اک سجنی نے ویڈیو گھلی ہے جیس وچ سندھ اسمبلی وچ کوئی امن یا بھائیچارے دا اکٹھ ہویا ہے۔ اوس وچ سندھ سمبلی دی ڈپٹی سپیکر تے ہور زنانیاں وی عام پارٹیاں وانگ نچ رہیا ہین۔ ٹیپ گھلن والی لئی ایہہ قیامت دے آون دیاں نشانیاں ہین تے ایس تے ڈکا لگنا چاہیدا۔
سچی گل ہے مینوں آپ نچنا نہیں آوندا پر مینوں نچدے لوک سوہنے لگدے نیں۔ ایس گل دا تے تسیں آپ وی گویڑ لا سکدے ہو جو میری گھر والی نوں نچن آونا تے کیہہ اوہ تے زنانیاں نوں نچدیاں ویکھ کے ٹی وی کولوں دور باورچی خانے جا وڑدی ہے۔ میرے نیانے جدوں نکے سن تے مینوں ناچ ویکھدیاں ویکھ کے میریاں اکھاں بند کردیندے ہوندے سن، ایس لئی میں کنے ہی کلاسیکل تے سوہنے ناچ ویکھن توں وانجیا گیا۔
خیر گل ہو رہی سی سندھ اسمبلی وچ دانیاں پردھانیاں زنانیاں دے ناچ دی۔ اک تے سچی گل ایہہ ہے جو مینوں ویکھ کے بھیڑا نہیں لگا سگوں چنگا لگا جو ساڈے لوک وی تے خاص طور تے زنانیاں وی موج میلہ کر سکدیاں ہین۔ جتھوں تیکر شرافت تے بد معاشی دا تعلق ہے میں تے اجے تیکر ایہو ویکھیا ہے جو بدمعاشیاں کرن والیاں تے والے سارا کم پردیاں وچ کردے ہین، کھلے ڈُھلے فورماں تے موج میلہ کرن والے نہیں۔
زمانہ بدل گیا پر جد اسیں نکے ہوندے ساں تے ساڈے پنڈ وچ کُڑیاں شام نوں کم توں ویہلیاں ہوکے اکٹھیاں ہوندیاں تے ککلی پاوندیاں۔ منُڈے وی لُک چھپ کے ککلی ویکھدے سن۔ پھیر ویاہواں تے کُڑیاں گاؤندیاں تے نچدیاں سن۔ بھلا ہووے جنرل ضیاء تے ٹی وی ریڈیو دا جو پینڈو عورتاں وی ہن ککلی دی کلا بھل گیاں ہین تے ودھ توں ودھ ویاہواں تے ڈھولکی تے فلمی گانے گا لیندیاں ہین۔
خیر ایہہ تے بُڈھیاں والیاں گلاں ہویاں ۔ ویڈیو ویکھ کے دماغ وچ ایہہ سوال وی اُٹھیا جو آخر پیپلز پارٹی دے زمانے وچ عورتاں ایڈیاں پردھان تھاواں تیکر کیوں پہنچدیاں نیں؟ ہاں کجھ عورتاں ہر حکومت وچ وزیر بنندیاں ہین پر اوہناں نوں قومی اسمبلی دا سپیکر صرف پیپلز پارٹی ہی لا سکدی ہے؟ اک تے اوسدی وجہ صاف ہے جو اک پیپلز پارٹی ہی ہے جیس دی اگوائی کئیاں دہاکیاں توں اک عورت بینظیر بھٹو شہید دے ہتھ وچ رہی ہے۔ ایس لئی پیپلز پارٹی لئی کسے عورت نوں سپیکر یا صدر بنا دینا کوئی الوکار (انوکھی) گل نہیں ہے۔ باقی سب پارٹیاں مرداں دی پردھانی وچ چل رہیاں ہین جیس وچ عورتاں دا رول تے ہے پر پیپلز پارٹی جنا نہیں۔
پیپلز پارٹی دا ایہو وسب اوس نوں ہن تیکر لوکاں وچ جیوندا رکھ رہیا سی۔ اوہ ماڑے لوکاں تے ماڑیاں دھراں دی پارٹی سمجھی جاندی سی۔ اک سیاسی لیڈر کہیا کردے سن جو بھٹو دی گھاٹ ایہہ ہے جو اوہدے حمائتی تے ووٹر یاں غریب نیں تے یا عورتاں۔ دوہیں وچاریاں دھراں اوہناں نوں ووٹ تے دے سکدیاں ہین پر اوہناں لئی فوج نال نہیں لڑ سکدیاں۔پر ہن لگدا ہے جو پیپلز پارٹی شاید اوہ نہ رہوے۔
گل کتھوں دی کتھے نکل گئی۔ میں کہنا ایہہ چاہندا ساں جو ویڈیو بھیجن والی بی بی نوں پتہ ہونا چاہیدا ہے جو اسیں سعودی عرب نہیں ہاں جتھے زنانیاں کار وی نہیں چلا سکدیاں۔ اسیں برصغیر دے لوک ہاں جتھے گانا تے نچنا ساڈی ریت دا حصہ رہیا ہے۔ تسیں لکھ فتوی دے لوو مڈھلی تہذیب نوں کوئی بدل نہیں سکدا۔ لکھ اورنگ زیب تے ضیا ء الحق آون اخیر لوک اپنی پرانی ریت ولے ہی پرت آوندے ہین۔ ایسے ریت دا وکھالا چنگا بھیڑا وکھالا سندھ اسمبلی وچ ہو رہیا سی۔
اک ہور گل یاد آگئی۔ میرے اک دوست ملک توں باہر رہندے ہین تے بڑا سفر کردے رہندے ہین ۔ اوہ دسدے ہین جو امریکہ تے یورپ رہن والے پاکستانیاں وچ بہت ہی گھٹ، آٹے وچ نمک دے برابر بندے شراب پیندے ہین۔ عورتاں تے بالکل ہی نہیں۔ ایہہ تناسب شاید پاکستان توں وی گھٹ ہووے جتھے شراب تے ایڈیاں پاندیاں لگیاں ہویاں نیں۔ پاکستان وچ وی جیس پینی ہے اوہ پی لیندا ہے، روکاں لگن دا فائدہ صرف دلیاں نوں ہے جیہڑے ہزار روپئے دی شراب دس ہزار وچ ویچدے ہین۔ سو مذہبی روکاں صرف دلیاں دا بھاء ودھاون توں ودھ کجھ نہیں کردیاں۔
