جیکر کسے دے ویاہ دی پارٹی وچ تہاڈا فون وَجے تے اوہدی رِنگ ٹون ہووے۔۔۔۔۔۔کنڈوم کنڈوم۔۔۔۔ تے کیہہ تسیں نموجھانے ہوجاوو گے، شرما جاوو گے یاں فیر گھابرو گے؟ تے تہاڈے آلے دوالے کھڑے لوکاں دا کیہہ ردعمل ہووے گا؟
جیکر تُسیں ایہہ سوچ رہے ہو کہ لوک انِج دی رِنگ ٹون نوں چنگا نہیں منن گے، تے تُسیں غلط او۔ بوہتے لوکاں نوں ایس توں کوئی ڈر نہیں سگوں اوہ اِنج دی رِنگ ٹونز نوں سمارٹ، سولی تے ذمے وار ویہار دی نشانی مندے ہین۔
بی بی سی ورلڈ سروس ٹرسٹ نے اجیہی رِنگ ٹون تیار کیتی اے جیہڑی ایڈز دے بارے وچ سُوجھ پیدا کرن تے کنڈوم دی ورتوں ودھاون دے مقصد پاروں تیاری دا انگ اے۔
اگست وچ شروع کیتی ایس رِنگ ٹون نوں دو اِی دِناں وچ نیڑے تیڑے ویہہ ہزار لوکاں نے ڈاؤن لوڈ کیتا۔ ایہہ مشہوری بل اینڈ ملنڈا گیٹس فاؤنڈیشن دے مالی ملورتن نال بنائی گئی اے تے ایہنوں بھارت دی نیشنل ایڈز کنٹرول آرگنائزیشن (نیکی) مُلک وچ کنڈوم دی ورتوں نوں ودھاؤن لئی ورتن گے۔
جو سمجھے اوہی سکندر
ایس مشہوری مہم دے مُکھ شعر نیں جو سمجھے اوہی سکندر
بی بی سی ورلڈ سروس ٹرسٹ دی کریٹیو ڈائریکٹر رادھا رانی مستری دا کہنا جے " لوکاں لئی رِنگ ٹون ذاتی پسند شخصیت بننے دا ذریعہ بندا جا رہیا ہے۔ سانوں جاپیا کہ کنڈوم ورتن والے لوکاں نوں سمجھدار وِکھاون دا ایہہ سبھ توں بہترین ذریعہ اے۔ ایس رِنگ ٹون نوں ورتن نال لوکاں دی کنڈوم بارے اجھک وی مُک جاوے گی۔"
ایس مشہوری ہیٹھ رِنگ ٹون نوں ویب سائٹ توں ڈاؤن لوڈ کیتا جاسکدا جے، آن لائن کھیڈ کھیڈے جاسکدے نیں تے مشہوری ٹی وی تے ریڈیو راہیں ویکھ جاسکدی اے۔
