پچھلے دناں وچ ساڈے اک بیلی دا اپنی گھر والی نال پھڈا ہو گیا بیلی دے مونہوں نکل گیا جو '' فلمسٹار '' میرا '' میرے نال ستی آئی ہے۔ '' ۔ پھیر لکھ واری گل کھولی کہ جیہڑے جہاز وچ میں آیاں اوہدے وچ میرا وی آئی ہے راہ وچ میں وی کئی وار ستا رہیا تے '' میرا '' وی سگوں سارے جہاز دے کئی مسافر وی ستے جاگدے آئے ہین پر بیلی دی گھر والی نے اپنے خاوند دی گل پھڑ لئی '' میرا '' اوہدے نال ستی ہوئی آئی ہے ۔''
اسیں وی بتھیرا سمجھایا جو سون دا مطلب کٹھے سونا نہیں سگوں اوہ وکھری سیٹ تے سی تے ایہہ وکھری تے۔ بیلی دی گھر والی کہن لگی '' تہانوں نہیں پتہ ایہہ کہندے کجھ نیں تے کردے کجھ ''۔ اک واری اپنی گوانڈھن ولوں وی انج گل کر چکے نیں '' ساڈی گوانڈھن میرے نال نہاوندی ہے ''۔ جدوں میں رولا پایا تے کہیا کہ گوانڈھن تے مینوں پہلوں ہی شک سی تے لگے صفائیاں پیش کرن کہ اوہناں دا مطلب ایہہ ہے جو جدوں اوہ نہاون جاندے ہین تے ٹھنڈا پانی آون لگدا ہے ایہدے نال لگدا ہے جو تھلے کوئی شاور ورت رہیا ہے۔ اک واری گوانڈھن دے بھرا نوں کہندے نیں '' تہاڈی بھین ساڈے تھلے رہندی ہے ''۔ جھیڑا ہوندیاں ہوندیاں رہ گیا۔ جے میں گل نہ کھولدی کہ اسیں اُتلی منزل تے رہنے آں تے اوہناں دی بھین تھلے والی منزل تے رہندی ہے ایسے حوالے نال اوہناں کہیا کہ تہاڈی بھین ساڈے تھلے رہندی ہے۔
لفظاں دا ہیر پھیر کدی کدی معنی بدل دیندا ہے۔ جیویں مشہور گیت ہے '' ساون کے بادلو '' ایہدے تے اک صاحب فرماون لگے کہ '' ساون کے بعد لو '' کیوں ساون توں پہلوں کیوں نہ لوو۔ انج ہی پنجابی وچ اک نے دوجے نوں پچھیا کی حال اے ؟ جواب ملیا '' ماں دی دعا '' دوجے نے کہیا '' پہلوں توں دوا ''۔
اک مریض ڈاکٹر دے کول گیا آکھن لگا '' ڈاکٹر صاحب میرا گل بوہت خراب رہندا اے ذرا چیک کریو ''۔ ڈاکٹر نے گل وچ لائٹ مار کے چیک کیتا تے مریض نوں آکھیا '' چٹنی چھڈ دیو''۔ مریض نے گھر جا کے گھر والی دی پھینٹی لا دتی کہ توں ہر گل دوجیاں نوں دس دینی آں۔ سلمیٰ آغا دا مشہور گیت
اک بار ملو ہم سے سو بار ملیں گے ہم جیسے کہاں تم کو طلب گار ملیں گے
ایہدے تے اک بڈھے نے فتویٰ لا دتا کہ ایس گیت وچ Gays دا وار وار ذکر آیا ہے۔ '' سو بار ملیں Gay، طلبگار ملیں Gay '' اوہناں دی تے ہر تان '' گے '' تے جا کے ٹٹ رہی ہے اج '' گیز '' لئی گیت گایا کل '' لزبین '' لئی وی گاون گئیاں۔ ایہہ تے وسیب وگاڑ رہیاں ہین۔ مرد عورت وچکار نفرت دیاں کندھاں کھلیار رہیاں ہین تے پٹھے چکر وچ پا رہیاں ہین۔
صلاح ایہہ ہے جو سلمیٰ آغا گیت نوں پھیر ریکارڈ کروان تے '' گے '' دی گل کھولن کہ ایہہ '' گے '' انگریزی والا ہے یاں اردو والا مثال دے طور تے انج گا سکدیاں ہین
اک بار ملو ہم سے سو بار ملیں گے ( اردو والا ''گے '') ہم جیسے کہاں تم کو طلبگار ملیں گے (اردو والا '' گے '')
اصل وچ ایہہ سارا سمجھ دا چکر ہے دعا تے دغا تے محرم تے مجرم والی گل ہے ایہدے وچ تے پھیر وی نقطے دا مسئلہ ہے پر کدی کدی بے نقط ہی مسئلہ پھس جاندا ہے۔
پچھلے دناں وچ ساڈے بیلی ٹونی نے فون کیتا کہ ڈولی دی ڈیتھ ہو گئی ہے۔ اسیں ہرکھ کردیاں ہوئیاں پچھیا کیہہ بمار سی ؟ کہن لگے یار ساریاں نوں پتہ ہے تہانوں نہیں پتہ اوہ کئی دناں توں بمار سی تے ڈاکٹر اوہنوں بچاون دی کوشش کر رہے سن۔ اینے چر وچ لائن کٹ گئی۔ اسیں کئی وار آپوں نمبر ملاون دی کوشش کیتی پر نہ ملیا۔ سیل فون دی ایہہ وڈی پرابلم ہے کہ کئی علاقیاں وچ ایہدا سگنل نہیں ملدا۔بہرحال سانوں ڈولی دے مرن دا بوہت ہرکھ ہویا۔ مسٹر ڈیوڈ دے گھر واہوا چراں توں اولاد نہیں سی اخیر اوہناں ڈولی نوں ایڈوپٹ کر لیا سی۔ ڈولی بڑی پیاری بچی سی تے ہن تے اینی وڈی ہو گئی سی کہ وڈیاں نوں وی پیاری لگن لگی سی۔ ساڈے بیلی ٹونی دا ڈولی دے گھر کجھ بوہتا ہی آنا جانا سی ایس لئی سانوں کجھ بوہتا ہرکھ ہویا کہ ڈولی ساڈے بیلی دی ہم جولی سی۔
ٹو دے نہ سہی ون وے ہی سہی۔ اسیں چھیتی چھیتی پٹھا سدھا تیار ہوئے تے ڈولی دے گھر اپڑے۔ باہر واہوا گڈیاں کھڑیاں سی۔ دل نوں یقین ہو گیا کہ جو سنیا ہے اوہ واقعی سچ ہے۔ رون والا مونہہ بنایا۔ سر تے رومال بنھ کے بوہے دی ٹلی وجائی۔ بوہا کھولیا تے اندر دا منظر ہی کجھ ہور سی۔ مسٹر تے مسز ڈیوڈ نے بڑا خوش ہو کے جی آیاں نوں آکھیا پتہ لگیا ڈولی دی سالگرہ منائی جارہی ہے۔ اسیں اپنے آپ نوں سنبھالیا مونہہ توں سنجیدگی دا ماسک لایا تے اصلی وچ پاء ڈیڈھ پاء خوشی دیاں پھلجڑیاں بھریاں تے اوہناں نوں شکایت کیتی کہ '' تسیں پہلوں دسیا ہی نہیں '' اوہ آکھن لگے اصل وچ ایہہ اک سرپرائز پارٹی سی ڈولی لئی وی تے پروہنیاں لئی وی ۔ ساڈے ذہن وچ حالی تیکر ڈولی دی موت والی خبر پھسی ہوئی سی۔ اینے وچ ٹونی وی مسکاوندے ہوئے نظر آگئے۔ سانوں بڑا غصہ آیا دھروندیاں ہوئیاں اوہنوں اک پاسے کھڑیا تے کہیا یار مخول دا ایہہ کیہڑا طریقہ ہے جو ڈولی مر گئی تے ایتھے ڈولی دی سالگرہ منائی جارہی ہے۔'' ٹونی چپ ہو گیا پھیر ہسن لگ پیا تے بولیا کہ اچھا توں ایہہ سمجھیا کہ میں ایس ڈولی دا ذکر کر رہیاں ''۔ اسیں وگڑ دیاں ہوئیاں کہیا تے ہور کس ڈولی دا ذکر کر رہیا سی ''۔
ٹونی نے زور نال ہس دیاں ہوئیاں کہیا یار میں اُس بھیڈ دی موت دی خبر سنائی سی جیہڑی کلوننگ کیتی گئی سی تے اوہدا ناں ڈولی سی ''۔
اسیں سوچیا کہ جے واقعی انج ہویا ہے تے ہرکھ ہے کیوں جو ایس ڈولی دا وی کوئی نہ کوئی ٹونی ضرور ہووے گا جیہڑا اداس ہووے گا۔ ڈولی دے ہجر وچ رو رہیا ہووے گا۔ سائنس تے میڈیکل دی ترقی دا نمونہ ڈولی دا جانا واقعی اک نقصان ہے۔ مغلیہ دور ہوندا تے ' ہرن مینار '' وانگوں '' بھیڈ مینار '' وی بنایا جاندا۔ ایہہ مینار '' مینار ڈولی '' اکھواندا۔ ہر سال ایتھے بھیڈاں دا میلا لگدا۔ بھیڈاں دی دھمال ہوندی پر ایہدے وچ وی کالیاں بھیڈاں چور بوہے توں وڑھ جاندیاں جیہڑیاں ساڈے ہر گروپ وچ موجود نیں۔
