اک سعودی شہری نے سعودی عرب دے اک گمنام ساحلی پنڈ وچ اک چڑیمار دے پھڑے ہوئے باز دی قیمت پنج لکھ ریال یعنی سٹھ لکھ روپئے دتی۔ یانبو دے پکھواں دے تاجر سلیم علی سناتی الجوہانی نے اک وڈی رقم قیمت دے طور تے ایس لئی دتی کیوں جو ایہہ باز اُچیچا اپنی شکاری خوبیاں لئی مشہور ہے۔ اوہدے پراں دا انداز بڑے عمدہ ترسیمی نمونے دا ہے۔ عرب ریس دے گھوڑیاں ،اوٹھاں تے انوکھے نظر آون والے دمشقی بکریاں نوں وڈیاں رقماں بھر کے خریدن لئی مشہور ہین۔ پر اک باز دا اینی وڈی رقم دے بدلے وکنا ایہہ پہلا واقعہ ہے۔ اصل وچ دنیا دے اک تہائی باز پالن والے خلیجی ملکاں دے عرب شہری ہین۔ روزنامہ المدی نے باز دے دکن دی خبر سٹھ لکھ روپیاں وچ چھاپی ہے۔
