پرانے ویلیاں دیاں شہزادیاں وی عجیب سائکو ہوندیاں سن۔اپنے ویاہ دیاں انوکھیاں انوکھیاں شرطاں رکھدیاں ہوندیاں سن کہ جیہڑا بندہ فلاں فلاں کر کے وکھاوے گا اوہ اوہدے نال ویاہ کرے گی تے پھیر کئی سر پھرے ایس لام تے شہید ہوون نکل پیندے سن تے شہزادی حاصل کرن دے چکر وچ اپنی جان گوا بیہندے سن۔ پر کوئی نہ کوئی غازیت دا درجہ وی پاوندا سی تے شہزادی دی ڈولی وچ بیہن وچ کامیاب ہو جاندا سی۔
انج ہی ویاہوں پہلوں بربادی دی شوقین اک سوہنی شہزادی نے اعلان کیتا ''جیہڑا بندہ اوہدیاں تن شرطاں پوریاں کرے گا اوہ اوہدے نال ویاہ کرے گی۔ پہلی شرط ایہہ کے کھلوتے کھلوتے پورا شراب دا مٹکا غٹا غٹ پینا ہووے گا۔ دوجی شرط ایہہ کہ بند کمرے وچ جا کے اندر موجود شیر دیاں اکھاں کڈھ کے لیاونا ہے تے تیجی شرط بوہت ہی انوکھی کہ اخیر وچ شہزادی نال زبردستی کرنی ہے۔ تیجی شرط توں لگدا ہے کہ شہزادی امریکن مائنڈڈ سی کیوں کہ ایتھوں دیاں گوریاں وائلڈ وائلڈ کھیڈنا بوہت پسند کردیاں ہین۔ کجھ بیلٹ نال پھینٹی کھاون، کجھ گالھاں کھاون، کجھ وال پٹوان تے کجھ ہتھ پیر بنھوا کے حد توں لنگھ جاون نوں ہی انسانیت دی معراج سمجھدیاں ہین۔
انج ہی ایس امریکن سبھاء دی شہزادی دیاں تناں شرطاں وچوں تیجی شرط پوری کرن نوں تے ہر بندہ تیار سی پر پہلیاں دو شرطاں اینیاں اوکھیاں سن کہ شراب دے دریا توں لنگھ کے تے شیر دے مونہہ توں بچ کے ہی کوئی امریش پوری بنن دی چاہ پوری کرسکدا سی۔ کئی اک نے ٹرائی ماری کوئی شراب دا مٹکا ہی اپنے مٹکے وچ پاون وچ کامیاب نہ ہوسکیا۔ جے کسے نے ایس شرط نوں پورا کر وی لیا تے شیر دیاں اکھاں تے اپنے ارمان کڈھن توں پہلوں ہی شیر دے ہتھوں اپنیاں آندراں کڈھوا بیٹھا۔
اک سر پھریا رانگھڑ وی لائن وچ لگیا ہویا سی جدوں اوہدی واری آئی تے شراب دا مٹکا چک کے غٹاغٹ پی کے ڈکار مار کے شیر دے کمرے وچ چلا گیا واہوا چر تیکر اندروں رانگھڑ دے دھاڑن تے شیر دیاں چیکاں دیاں آوازاں آوندیاں رہیاں اخیر فخر نال سینہ چوڑا کر کے جیوندا جاگدا اوہ باہر آگیا تے بڑھک مار کے بولیا میں دو شرطاں پوریاں کردتیاں ہین ہن چھیتی نال دسو کہ اوہ شہزادی کتھے ہے جیہدیاں اکھاں کڈھنیاں ہین۔
ویاہ ہرمرد عورت دا مڈھلا حق ہے تے پھیر ایسے مڈھ تے رہندی عمارت بن دی ہے۔ اوہ وکھری گل کہ کِتے اہناں سفنیاں دی سوہنی تعبیر ہوندی ہے تے کِتے بوہت بھیڑی تصویر ہوندی ہے۔ پر ویاہ تے پیار غیر مشروط ہوندا ہے پیار دا تت ویاہ تے ویاہ دا تت مسلسل بربادی ہے پھیر ایہدے وچ پُٹھیاں سدھیاں شرطاں دا کیہہ کم ؟ کرنی ہے تے کھل کے کھیڈو نہیں کرنی تے جواب دیو تاں جو بندہ کِتے ہور ٹرائی مارے۔
گذریل ہندوستانی وزیر اعظم اٹل بہاری واجپائی دے پاکستان دے دورے وچکار کشمیر دا ذکر بڑے زوراں تے رہیا ہر بندے نے اپنے اپنے انداز نال کشمیر دی اہمیت نوں ظاہر کیتا پر جیویں کشمیر دے حق وچ آپ ہتیا دا اعلان اک شاعرہ نے کیتا اوہ سلاہن جوگ ہے۔ اوہناں نے اعلان کیتا جے اٹل بہاری واجپائی ایس دعوے توں ٹل جاون کہ کشمیر ہندوستان دا اٹوٹ انگ ہے تے اوہ آپوں اپنا انگ انگ واجپائی تے وار دیون گئیاں۔
کئی اخباراں نے وکھرے وکھرے انداز وچ اوہناں دے واجپائی دے لقمہ بنن دے ایس اعلان نوں پیش کیتا۔ کسے نے لکھیا کشمیر دا مسئلہ حل ہوجاندا تے اوہ ہمیش ہمیش لئی واجپائی دی ہو جاوے گی۔ کسے نے لکھیا کشمیر دی آزادی دے نال مشروط ویاہ دی پیشکش۔ اُنج کشمیر دے نال محبت دے ایس جذبے تے ایس شاعرہ نوں سلاہیا جاناچاہی دا کہ کشمیر دے بدلے شاعرہ نے اپنا سارا دیوان دیون دا اعلان کیتا۔ایہہ شاعرہ پی ایچ ڈی سی۔
PHD دا تعلیمی اتبار نال جو بندا ہے اوہ تے ساریاں نوں پتہ ہے پر تاریخی لحاظ نال جو بنن لگا سی اوہ سی p نال پیار h نال ہندو تے d نال دا یعنی '' پیار ہندو دا'' جیس دا وکھالا کھل کے ایس بی بی نے کر وی دتا۔ لگدا ہے شاعرہ یاں تے انھی سی یاں پھیر جنتی سی کہ اکھیں ویکھ کے مکھی کھا رہیاں سن تے کوئی ہرکھ نہیں سگوں فخر نال کشمیر دی محبت وچ قربانی دے رہیاں سن تے پوری قوم تے احسان کر رہیاں سن۔ منیا کہ شاعرہ کنواری کڑی تے واجپائی کوارہ منڈا سن پر اوہناں دی گنتی اوہناں کواریاں وچ ہوندی سی جیہڑے پئے پئے کوارے رہ جاندے ہین تے جیہدے تے کوئی وی جوان کوارہ کہہ سکدا ہے
نہ تواچھا نہ منہ اچھا نہ تیری لنگی اچھی تیری کنوارگی سےتومیری آوارگی اچھی
اللہ جانے کہ شاعرہ نے واجپائی وچ کیہہ ویکھ لیا کہ کشمیر دے بہانے '' دل کے ارماں آنسوؤں میں بہہ گئے '' جدوں کہ اخبار وچ چھپی تصویر وچ تے چنگی بھلی سوہنی زنانی سی پر ایہہ گل سمجھ وچ نہیں آئی کہ اک سوہنی زنانی اپنی مہورت واجپائی نال کیوں کروانا چاہندی سی جدوں کہ کنوارے منڈے تے سیاسی کنوارے تے ساڈے اپنے ملک وچ بتھیرے ہین۔ جے دیسی نہیں تے ولایتی چھڑے لبھ جاندے ہین۔ برطانوی شہریت وی جیب وچ رکھی ہوئی ہے ۔ سواد نال اوہناں دے نال رہن تے پردیسیاں دی سیوا کرن۔ ہوسکدا ہے اوہناں دی ایس قربانی نال مسئلہ کشمیر توں پہلوں کوئی ہور مسئلہ حل ہو جاوے۔ پنجابی مہاجر بھائی بھائی نہ سہی پنجابی مہاجر بھابھی دولہا بھائی ہی سہی کوئی تے نیڑتا ہوونی چاہی دی ہے۔ گھٹوگھٹ ایہہ سوہنا تحفہ کسے اپنے نوں تے ملے گا۔
ایہہ شاعرہ واجپائی نال ویاہ کر کے کیہہ کردی اوہنوں تے خاوند تے سس وچ تمیز کرنا اوکھا ہوجاندا کیوں جو واجپائی دا تے اپنا مونہہ سساں ورگا ہے تے سس وی انج دی جیہدے مونہہ وچ دند نہ ہوون۔ واجپائی نوں جے غور نال ویکھیا جاوے تے اوہ گل کردیاں ہوئیاں لگدے سن جیویں '' کینڈی '' چوس رہے ہوون۔
جے خیر سگالی تے آون والے غیر ملکی پردھاناں دیاں عادتاں وگاڑ دتیاں جاندیاں تے بڑا وخت پے جاندا۔ ہر آون والا کہہ سکدا سی واجپائی نوں تحفہ دتا اسیں کیہڑی تہاڈی بکری چوری کیتی آ سانوں وی دیو ۔ اسیں اینے تحفے کتھوں دیندے ساڈے ایتھے تے ایدھی دے آکھن تے وی بڑے اوکھے عطیے کٹھے ہوندے ہین تے پھیر ایدھی والے تحفیاں نال غیر ملکی پردھاناں دی تسلی وی نہیں ہووے گی تے جے اسیں شاعرہ ورگے تحفے تیار وی کر لئے تے پھیر سارے غیر ملکی پردھاناں نوں ساڈے ملک دا دورہ کرن دے دورے وار وار پیندے۔
آئےہیں تیرے دیس توکچھ لےکےجائیں گے دوایک شادیاں ہم بھی کرکے جائیں گے
شاعرہ دے واجپائی دے معاملے وچ کھلے دل تے پاکستان دے کجھ ملواٹیاں نے تنقید کردیاں ہوئیاں فتویٰ دتا سی جو شاعرہ مرتد ہو گئی ہے دائرہ اسلام توں باہر ہو گئی ہے تے مسلمان ہوندیاں ہوئیاں اک ہندو نال ویاہ دی چاہ کرنا بوہت وڈا گناہ ہے۔
شاعرہ نے اہناں فتویاں تے کوئی تبصرہ نہیں کیتا تے اوہ اٹل واجپائی دے فیصلے تے اُنج دیاں اُنج اٹل رہیاں لگدا ہے اوہناں دا فتوے والا کن خراب سی یاں پھیر دوہواں کناں وچ واجپائی دی '' واج '' گونج رہی سی ایس لئی کسے ہور دی '' واج '' سنن دی گنجائش نہیں سی۔
دوجے پاسے واجپائی نے جدوں ایہہ خبر سنی تے پوپلے مونہہ نال انج مسکائے جیویں اوہناں دے '' لاٹو '' لگ گئے ہوون۔پہلوں تے اوہ پاکستان بس وچ بیہہ کے آئے سن اگے توں گھوڑے تے بیہہ کے آون دے سفنے ویکھ رہے ہوون گے۔ '' بس ڈپلومیسی '' انج دی سانوں مہنگی پئی کہ کدی سوچیا نہ سی بس دے آون تے سرکاری ٹولہ تے خوش آمدید کہہ رہیا ہوندا جدوں کہ باقی سارا ملک ' بس ڈپلومیسی '' تے ایہو کہہ رہیا ہوندا کہ
