بس وچ اک مسافر بوری سنے سوار ہویا ٹکٹ والے نے کہیا توں اینی وڈی بوری چکی ہوئی ہے ایس بوری دا وی ٹکٹ لگے گا۔ مسافر نے کہیا ایہہ بوری ہے بندہ تھوڑی ہے جیہڑا ایہدا وی ٹکٹ لگے گا۔ جدوں واہوا بحث توں مگروں گل بن دی نہ دسی تے مسافر کہن لگا ڈیڈھ ٹکٹ لا لوو پورا میرا تے ادھا بوری دا ٹکٹ، ٹکٹ والا کہندا نہیں بوری دا وی سالم ٹکٹ لگے گا تے جے توں نہیں من دا تے ہنے سنے بوری تینوں باہر سٹ ناں ۔ اچن چیتی بوری کنبھی تے بوری نے پیشاب کر دتا۔
کھول کے ویکھیا تے وچوں اُس سواری دا بیلی نکلیا جیہڑا ہتھ بنھ کے کہہ رہیا سی ایہہ ایہدا آئیڈیا سی اہنوں سٹو میں تے ماڑا جیہا بندہ ہاں۔ مسافر اوہنوں غصے نال کہندا کمزور تے توں ہے سی پر اج پتہ لگیا جو تیرا مثانہ وی ایناکمزور ہے، کمزور مثانے والا بولیا ہدوانا وی کھوانا تے مثانے نوں وی آزماونا۔ خیال ایہو ہے جو انج دیاں ' ڈیڈھ چالاکیاں '' صرف ساڈے ایتھے کیتیاں جاندیاں ہین پر انج نہیں ہے۔ اصل وچ '' ڈیڈھ چالاک '' دنیا وچ ہر تھاں وسدے ہین۔
رائٹرز دی نیوز موجب بلغاریہ دی اک تئی سالاں دی زنانی ' سنڈی کیو ' ڈیڈھ چالاکی کردی ہوئی گیلے ہتھاں نال پھڑی گئی۔ سنڈی فیری راہیں یونان توں اٹلی جارہی سی اوہدے سوٹ کیس نے پیشاب کر دتا کسٹم تے امیگریشن والیاں نے سوٹ کیس کھلوایا تے سنڈی دا '' ٹن '' محبوب کنبھ دا ہویا باہر آیا جیہڑا وار وار کہہ رہیا سی ایہہ میرا نہیں ایہہ سنڈی دا آئیڈیا سی کہ انج امیگریشن والیاں نوں پتہ نہیں چلے گا۔سنڈی نے سینڈل نال اپنے محبوب نوں پھینٹی لاوندیاں ہوئیاں کہیا مینوں نہیں سی پتہ توں اینے ہلکے مثانے دا نکلیں گا۔ اوہ بولیا ایہہ سارا تیرا قصور ہے ساری رات بیئر پلاوندی رہی پھیر ایہہ کیویں ہوسکدا ہے جو بیئر باہر نہ نکلے۔
اک بندہ پی کے مسلسل انگلش تے اتر آوندا ہے کسے نے پچھیا تے کہندا انگلش وہسکی پیناں۔ جیویں جیویں وہسکی اندر جاندی ہے انگلش باہر آوندی ہے۔ اوہناں نوں کسے نے پچھیا آنڈہ کھانا چنگا ہوندا ہے اوہدے وچ واہوا پروٹین ہوندی ہے۔ کہن لگے آنڈہ کھان دا کوئی فیدا نہیں ہے سفیدی نکل جاندی ہے زردی مونہہ تے آجاندی ہے۔ اُنج کھانا اوہنوں ہی لگ دا ہے جیہڑے رج کے نہیں تھک کے اٹھ دے ہین۔
انج دے لوک دشمن اناج یاں وزیر قحط اکھواندے ہین اوہناں دے آون تے ہولی ہولی اعلان ہوون لگ پیندا ہے ہن جے روٹی گھٹ جاوے تے میزبان ایہدا ذمے وار نہیں ہے۔ ساڈے ویاہواں شادیاں وچ کئی وار کھانا بوہت دیر نال دتا جاندا ہے جیس دا نتیجہ ایہہ ہوندا ہے پروہنے بھکیاں وانگوں روٹی تے ٹٹ پیندے ہین تے کھانا گھٹ جاندا ہے کئی لوک ہوکے وچ پلیٹ وچ کے ٹو دی چوٹی بنا لیندے ہین پر اوہنوں سر کرن وچ کامیاب نہیں ہوندے تے کھانا ضائع کر دیندے ہین۔
دوجا جدوں دا ٹر پھر کے کھانا کھان دا رواج ہویا ہے۔ کھانا بوہتا کھاداجاندا ہے کئی لوک کھانا کھان توں مگروں واک کرن گجے ہوندے ہین اوہناں دی واک کھانا کھاون وچکار پوری ہو جاندی ہے تے اوہ ''واکدے ''تے '' ٹپدے'' پھردے ہین تے کھانا ہڑاپدے رہندے ہین۔ امریکہ وچ کجھ دیسی لوک جدوں نویں نویں امریکن بنن دی کوشش کردے ہین تے لباس، چال چلن دے نال نال گل بات وچ وی انگریزی ٹچ ہوندا ہے۔ کسے محفل وچ اک ماں اپنے نیانے نوں انگریزی ٹچ وچ انج ڈانٹ رہی سی '' چل پتر پیچ نوں ایٹ کر نہیں تاں پھینٹی لاواں گی۔ دوجی زنانی نے کہیا '' کیوں فورسنی آں جے اوہ '' پیچ '' نوں نہیں '' لائقدا'' تے کجھ ہور '' ایٹوا دو '' چل پتر جے کجھ '' ایٹن '' نوں دل نہیں کررہیا تے انج کر کوئی جوس ہی '' ڈرنک '' لا۔ تیجی نے فرمایا تسیں دوہویں '' ٹو گیدر '' نیانے نوں کیوں '' بودردیاں '' اوہ اوہدیاں اکھاں وچ ویکھو کنی '' سلیپ '' ہے اہنوں آرام نال '' سلپن '' دیو جدوں '' ویکے '' گا تے جو اوہنے '' ایٹنا'' ہووے گا '' ایٹ '' لوے گا۔
اک زنانی اپنے نیانیاں دی تعریف کردی ہوئی بولی میرے '' کڈز ' نے پرسوں ادھی رات نوں اٹھ کے میرا برتھ ڈے منایا۔ میں آکھیا مارننگ تے ہوون دیندے نائٹ وچ ہی ڈے منا لیا۔ نیانیاں نے کہیا تسی نائٹ وچ ہی '' بورن'' ہوئیاں سی۔ایس لئی تسیں '' برتھ ڈے '' دی تھاں '' برتھ نائٹ '' منایا کرو۔
پرانے لوکاں نے نیانیاں دے جمن دے دن کئی حوالیاں نال چیتے رکھے ہوندے سن مثال دے طور تے جدوں بوہت مینہ پیا سی اودوں ساڈا فلانا نیانہ جمیا سی۔ ساڈے اک بیلی دا برتھ ڈے وی مینہ نال جڑیا ہویا ہے۔ اوہناں دا کہنا ہے جدوں وی بوہتا مینہ پیندا ہے اوہ اپنی سالگرہ منا لیندے ہین ساڈے بیلی دی سالگرہ ہن بڑے چر پچھوں ہوون لگ پئی ہے جدوں دا گذریل صدر رفیق تارڈ نے صدارت دا عہدہ چھڈیا ہے ساڈے بیلی دی سالگرہ کدی کدائیں ہوون لگ پئی ہے کیوں جو ہن کوئی مینہ لئی نماز پڑھوان والا نہیں۔ ساڈے اک سانجھے سنگی نے اوہناں نوں صلاح دتی جو فلماں وانگوں مصنوعی مینہ دا پربندھ کیتا جاوے تاں جو سالگرہ تے ہوسکے اک نونہہ نے سس نوں پچھیا '' اماں تسیں کدوں پیدا ہوئیاں سی ؟ سس بولی چنگی طرحاں چیتا نہیں پر میرے ماں پیو موجب جدوں جمی تے بڑا زور دا زلزلہ آیا سی''۔ نونہہ نے بڑی سادگی نال آکھیا '' پکی گل آ آیا ہونا''۔
کجھ دا جمن دیہاڑ موسماں نال جڑیا ہوندا۔ عالم چنا جدوں جمے تے گنے دا موسم سی۔ عالم چنا دے جمن دی خبر سارے علاقے وچ پھیل گئی سی اوہدے گھر دے باہر رش لگ گیا سی ہر کوئی پچھ رہیا سی کہہ ہویا؟ جواب ملیا سویر توں ہورہیا پورا ہو جاوے تے پتہ لگے کیہہ ہویا ہے۔ فلمسٹار ننھا خربوزیاں دے سمے وچ جمیا جدوں کہ اوہناں نوں ہدوانے دے سمے وچ ہونا چاہی دا سی۔ عزیز میاں گوبھی دے موسم وچ جمے سن ایس لئی اوہناں نوں پیار نال '' گوبھی گٹہ'' وی کہیا جاندا سی۔ ننھا ہووے یاں عالم چنہ یاں عزیز میاں اوہناںساریاں نوں رب جنت نصیب کرے ! آمین
