14اگست نوں قائدِ اعظم دا سنیہا

سن سنتالی وچ بنایا سی میں جیہڑا پاکستان
چویاں ورھیاں دے وچ کیتا جرنیلاں ویران

کون سی میرے پِچھے جیہڑا بن بیٹھا پردھان؟
کون سی جس نے وسدے صوبے کیتے سن گُستان؟

کتھے جے اوہ سُندر بن تے کتھے جے جیسور
جاؤ موڑ لیاؤ میرا پلٹن دا میدان

چوکیدارا چھڈ کے جیہڑے موجاں میلے کردے
اوہ نہیں کُجھ وی لگدے میرے اوہ نیں بے ایمان

آزادی دی یاد 'چ بلدے دیوے وی بُجھ جاندے
جی ایچ کیو دی شاہی وچ ہنیرے دا گھمسان

گوانتانامو بے وچ ساوا جھنڈا رو رو کیہندا
میں ہاں امریکا دی قیدی میں ہاں بندی وان

پاکستان دے ویری، سجن بن بن سازش کردے
دُر فِٹے مونہہ ایہناں دا ایہہ چور سیاستدان

میرے ولوں سب لوکاں نوں آزادی دی ودھائی
ایس دھرتی دے سوہنے لوکی، میری جند تے جان