جاپانی وکیل پچونجا ورھیاں دے اک ڈاکیئے نوبرو ناکامورا لئی ریلیاں کڈھ رہے ہین جیہنوں اوہدے باس نے حکم دتا ہے کہ نویں زمانے دے نال چلن لئی اوہ اپنیاں مُچھا مُنوا دیوے۔ اوساکا دی بار ایسوسی ایشن دا آکھنا ہے کہ ڈاکیئے نوں دتا جاون والا ایہہ حکم لوکائی حقاں دے خلاف ہے۔
بار دے اک وکیل کازو دا آکھنا ہے کہ مُچھاں رکھنا ہر کسے دا اپنا ذاتی معاملہ ہوندا ہے تے ایہنوں ذاتی ہی رہن دینا چاہیدا ہے۔
نوبرو ناکامورا نے 1990 وچ مُچھاں رکھیاں سن۔ ورھے 2004ء وچ جدوں جاپانی ڈاک محکمے وچ ترقی لئی نویں اصول دتے گئے تے اودوں توں ای اوہدی اپنے سوپروائزراں نال ٹسل چل پئی۔
ناکامورا دا آکھنا ہے کہ ''میں اپنیاں مُچھاں دی بڑی سانبھ سنبھال کرداں تے میرا وچار ہے کہ میریاں مچھاں کسے گاہک نوں وی بھیڑیاں نہیں لگدیاں۔ میرے کئی دوجے سنگیاں نوں اوہناں دی مرضی دے خلاف مچھاں مُنواؤنیاں پئیاں۔ پر مینوں ایہہ گل قبول نہیں ہے۔'' بوہت سارے جاپانیاں دا وچار ہے کہ داڑھی مُچھاں نہیں منواؤنیاں چاہیدیاں۔
