوں کجھ سمجھ نہ آیا تے گرمی کھا گیا تے ساڈی بیگم نوں دسیا کئی وار فون ملایا ہے پر اوہ میری اک نہیں سن رہیا تے اپنی بک بک کردا ہے تے پھیر ٹوں ٹوں ہوون لگدی ہے۔ بیگم نے کہیا ابا جی تسی کِتے نمبر تے غلط نہیں ملارہے ۔ اوہ ہور وگڑ گئے کہ کیہہ تیرے خاوند دی آواز نہیں پچھان دے کیہہ تینوں یقین نہیں آرہیا تے آپوں سن لا۔ بیگم نے سنیا تے اوہدے پلے وی کجھ نہ پیا۔ بیگم نے دوجا نمبر دتا جیہڑا ساڈے بیڈ روم دا سی۔ سوہرے نے اوہ ٹرائی کیتا تے ایس تے وی ریکارڈنگ ملی بد نصیبی نال بیڈ روم والے نمبر تے کڑی دی آواز والی کمپیوٹرائزڈ ریکارڈ نگ سسٹم ہے۔ سوہرا صاحب بھڑک پئے '' اصلی چکر ایہہ ہے اوہنے بیڈ روم وچ کڑی رکھی ہوئی ہے اوہ وی اپنی بک بک کردی ہے تے پھیر اوہی ٹوں ٹوں۔''بیگم نوں وی اوہ آواز سنائی گئی تے اوہنے رونا پیٹنا شروع کر دتا۔
ٹریفک وچ پھس جاون دی وجہ توں اسیں ہور لیٹ ہو گئے تے دوجے پاسے ڈرامہ عروج تے سی۔ سوہرا میرے بارے اپنا تجر بہ جھاڑ دا رہیا۔ بیگم روندی کرلاوندی رہی تے اخیر سوہرے نے کہیا پاگل نہ بن اوہنے نہیں آونا کسے ریسٹ روم وچ تھوڑا چر آرام کرنے ہاں پھیر واپسی دا پروگرام بناونے ہاں۔ دوجے پاسے لبھن تے اوہناں نوں دوروں '' ریسٹ روم'' لکھیا ہویا نظر آیا۔
سامان دھروندیاں ہوئیاں ریسٹ روم ول ودھے۔ امریکہ والیاں نوں رج کے گالھاں کڈیاں '' پاگل دے پتراں نے ریسٹ روم دا بوہا اینا نکا رکھیا ہے ایس وچ سامان کیویں وڑے گا۔کھچدیاں دھروندیاں جدوں اندر دا منظر ویکھیا تے ساریاںنوں لیناں وچ رجھیا ویکھیا۔ ساریاں نے پرت کے حیرانی نال ویکھیا بڈھا سوٹ کیساں وچ کیہڑا کیس سمیٹن آیا ہے شکر ہے حالی بیگم باہر ہی سی۔ دوجے پاسے سوہرا لاحول پڑھدیاں ہوئیاں باہر نکلیا تے دوجے پاسے اسیں دوڑ دے ہوئے اک پاسے اپڑے تے سامان نوں دھروندیاں ہوئیاں باہر لیائے ایہہ تسی کیہہ مورکھ پن کر رہے او۔ انکل چھیتی نال بولے کیہہ ایہہ ریسٹ روم نہیں ہے ؟ اسیں مسکاوندیاں ہوئیاں کہیا ہاں جی ایہہ ریسٹ روم ہی ہے پر ایتھے امریکہ وچ ریسٹ روم '' پیشاب گھر'' نوں کہندے ہین ایس تے ہور کاوڑن لگ پئے کہ عجیب بندے نیں جے امریکی پاکستان بوہتا آون جاون لگ پین تے ساڈے سارے ریسٹ روم پیشاب کر کر بھر دیون گے۔
بڑا اوکھا سمجھا سمجھا کے گھر لیاون وچ کامیاب ہویا پر حالی تیکر ایس گل دا یقین نہیں دوا سکیا جو آنسرنگ مشین دی ریکارڈنگ دا اوہناں نے غلط مطلب کڈیا سی۔ بیگم نے اپنے ابے دی مدد نال گھر دی نکرنکر پھرول ماری پر کِتے کوئی نہیں لبھی۔ دوہواں دی ایہو منگ ہے بیڈ روم والی کڑی کِتھے لُکائی ہوئی ہے؟ کسے کمپنی توں ٹیلی مارکیٹنگ کرن والی کسے کڑی دا فون آوندا ہے تے اوہنوں بیڈ روم والی کڑی آکھ دتا جاندا ہے جو ہن اوہ آوازاں بدل بدل کے کئی کمپنیاں دے حوالے نال فون کر رہی ہے۔
سوہرا میرا ماشاء اللہ بڑا سیانا ہے اوہدے سیانپ دا گویڑ ائیر پورٹ تے ہوون والیاں حرکتاں توں لایا جاسکدا ہے۔ہور اوہناں نے جیہڑا کمال وکھایا اوہ ایہہ سی جو اوہ ننگے پیریں امریکہ آئے شکر ہے صرف پیر ہی ننگے سی نہیں تاں ائیر پورٹ توں گھر تیکر پورا جلوس چھڈن آوندا۔ جدوں اوہناں دے ننگے پیریں امریکہ یاترا دا کارن پچھیا تے فرماون لگے امریکہ والے بڑے ظالم لوک ہین جدوں اوہناں نے دورہ امریکہ وچکار ائیر پورٹ تے ساڈے وزیراں دیاں جتیاں لوا لئیاں تے اسیں کیہہ شیواں واں جدوں کہ اوہ سارے لوک صدر پاکستان دے نال آئے سی اسیں تے بڑا اوکھیاں آپوں اپنے نال آئے ہاں۔ سیانپ دی ایہو منگ سی جو نہ ہووے جتی نہ کوئی لوائے۔
اک بڈھا بندہ بمار پے گیا ڈاکٹراں نے دسیا اوہناں نوں کینسر ہے پر جدوں وی کوئی اوہناں دی خبر لین آوندا تے پچھدا تہانوں کیہہ بماری ہے اوہ فرماندے اوہناں نوں ایڈز ہے۔ گھر والے بڑے پریشان سی۔ وڈے پتر کولوں رہیا نہ گیا تے پچھیا تسی کیہہ سارے پنڈ وچ ایویں ہی مشہور کیتا ہویا ہے تہانوں ایڈز ہے جدوں کہ تہانوں وی چنگی طرحاں پتہ ہے تے ڈاکٹراں دا وی ایہو کہنا ہے تہانوں کینسر ہے۔ بڈھے نے پتر نوں سمجھاوندیاں ہوئیاں کہیاپتر ایس وچ کوئی راز ہے بندے نوں سیانا بننا چاہی دا۔پتر نے کہیا انج داکیہڑا راز ہے تے کیہہ سیانپ ہے۔ اوہناں تسلی دیندیاں ہوئیاں کہیا ویلا آئے گا تے اوہ وی دس دیواں گا۔
کجھ دناں مگروں اوہناں دی حالت بوہتی وگڑ گئی پر اوہناں دے مونہہ تے اوہی ایڈز دی رٹ سی۔ پتر نے کھج کے پچھیا ابا ہن تے تسی مرن والے او ہن تے دس دیو کیہہ راز تے کیہہ سیانپ ہے جیہڑی تسی ایڈز دی رٹ لا کے سارے جگ دی بدنامی لئی ہوئی ہے۔اکھڑدیاں ساہواں سنبھالدیاں ہوئیاں بولے پتر میں ایہہ کہہ کہ جو مینوں ایڈز ہے سارے زمانے دی بدنامی تے لے لئی پر تیری ماں نوں ساری عمر لئی محفوظ کر دتا۔ میرے مرن توں مگروں اوہدے نیڑے کوئی مرد نہیں جاوے گا۔ میری ماڑی جئی قربانی نال اوہ مرداں توں بچی رہوے گی تے تسی مترئے پیو توں بچے رہوو گے۔ اہنوں کہندے ہین دور دا سوچنا یعنی تسی مترئے پیو توں تے تہاڈی ماں پاپ توں بچی رہوے گی۔
