مرد مڈھوں ہی معصوم ہے تے عورت دے ہتھوں مورکھ بن دا آیا ہے۔ پہلی وار گلاں وچ آیا تے جنت وچوں کڈھیا گیا۔ کئی معصوم مرد سکول، کالج، تے محلے توں کڈھے جاندے ہین۔ نوکری تے گھروں کڈھے جاندے ہین ساریاں پچھے عورت دا ہی ہتھ ہوندا ہے۔مرد نوں ویاہ دے مگروں یاراں بیلیاں دے ٹولے وچوں نکلنا پیندا ہے تے رن مرید ہوون دا تہمتی اعزاز وی پاندا ہے۔
مرد سہرا بنھ کے نکاح والے مولوی دی ہاں وچ ہاں ملاوندیاں ہوئیاں خطریاں توں بے خبر کنا معصوم لگدا ہے۔مرد دی معصومیت دیاں بےشمار مثالاں ملدیاں ہین پر اینا معصوم نہ تسیں ویکھیا ہووے گا نہ ہی سنیا۔ وچارہ مرد اینا معصوم توبہ توبہ۔ ناروے دے اک اخبار موجب اک معصوم مرد نے عدالت وچ اک عورت تے الزام لایا ہے جو اوہنے معصوم مرد دی اُس ویلے عزت لٹ لئی جدوں اوہ ڈوہنگی نیندر سوں رہیا سی۔ تفصیلاں موجب کسے پارٹی وچ مرد معصوم واہوا نچ گا کے جدوں تھک گیا تے کسے نکرے جا کے سوں گیا تے اکھ اُس ویلے کھلی جدوں بیک گراؤنڈ آوازاں آرہیاںسن ' تیرا لٹیا شہر بھنبھور وے پنوں بے خبرا۔
ہائے وچارا مرد کنا معصوم سی اوہدے تے زنانہ حملہ ہوندا رہیا تے اوہ چپ چپیتیاں ستا رہیا، پکی گل ہے اُس زنانی وچ امریش پوری دی روح وڑھ گئی ہووے گی تے مرد مادھوری بن کے سوندا رہیا تے اپنا آپ گواندا رہیا۔ انڈین فلماں وچ کدی کدی انج دا سین وکھایا جاندا ہے تے سارا کجھ ہوون دے مگروں کڑی وار وار ایہو کہندی ہے '' ہے بھگوان یہ تونے کیا کیا'' کیتا انسان نے ہوندا ہے پر سر بھگوان تے پا دتا جاندا ہے۔ہن اوہناں دے تاں بھگوان وی بتھیرے ہین خورے کیہدے کھاتے وچ پایا جاندا ہے۔ کجھ بھگوان تے وچووچ ایس گل تے خوش ہو جاندے ہوون گے جو '' ساڈھے اُتے وی شک کیتا گیا''۔ اخبار ہور لکھدا ہے جو عدالت نے ایس عورت نوں چالی ہزار نارویجن کراؤن جرمانہ تے نو مہینے قید دی سزا سنائی ہے۔ ایہہ نو مہینے کیوں متھے گئے۔ ہوسکدا ہے جو اوہ نو مہینیاں توں مگروں رزلٹ ویکھنا چاہندے ہوون جو زنانی دے ہتھوں عصمت دری کرن والا مرد پیو بندا ہے یاں نہیں۔
عصمت دری توں چیتا آیا فیصل آباد وچ دریاں ویچن والے اک بندے دی گھر دی دا ناں عصمت بیگم سی ایس لئی اوہنے بغیر سوچے سمجھے بیوی نوں خش کرن لئی اپنی ہٹی دا ناں ''عصمت دری ہاؤس'' رکھ دتا۔ جیویں قبرستان دی کندھ تے کسے نے '' خوش آمدید'' لکھ دتا سی۔ انج ہی اک کپڑے دی ہٹی تے لکھیا سی '' ایتھے سستے تے پائیدار کفن وی وکدے ہین سیل جاری ہے، '' بائے ون گیٹ ون فری ''۔ کراچی وچ اک تھاں دے کباب بڑے مشہور سن ہر ویلے خریداراں دا رش لگیا رہندا سی۔ اوتھے ایہہ گیت وج رہیا ہوندا سی '' ہم آج اپنی موت کا سامان لے چلے '' تے دھڑا دھڑ کباب وک رہے ہوندے سن۔
ساڈے بیلی نے جدوں ناروے والی خبر پڑھی ہے ناروے جاون لئی مچل رہے ہین۔ اوہناں دا کہنا ہے اوہناں توں تے اُنج ہی نیندر بوہت آوندی ہے جتھے زنانی نوں ویکھیا کھلوتے کھلوتے کسے کھمبے نال ڈھو لا کے سوں گئے یاں فٹ پاتھ تے ہی لمے پے کے گھراڑے لین لگے۔ بس یاں ٹرین وچ نال والی زنانی دے موڈھے تے سر رکھ کے سوں گئے۔کسے پارٹی وچ گئے تے ہر کونے وچ گھنٹہ گھنٹہ سوں گئے کہ خورے کسے ویلے کسے نکرے مقدر دی دیوی جاگ جاوے تے خورے کس گلی زندگی دی رنگین شام ہو جاوے۔
اوہناں نوں امریکن زنانیاں توں وی واہوا آساں ہین جے ناروے دی عورت ایس جرات مندی دا وکھالا کرسکدی ہے تے امریکہ کیویں پچھے رہ سکدا ہے تے جے امریکہ وچ کجھ پیش رفت ہوئی تے پاکستان وچ وی ایس دی ریس دے روشن امکان ہین۔ اخیر پاکستان نوں وی روشن خیال پاکستان بناونا ہے۔ اُنج پاکستان وچ اینی جراتمندی دا وکھالا تے ہوچکیا ہے جو بین الاقوامی پدھر تے مختاراں مائی تے بحث ہورہی ہے۔ مختاراں مائی نوں جنی میڈیا توں کوریج ملی ہے اینی تے فلم ' نظر' وچ میرا نوں چمیاں ویچن تے وی نہیں ملی۔
ہیں نظر نظر تیرے ہی جلوے ہیں نگر نگر تیرے ہی چرچے کون اٹھائے گا اب تیرے خرچے میں تھانہ تھانہ کٹ گئے پرچہ
فلمی فنکاراں دے خرچے چکن والے ہن خورے اٹھ چکے ہین، ایس لئی ہن اوہناں نے اپنے جلویاں تے نخریاں نال لٹن دی بجائے ڈاکوواں راہیں لٹنا شروع کر دتا ہے۔ اک خبر سی جو ڈاکوواں دا اک وڈا ٹولا پھڑیا گیا جیہڑا راہ وچ زنانیاں دیاں ٹونباں کھوندا تے فلمی ہیروئیناں ریشم تے ثنا دے پیراں وچ جا کے سٹ دیندا سی۔ پاکستان دی فلمی صنعت بوہت وخت وچ پئی ہوئی ہے خورے ایسے لئی پھولن دیوی ریشم تے ڈاکوواں دی موڈھی ثنا نے ایہہ راہ پھڑی ۔
ایہہ دوہویں ڈاکو رانیاں جے پھڑیاں گئیاں ہوندیاں تے کئی ہور چہرے وی بے نقاب ہوندے کئی سفید پوش ایس کالے دھندے وچ رلتی پائے جاندے۔ ریشم تے ثنا نے جے ڈاکے پوانے ہی سی تے کسے امیر ملک وچ جاندیاں۔ زرمبادلہ کماوندیاں، اپنے ہی ملک دے غریب شہریاں نوں کیوں لٹ رہیاں ہین۔ ہمیش امیرزادیاں نوں لوٹدیاں رہیاں ہین۔ پنڈ توں شہر ٹیوب ویل خریدن لئی آون والے چودھری جے اوہناں دے ہتھے چڑھ گئے تے پرت دیاں ہتھ دا نلکا ہی لے کے گئے ہین۔ائیر کنڈیشنڈ دے چاہونداں نے تناں پراں والے پکھیاں تے ہی گزارا کیتا ہے۔ فلماں وچ پیسہ لاون والے فلمی ہیروئین تے سارا کجھ لٹا کے اخیرلی پونجی نال عمرہ کرن ہی گئے ہین جو خورے اوتھے جاکے معافی ہو جاوے، پر جدوں کسے دی انگڑائی چیتے آئی تے اوتھے ہی مونہوں آپے نکلیا ہے '' لہور لہور اے ''
