سنگا پور توں خبر آئی ہے جو اوتھے اک زنانی '' سنڈی'' نے ٹیکسی وچ نیانہ جمیا جدوں کہٹیکسی پوری سپیڈ وچ ہائی وے تے دوڑ رہی سی تے سواد دی گل ایہہ ہے جو اوہ آپوں وی سفر وچ جمی سی۔ سڑکاں دی جھولی وچ پل کے جوان ہوونا تے سنیا سی پر سڑکاں دی ککھ توں جمنا ایسے خاندان دا وطیرہ ہے۔ لگدا ہے جو ایس ٹبر نوں دوڑ لگیاں ہوئیاں گڈیاں وچ جمن دی عادت جئی ہو گئی ہے جے پن چھان کروائی جاوے تے ہوسکدا ہے جو سنڈی دی ماں وی کسے ٹرک ورک وچ جمی ہووے پاکستان وچ جے ایہہ لوک ہوندے تے اوہناں دے گھر دا کوئی رکشے وچ جم دا تے کوئی ٹانگے وچ۔
سارے محلے وچ اوہناں دے ناں ایسے حوالے نال مشہور ہو جاندے کہ ٹرک چاچا، ٹیکسی آنٹی، ٹانگہ ماما، رکشہ خالو، بس پھپھو، سائیکل تایا، تے انج ایس خاندان نے جے ترقی کر لئی تے گل جہاز تیکر وی اپڑ سکدی ہے۔ جہاز وچ جمن دا سب توں وڈا فیدا ایہہ ہوندا ہے جیس ائیر لائنز وچ نیانہ جم دا ہے ساری زندگی ایسے ائیر لائنز وچ مفت سفر کرسکدا ہے۔ اوہ وکھری گل ہے جو ' مفتہ مسافر' دے ناں توں مشہور ہو جاندا ہے۔ جہاز وچ جمنا کوئی انہو نی گل نہیں ہے پر ایس ویلے جیہڑا واقعہ اسیں تہانوں سناون جا رہے ہاں اوہ واقعی ہی انہونا ہے پہلوں سانوں وی یقین نہیں آیا سی پر جیس بندے نے سنایا اوہ اتبار والا ہے۔
پچھلے دناں وچ اسیں اپنے دوست حنیف مہر دے ساؤنڈ ریکارڈنگ اسٹوڈیو وچ موجود سی اوتھے بین الاقوامی پدھر تے مشہور طبلہ نواز استاد ' تاری' دے نکے بھرا ' جھاری ' نال ملنی ہوئی جیہڑے آپوں وی طبلہ نوازی وچ اپنا مقام رکھدے ہین۔ اوہناں نے دسیا اوہ تے شہنشاہ غزل مہدی حسن دے دوہویں پتر اوہناں دے نال جہاز وچ سفر کر رہے سن۔ جہاز نے ٹیک آف کیتا دوجے پاسے جہاز دے مسافراں نے مڑ مڑ کے اٹھ اٹھ کے ایس بابے ول ویکھیا۔ جیہڑا پوری مہارت نال بھیک منگ رہیا سی۔ ایس ''فضائی فقیر'' نے ہور ہلاون لئی مسافراں نوں ڈرایا '' ویکھو ایس ویلے اسیں نہ زمین تے نہ اسمان تے سگوں فضا وچ آں رب ساریاں نوں سلامت رکھے اپنی اپنی جان دا صدقہ کڈو۔' اک بندے نے بابے نوں ٹوک دیاں ہوئیاں کہیا '' بابا توں کیہہ بس یاں ٹرین سمجھی ہوئی ہے ایتھے وی خیرات منگنا شروع کر دتا۔'' بابے نے جواب دتا '' کیوں رب بس ٹرین وچ ہی ہوندا ہے جہاز وچ نہیں ہوندا۔رب ہر تھاں موجود ہے اوہدے ناں تے کِتے وی منگیا جاسکدا ہے۔ اک مسافر نے ڈالر دا نوٹ بابے نوں دینا چاہیا۔ بابے نے لین توں انکار کردتا تے کہیا '' ہزار ڈالرتوں ودھ خرچ کے ٹکٹ خرید کے خیرات منگن والیاں دے ریٹ وچ کجھ تے فرق ہوونا چاہی دا۔ گھٹو گھٹ اینے پیسے تے ملنے چاہی دے ہین جو ٹکٹ دا خرچہ نکل آوے نہیں تاں بابے دیاں دوائیاں ہور لیٹ ہوسکدیاں ہین۔
جہاز دے عملے نے بابے نوں بھیک منگن توں روکیا تے بابا ہور آکڑ گیا تے کہن لگا جے تسیں جہاز وچ سگریٹ تے پرفیوم ویچ سکدے او تے میں خیرات کیوں نہیں منگ سکدا۔ عملے والیاں نے کہیا کجھ وی ہے تہانوں فلائٹ وچ خیرات منگن دی اجازت نہیں دتی جاسکدی۔ بابے نے کہیا '' کیوں فلائٹ وچ خیرات منگن نال فلائٹ صحیح نہیں رہندی''۔ تے جتھوں تیکر اجازت دا معاملہ ہے تے کیہہ ہائی جیکر جہاز ہائی جیک کرن توں پہلوں تہاڈے کولوں اجازت لیندے ہین کہ مہربانی کر کے سانوں تھوڑی جئی اجازت دے دتی جاوے۔ اچن چیتی ساڈی طبیعت ہائی جیک، ہائی جیک کھیڈن دی ہورہی ہے۔ بابے دے جواب سن کے لگدا سی جو بابا فل تیاری نال آیاسی۔جے جہاز وچ '' نیلام گھر '' ہورہیا ہوندا تے بابا انعام وچ جہاز جت دا ہی جت دا۔ اک ائیر ہوسٹس نے بابے نوں موڈھیاں توں پھڑ کے بٹھاون دی کوشش کیتی تے بابے نے کہیا '' بی بی میرے موڈھیاں تے بھار نہ پاؤ نہیں تاں میرا سامان '' اورویٹ'' ہو جاوے گا تے تسیں اوور ویٹ رتی وی برداشت نہیں کردے''۔اک موٹے مسافر ول اشارہ کردیاں ہوئیاں کہیا '' مسافر اوورویٹ بے شک ہو جاوے سامان اوور ویٹ نہیں ہوون دیندے۔ لگدا ہے ایہہ بابا مسافراں دے ویٹ تے وی روک لوائے گا مسافر دا اپنا بھار اینا ہوونا چاہی دا نہیں تاں دونا ٹکٹ لگے گا۔
اک بس وچ مسافر بوری سنے سوار ہویا۔ کنڈیکٹر آیا اوہنے کہیا بوری نے اینی تھاں گھیری ہوئی ہے اہدا وی ٹکٹ لگے گا۔ مسافر نے کہیا بھرا ایہہ بوری ہے انسان تھوڑا ہے جے لاونا ہی ہے تے میرا پورا تے بوری دا ادھا ٹکٹ لا۔ کنڈیکٹر نے کہیا نہیں بوری دا وی پورا لگے گا۔ مسافر نے بوری نوں لت مار کے کہیا کاکا آجا ٹکٹ پورا لگے گا۔ جہاز وچ خیرات منگن والا بابا پورے فخر نال وار وار ایہو کہہ رہیا سی جو میں ٹکٹ پورا خریدیا ہے ایس لئی مینوں اپنی مجبوری دسن دا پورا حق ہے۔ ایس موقعے تے کجھ مسافراں نے ایہہ ریمارکس وی دتے کہ ایہہ ائیر لائنز والیاں دا اپنا ہی بندہ ہے ائیر لائنز والیاں نے مال ٹھگن دا ایہہ نواں دھندہ شروع کیتا ہے۔ جہاز دے عملے دی وی ایس وچ پتی ہووے گی نہیں تاں ایہہ کیویں ہوسکدا ہے خیرات منگن لئی کوئی اینا مہنگا ٹکٹ خریدے۔
ہن تیکر ایہو ہوونا سی ائیر پورٹ تے اترن توں مگروں فقیر مسافراں نوں گھیردے سن تے اللہ دے ناں تے ڈالر منگدے سن ہن لگدا ہے سفر وچ ہی نیٹ پریکٹس شروع ہو جایا کرے گی تاں جو لتھن تیکر ذہنی تے جیبی طور تے بندہ تیار ہو جاوے۔
