نائجیریا دے محمد بیلو ابوبکر دی عمر چوراسی سال ہے تے اوہناں دیاں بیویاں چھیاسی ہین۔ پر ابوبکر دوجے مرداں نوں اک ہی صلاح دیندے ہین جو اوہ اوہناں دے ویاہواں نوں مثال نہ بناون پر ایہہ وی نہیں جو اوہ اپنے فیصلے تے پچھتاوندے ہین۔ ابوبکر دیاں چھیاسی بیویاں وچوں اک سو ستر نیانے ہین تے اوہ نائجیریا وچ رہندے ہین۔ ابوبکر کہندے ہین جو خدا دی رحمت نال اپنیاں بیویاں دے نال خوشی تے امن نال رہندے ہین۔
ابوبکر نے بی بی سی نوں دسیا '' اک بندے دیاں جے دس بیویاں ہوون تے اوہدا جینا اوکھا ہوجاندا ہے پر رب نے مینوں طاقت دتی ہے جیس کارن میں چھیاسی بیویاں نوں سنبھال رہیاں '۔پچھوکڑ وچ اک ایجیوکشنسٹ تے اسلام نوں کھلارن لئی کم کرن والے ابوبکر کہندے ہین اوہناں دیاں زنانیاں نے بماریاں توں جان چھڈاوان لئی اوہناں دی مشہوری ویکھدیاں ہوئیاں اوہناں نال ویاہ کیتے۔
ابوبکر کہندے ہین میں بیویاںکول نہیں جاندا اوہ میرے کول آوندیاں ہین۔ پر نائجیریا دے اسلامی آگواں نے اوہناں دے دعوے نوں نہ من دیاں ہوئیاں اوہناں دے خاندان نوں اک کلٹ آکھ دتا ہے۔ اسلامی امور دے کئی ماہراں دا کہنا ہے جے کوئی بندہ اپنیاں بیویاں نوں برابر دا حق دے سکدا ہے تے اوہ چار ویاہ کر سکدا ہے۔ پر ابوبکر کہندے ہین جو قرآن وچ چار توں ودھ ویاہ کرن والے بندے لئی کسے طرحاں دی سزادی گل نہیں کیتی گئی۔
ابوبکر دیاں بوہتیاں بیویاں دی عمر پنجی ورہیاں توں وی گھٹ ہے تے اوہناں دی بیویاں نے بی بی سی نوں دسیا اوہ ابوبکر دے کول اپنیاں بماریاں دا علاج کراون دے مقصد نال آئیاں سن تے اوہناں دی مدد نال اوہناں دی بماری ٹھیک ہو گئی۔اوہناں دی اک بیوی نے دسیا ' جیویں ہی میں اوہناں نال ملی میرے سر دی پیڑ جاندی رہی۔ اللہ نے مینوں دسیا جو اوہناں نال ویاہ دا ویلا آگیا۔اللہ دا شکر ہے میرا اوہناں نال ویاہ ہویا۔'بیلو ابوبکر تے اوہناں دیاں بیویاں کوئی نوکری نہیں کردیاں تے اینے وڈے ٹبر دے گزارے لئی اوہناں دے کول کوئی وسیلہ نہیں ۔ اک ویلے دے کھانے لئی اوہناں نوں باراں باراں کلو دے تن تھیلے چاولاں دے ورتے جاندے ہین تے ہر دن دے کھان دا خرچ نو سوپندراں ڈالر ہے۔
ابوبکر ایہہ دسن توں انکار کردے ہین جو اوہناں دے ٹبر دا گزارا کیویں ہوندا ہے۔ اوہ بس کہندے ہین۔' سب اللہ دی مہربانی ہے۔ ' ابوبکر دی اک بیوی دا کہنا ہے جو ابوبکر کدی کدی اپنے نیانیاں نوں بھیک منگ کے لیاون لئی کہندے ہین۔
ابوبکر لوکاں داعلاج کردے ہین پر کدی وی دوائی کھاون لئی نہیں دیندے ہین۔ اوہناں دا کہنا ہے جو اوہ مریض نوں ویکھ کے اوہدی بماری دا پتہ لاوندے ہین تے ایس بماری نوںدور کردیندے ہین۔
پر انج نہیں ہے جو ہمیش ہی علاج کرن وچ کامیاب ہوندے ہین۔ ابوبکر دی اک بیوی حفست بیلو محمد کہندیاں ہین جو اوہناں دیاں دو دھیاں مر چکیاں ہین۔
