ایمانداری: 61 ورھیاں مگروں کتاب لائبریری وچ پرت آئی
وچار ڈیسک
November 2nd, 2008
ہالینڈ دے تلسا ہائی سکول دی لائبریری وچوں 1947 وچ لئی گئی اک کتاب 61 ورھیاں مگروں واپس لائبریری اپڑ گئی تے نال جرمانے دے طور تے ڈھائی سو ڈالر دا اک چیک وی سی۔ ہالینڈ ہال سکول دی لائبریرین بیٹی نیور نے دسیا کہ ایہہ کتاب کسے مارتھا میک کیب جیرٹ ناں دی زنانی نے لائبریری نوں گھلی ہے۔
وینس دی رہن والی مسز جیرٹ اوس ویلے مارتھا میک کیب سکول وچ پڑھدی سی جدوں 61 ورھے پہلوں اوہنے لائبریری وچوں ایہہ کتاب لئی سی۔ اوس ویلے ایہہ کڑیاں دا اک سکول ہوندا سی۔ گھر دی صفائی کردیاں اوہنوں ایہہ کتاب لبھی سی۔ اوہدا آکھنا ہے کہ اوہنوں نہیں پتہ کہ ایہہ کتاب لائبریری نے آپ ای سُٹ دتی سی، یاں اوہدی لاطینی دی استانی نے دتی سی یاں فیر بھلیکھے نال ای اوہدے کول رہ گئی سی۔
مسز جیرٹ دا آکھنا ہے کہ اوہنے ایہہ کتاب سکول دی لائبریری نوں صرف ایس لئی موڑی ہے کیوں جو اوہنوں ایس سکول وچ لئی تعلیم دی قدر ہے۔
سکول دے پربندھیاں دا آکھنا ہے کہ اوہناں نوں ہن ایہہ سمجھ نہیں آ رہیا کہ اوہ جرمانے دے طور تے گھلے گئے ایس ڈھائی سو ڈالر دے چیک دا کیہ کرن کیوں جو کتاباں دے جرمانے وچ ایہدا کوئی کھاتہ نہیں ہے۔ اوہناں دا آکھنا ہے ہو سکدا اے کہ ایہہ پیسہ کسے پڑھیار دے وظیفے لئی ورتیا جاوے۔
