انسان نوں اشرف المخلوقات کہیا جاندا ہے، ایہہ اصل وچ اشرف Full مخلوقات ہے، ایہدے وچ ہر قسم دا عشر عشیر موجود ہے۔ انسان دے وچ ہر قسم دے جانور پائے جاندے نیں۔ جدوں اوہ بہادری وکھاوندا ہے تے اوہدے اندرلا شیر جاگیا ہوندا ہے ایس لئی ہر اوکڑ وچ اوہنوں کہیا جاندا ہے شیر بن شیر۔ ایہہ سن کے اوہنوں خوشی ہوندی ہے پر شرط ایہہ ہے جو ایس کہانی وچ اوہدے مقابلے وچ کوئی کھوتا نہ ہووے۔ کیوں جو کھوتا جے کھوتے پن تے اتر آوے تے شیر وی بکری بن جاندا ہے۔
بندہ جدوں کم دلی دا وکھالا کرے تے سمجھ لو جو اوہدے وچلی بکری جاگ پئی ہے۔ بیوی جدوں غصے نال ویہری نظر آوے تے ایہدا مطلب ہے جو اوہدے وچ خونخوار شیرنی جاگ پئی ہے۔ ایس لئی خاوند دی بکری نوں اوہدے ساہمنے میں میں کرنا پیندا ہے۔ بندے دے وچلا بھیڑیا جاگ پوے تے اوہ درندگی تے آجاندا ہے۔ بربادی کر دیندا ہے۔ جان مال عزت سب برباد کر دیندا ہے۔ انسان صرف اودوں تیکر انسان ہوندا ہے جدوں تیکر بھلیائی، پیار، محبت، عاجزی ، انکساری تے خاکساری دا وکھالا کردا ہے۔ ایہہ حالت گھٹ لوکاں وچ یاں تھوڑا چر رہندی ہے کیوں جو وچلے جانوراں دی نیندر بوہت کچی ہوندی ہے وار وار اوہناں دی اکھ کھل جاندی ہے تے پھیر ایہہ اپنا جانور پن وکھاون لئی جمپ مار کے باہر آجاندے ہین۔ کئی وار تے انسان انج دی حرکت کر بیہندا ہے کہ عقل حیران رہ جاندی ہے۔
ککڑی نوں ملاں تے ککڑ دوہویں اِکو جئے پسند ہین اوہناں دی اک صفت سانجھی ایہہ وی ہے جو دوہویں بانگ دیندے ہین۔ اک کہندا ہے جاگ جاؤ نماز دا ویلا ہو گیا دوجا کہندا ہے نس جاؤ ملاں جاگ پیا ہے تے ککڑیاں ککڑ دا سنیہا ملدیاں ہی نس پیندیاں پر ملاں دی پہنچ توں نس نہیں سکدیاں کیوں جو ایہہ اُکا اکھان ہی ہے جو ملاں دی دوڑ مسیت تیکر ہوندی ہے۔
کہندے نیں نیم ملاں خطرہ ایمان تے نیم حکیم خطرہ جان ہوندا ہے پر کدی کدی خطرہ بے زبان وی ہوندا اک خبر موجب ٹنڈو باگو دے نیڑے دے پنڈ وچ اک نیم حکیم بے زبان ککڑی تے اپنی حکمت آزماوندا ہویا پھڑیا گیا۔ لگدا ہے ایس حکیم دے وچلا ککڑ جاگ پیا ہونا۔ خبر دی تفصیل وچ لکھیا ہے حکیم نوں اوہدی گوانڈھن نے اُتوں ہی پھڑوایا ہے۔ گوانڈھن کہندی ہے اوہنے حکیم دے گھروں ککڑی دا چیک چیاڑا سنیا تے محلے دے لوک اکٹھے کرلئے محلے دے دو منڈے حکیم دی باہرلی کندھ ٹپ کے گئے تے کمرے وچ جھاتی ماری تے حکیم صاحب ککڑی نال اپنی حکمت آزماون دی ناکام کوشش کر رہے سن۔
پھڑے جاون توں مگروں جدوں حکیم ہوراں نوں ایس بھیڑی حرکت دی پچھ گچھ ہوئی تے اوہناں دسیا جو اوہ ککڑی دے نال کوئی زیادتی کرن دا ارادہ نہیں رکھدے سن سگوں اک نسخہ آزما رہے سن۔ اوہناں دے بیان موجب ایس ککڑی نوں چالی دیہاڑ ٹھوویں تے گڈوئے کھوائے گئے جیس نال اوہدے سارے پر جھڑکے پھیر اُگے تے اوہ مردانہ طاقت لئی اکثیر ہو گئی۔
اگلا مرحلہ اوہی سی جیس نال ایہہ طاقت حکیم دے وچ منتقل ہوونی سی پر ککڑی نے تعاون نہیں کیتا تے محلے والیاں نے الزام لا دتا۔ حکیم نوں اپنی مردانہ طاقت ودھاون دے چکر وچ معصوم ککڑی نوں اینے جان جوکھاں وچ پاون توں چنگا سی جو ایہہ ٹھوویں تے کینچوے ڈائریکٹ آپوں کھا لیندا بوہتے توں بوہتا وال ہی جھڑ دے آپوں پھیر آجاندے ایویں ہی ککڑی نوں وی ککڑاں دی نظر وچ بے عزت کیتا۔ ہر پاسے اوہدے تے پنجے چکے جاون گے جو ایہہ ککڑی ہے جیہڑی نیم حکیم نال پھڑی گئی سی جدوں کہ ایہہ مظلوم ککڑی اپنے پیر چک چک کے دعا منگ رہی ہووے گی جو کاش اگلے جنم وچ اوہ حکیم تے حکیم ککڑی دے روپ وچ پیدا ہووے جو گن گن کے اک اک ٹھوواں تے گڈویا کھوائے وال تے پر اڈن تے طاقت دی منتقلی دے مرحلیاں دا بدلا لیا جاسکے۔
لگدا ہے جو ککڑیاں تے بھیڑا ویلا آیا ہویا ہے۔ دنیا وچ تھاں تھاں ککڑیاں دی شامت آئی ہوئی ہے۔ اوہناں دی عزت تے آبرو کِتے وی محفوظ نہیں۔اک ہور اخباری خبر موجب زیمبیا دے شہر لوسا دا میں اک پنجاہ سالاں دا بندہ ککڑی دے نال ککڑی بازی کردا پھڑیا گیا ہے۔ اوہنوں اوہدی بیوی نے اُتوں ہی پھڑ لیا۔ لگدا ہے جو ایہہ سب کسے بین الاقوامی سازش ہیٹھ ہورہیا ہے۔ ساری دنیا دیاں بیویاں تے گوانڈھناں رل کے مرداں تے ککڑیاں دے خلاف اسکینڈل بنا رہیاں ہین۔ لوساکا وچ ککڑی دی عزت تے ڈاکہ پاون والے نوںمحلے والیاں نے ککڑ بنا کے سارے علاقے وچ پھرایا تے اینا شرمندہ کیتا کہ شام نوں اوہنے گھر اپڑ کے کمرہ بند کر کے خود کشی کر لئی۔ بیوی نے غصے وچ سوکن ککڑی نوں وی مکا دتا تے کھسم دی لوتھ نال چنبڑچنبڑ کے کہندی سی '' تینوں جے ککڑی اینی ہی چنگی لگدی سی تے مینوں ہی ککڑی بنا لیندا۔ اخیر توں وی تے سکول وچ ککڑ بن دا رہیاں''۔
ہوسکدا ہے جو ایس لوساکی نے وی حکیم وانگوں تجربہ کرنا یاں کوئی نسخہ آزماونا چاہیا ہووے پر اسکینڈل بن گیا۔ اُنج ویکھیا جاوے تے ککڑی تے بیوی وچ بڑیاں گلاں سانجھیاں ہوندیاں ہین،ککری وی کڑ کڑ کردی ہے تے گھر والی وی۔ککڑی وی گرم ہوندی ہے گھر والی وی (طبیعت دی)۔ ککڑی ککڑ نوں پاکے خش ہوندی ہے بیوی شوہر نوں ککڑبنا کے۔ ککڑی وی آنڈا دیندی ہے بیوی وی (سویرے ناشتے وچ)۔ککڑی ککڑ نوں اپنے دوالے چکر لگواندی ہے بیوی خاوند نوں چکر چڑھاوندی ہے۔ ککڑی وی چونج لڑاوندی ہے تے گھر والی وی سگوں کدی کدی چونج مار دی وی ہے۔ ککڑی کڑک ہو جاوے تے انڈے توں ترسا دیندی ہے بیوی ہر شے توں ترسا دیندی ہے۔ پھیر شوہر ترسیاں نظراں نال ایدھر اودھر ویکھدا ہے۔ گوانڈھی دی ککڑی تے گوانڈھی دی بیوی وچ گل ہی کجھ ہور ہے۔ ککڑی بھلیکھے نال گوانڈھی دے گھر آجاوے تے گوانڈھی دی بیوی ککڑی نوں لبھدیاں لبھدیاں پچھے پچھے آجاندی ہے۔ ایہہ سلسلہ جاری رہے تے وچلی کندھ ڈگن وچ بوہتا چر نہیں لگدا۔ گوانڈھی دا بڑا حق ہوندا ہے جے گوانڈھن دے کچن دی کھڑکی بالکونی ول کھلدی ہووے تے ایہہ حق بوہتے چنگے طریقے نال ادا ہوسکدا ہے۔ کچن تے بیڈ روم سانجھے وی ہوسکدے ہین۔ '' تو تو نہ رہے میں میں نہ رہوں اک دوجے میں کھو جائیں۔ پر باقی محلے گوانڈھی نال بڑی احتیاط کرنی پیندی ہے نہیں تاں سارے رل کے ککڑ بنا دیندے ہین۔
