نصیر رانا : لفافیاں، لوٹیاں دے مگروں طوطیاں دی سیاست
نصیر رانا
August 31st, 2008
پچھلے ہفتے اک سوادی خبر نظر وچوں لنگھی جو میاں نواز شریف عوامی رابطیاں دے سلسلے وچ اپڑے تے ساری جلسہ گاہ نواز شریف دے حق وچ لگن والے نعریاں نال گونج اُٹھی۔ پرسوادی گل ایہہ سی جو جلسے وچ شریک اک بابا جی اپنے نال اک پالتو طوطا وی لیائے ہوئے سن تے ایہہ طوطا باقاعدہ نواز شریف دے حق وچ تے پرویز مشرف دے خلاف نعرے مار رہیا سی۔
ایس طوطے نے '' گومشرف گو'' تے وزیر اعظم نواز شریف '' دی مسلسل رٹ لائی ہوئی سی۔ لگدا ہے صدر مشرف نے صرف طوطے دی گل منی ہے ایس طوطے نوں نواز شریف دے ساہمنے وی لیاندا گیا۔ طوطے نے اوہناں دے ساہمنے ہور جاندار نعرے مارے۔ ایس مسلم لیگی طوطے نوں انعام وی دتا گیا ۔ سنیا ہے جو کسے سیانے نے صلاح دتی ہے جو انج دے سو طوطے تیار کیتے جاون تے سیاسی جلسیاں وچ ورتے جاون۔
ہن تیکر لفافیاں تے لوٹیاں دی سیاست چل رہی سی لگدا ہے ہن طوطیاں دی سیاست وی چلے گی۔ جدوں طوطا توپ چلا سکدا ہے تے سیاست کیوں نہیں۔ سگوں ہو سکے تے طوطیاں نوں پلیٹ دی بجائے سیاسی پلیٹ فارم تے '' چوری پائی جاوے'' تے الیکشن لڑوا کے اسمبلی دا ممبر بنوایا جاوے۔ اسمبلی ممبر وی تے کئی وار '' طوطا چشمی '' دا وکھالا کردے ہین۔ گھٹو گھٹ طوطا تے '' لیڈر چشمی نہیں کرے گا کیوں کہ طوطے دی اکھ وچ پھیر وی تھوڑا بوہت لحاظ ہوندا ہے۔
اک امیر بندہ سی۔ اوہدے توں اک مجبور بندہ مدد منگن آیا تے اُس امیر بندے نے بھری محفل وچ کہیا میں تیری مدد ضرور کراں گا پر میری اک شرط ہے میری اک اکھ پتھر دی ہے پر میرے توں سوا کوئی نہیں جاندا کہ کیہڑی اکھ پتھر دی ہے جے توں دس دیویں کہ کیہڑی اکھ پتھر دی ہے تے میں تیری مدد ضرور کراں گا نہیں تے معذرت۔
ٖغریب بندہ وچارہ امتحان وچ پے گیا ۔ اوہنے واہوا سوچیا تے دوہواں اکھاں وچ ڈب کے ابھرن توں مگروں کہیا تہاڈی سجی اکھ پتھر دی ہے۔ امیر بندہ ایہہ سن دیاں ہی بھڑک کے پیا کہ جواب تے تیرا بالکل ٹھیک ہے پر تینوں کیویں پتہ لگیا جو میری سجی اکھ پتھر دی ہے۔ غریب بندے نے ڈر دیاں ڈردیاں جواب دتا جناب مینوں ایسے اکھ وچ تھوڑا جیا رحم نظر آیا سی۔
ایہہ حقیقت ہے جو اج تیکر انسان نوں سب توں بوہتا نقصان انسان نے ہی اپڑایا ہے۔ اہناںساریاں زیادتیاں توں مگروں وی انسان اشرف Full مخلوقات اکھواندا ہے تے ایسے ٹائٹل نوں نال لائے ہرل ہرل کردا پھردا ہے۔ ہن پھیر سیاست وچ '' گھڑ بازاری '' جاری ہے۔ گھڑ بازاری ، ہارس ٹریڈنگ دا اردو ترجمہ ہے یعنی سیاسی گھوڑیاں دا بازار لگیا ہویا ہے۔ مصر وچ حسیناں دا بازار لگدا سی ساڈے ایتھے انھیاں دا بازار لگدا ہے جنہے چنگا بھاء لایا اوہدے ول دے ہو گئے تے دوجے بھاء کھان لگے۔
جدوں توں ملک بنیاہے اودوں توں ایہہ بھاء تاء جاری ہے۔ بوہتا تاء آوندا ہے تے فوج آجاندی ہے۔ فوج جدوں موج لے چکدی ہے تے پھیر لنگڑیاں لولیاں حکومتاں قائم ہوجاندیاں ہین جیہڑیاں بوہتا دن قائم نہیں رہ سکدیاں سگوں قائم تے دور دی گل ہے ٹھیک طرحاں ٹائم وی پورا نہیں کرسکدیاں۔ حکومتاں بدلدیاں رہندیاں ہین پر چہرے اوہی رہندے ہین کدی ایس روپ وچ کدی اوس روپ وچ۔
ہم قوم کے لیڈر ہیں ہمیں ناموں سے نہ پہچان کل اور کسی نام سے آجائیں گے ہم لوگ
جیویں ایتھے امریکہ وچ وڈے وڈے پیدا گیر بنک کریسی فائل کر کے لما مال ڈکار جاندے ہین تے پھیر '' ہاجمولا '' کھا کے پھیر دستر خوان وچھا لیندے ہین یعنی کاروبار اوہی رہندا ہے صرف ناں بدل دتا جاندا ہے۔ ساڈے ایتھے سیاست وچ وفاداریاں انج بدل دتیاں جاندیاں ہین جیویں سیالاں وچ نیانیاں دے '' ڈائپر ''۔ڈائپر تے پھیر وی اک بدلی دے مگروں جان چھڈ جاندا ہے پر ساڈے سیاسی لیڈر اوہ ڈائپر ہین جیہڑے وار وار دھل دھل کے ورتیا جاندا رہندا ہے۔اہناں ڈائپراں وچ بو وی '' کاک ٹیل '' ہوندی ہے پتہ ہی نہیں لگدا کہ کس دور دی کنی فیصد بو شامل ہے
کو بہ کو پھیل گئی بدبو لیڈرائی کی اس نے جمہوریت کی کچھ ایسی پذیرائی کی
