زنانیاں لئی کماؤندے گنجے ہو گئے: رکن دے بیان تے سندھ اسمبلی وچ ہاسہ
وچار ڈیسک
September 5th, 2008
سندھ اسمبلی وچ جمعرات دے دیہاڑے اوس ویلے ہاسہ پئے گیا جدوں اپوزیشن دی زنانی رکن نصرت سحر عباسی دی زنانیاں نوں نوکریاں وچ 33 فیصد کوٹہ دیون بارے قرارداد تے خیر پور توں پیپلز پارٹی دے رکن سید بچل نے اپنے وچار سانجھے کیتے۔
سید بچل شاہ نے آکھیا کہ ایشیاء وچ مرد زنانیاں دا بوہت آدر کردے ہین۔ اوہناں اپنے سر تے ہتھ پھیردیاں آکھیا کہ زنانیاں لئی کماؤندیاں اسیں گنجے ہو گئے آں۔ ایس گل تے ایوان وچ ہاسہ پئے گیا۔ اگے گل کردیاں اوہناں آکھیا کہ جدوں نکے ہوندے ساں اودوں اماں ''بُجے'' (لعنت) دیندی سی، ہُن گھر والی دیندی اے۔ ایس تے وی ایوان وچ ہاسہ پیا رہیا۔
سینئر وزیر پیر مظہر الحق نے آکھیا کہ بچل شاہ ساڈے لئی آدر جوگ نیں پر شاہ صاحب گھر دیاں گلاں ایتھے نہ کرن۔ سید بچل شاہ نے آکھیا کہ میرا گھر پیر صاحب دے گھر دے نیڑے ہے تے سانوں اوہناں دا وی پتہ اے۔ ایس گل تے وی بڑا ہاسہ پیا۔
