جدوں تیکر جوان رہی قصائی آپوں گھر گوشت اپڑاون آوندا سی

اک میراثی اپنی قسمت نوں کوس رہیا سی تے اپنے وال کھو رہیا سی پچھیا گیاانج کیوں کر رہیاں تے کہن لگا ساڈی بھین اینی سوہنی ہے پورے علاقے وچ اوہدی مثال نہیں لبھدی۔ پر پھیر وی ساڈے گھر وچ دال پک دی ہے جدوں کہ ساڈی ماں اینی سوہنی وی نہیں سی پر جدوں تیکرجوان رہی قصائی آپوں گوشت دیون ساڈے آوندا سی تے کسے نوں کنو کن خبر نہیں ہوندی سی۔

ہندوستان دا بالی ووڈ مٹیاراں نال بھریا ہویا ہے پر پھیر وی اوتھے غربت اک پیر تے کھلوتی ہوئی ہے۔ بالی ووڈ وچ بنن والی اجکل دیاں فلماں وچ کپڑیاں دا خرچہ بس ناں دا ہی رہ گیا ہے۔ پہلوں فلماں وچ نویں چہرے لبھدے ہوندے سی اجکل نویاں لتاں ہوندیاں ہین جیہدیاں لتاں جنیاں لمیاں اوہدی چڈی اونی ہی نکی جیدیاں لتاں جنیاں موٹیاں اوہدی میکسی اینی پتلی، بکرے دے پائے تے گاں دے پائے '' سی تھرو'' لبھدے ہین۔ انج لگدا ہے جیویں دو پتلے پلراں تے پورا پلازہ کھلوتا ہے۔ پہلے اشتہار لگدا سی '' نویں چہرے دی لوڑ ہے '' ہن نویاں لتاں دی لوڑ ہے کیوں جو '' لاتوں کے بھوت باتوں سے نہیں مانتے''۔ پھیر انج دیاں لتاں جیہڑیاں ڈھڈ تے نہیں ڈائریکٹ دل تے پیندیاں ہین۔

میک اپ آرٹسٹاں دا کم وی واہوا ودھ گیا ہے۔ پہلوں متھے توں لے کے ٹھوڈی تیکر دا میک اپ کرنا پیندا سی ہن گٹے توں لے کے گوڈے تیکر تے گوڈے توں لے کے موڈھے تیکر کرنا پیندا ہے جیس تے بوہتا ہیروئیناں ناراض ہی رہندیاں ہین کہ میرے گوڈیاں دا میک اپ ٹھیک نہیں کیتا گیا۔ اک گوڈا ماڑا جیہا بھینگا لگ رہیا سی۔گِٹیاں وچ ٹسل سی کیمرے دے ساہمنے بوہتا چر کس نے رہنا ہے۔ فلمی حسیناواں توں وکھ حسینا عالم دی کھیتی وی ہندوستان دیش دی دھرتی تے اگدی ہے پر پھیر وی ایس دھرتی تے غربت دا بھار گھٹ نہیں ہوندا تے ہر پاسے طوائف الملوکی کھلری ہوئی ہے ایس طوائف الملوکی دا حل کرن لئی '' کماؤ پتریاں '' دیاں خدمتاں لئیاں جارہیاں ہین تے کلکتہ ( جیہڑا ہن کول کتہ اکھواندا ہے ) وچ طوائفاں دا میلا ہورہیا ہے۔ میلے وچ ہر پاسے طوائف اپنا ٹھیلہ لاوے گی۔ پورے ایشیا توں تقریباََ دس ہزار اک توں ودھ کے اک کھڑپینچ طوائفاں دی آمد ہے۔ ایس آونی دی آڑ وچ آمدن دیاں انج دیاں نویاں راہواں سگوں شاہراہواں کھولیاں جارہیاں ہین جنہاں تے اُکا ون وے ٹریفک چل سکدی ہے۔

جے ایہہ میلا کامیاب ہو گیا تے سمجھ لوو کہ ہندوستان بھکھا نہیں مردا۔ایہہ '' میلہ طوائفاں '' سرکار دی راکھی وچ ہورہیا ہے۔ تقریباََ چھ ہزار توں ودھ ہندوستان دیاں اپنیاں طوائفاں اپنے اپنے فن دا وکھالا کرن گئیاں۔ ناچ تے گائیکی وچ حصہ لین والیاں نوں سونے دی نتھ تے والیاں دے تحفے دتے جاون گے جدوں کہ مقابلہ جتن والیاں نوں قیمتی انعام دتے جاون گے۔ ہندوستانی سرکار دا خیال ہے کہ ایس میلہ طوائفاں راہیں غربت دی کشتی نوں طوفان وچوں کڈن وچ مدد ملے گی۔ ایس دس دناں دے میلے دیاں رونقاں ویکھن لئی سارے جگ دے تماشبین کول کتہ اپڑ رہے ہین۔ رش اینا ہے کیہ فائیو سٹار ہوٹلاں نے وی باہر تمبو لا لئے ہین۔ سنگل بیڈ تمبو، ڈبل بیڈ تمبو، ہندوستان دی ایس سال '' زن مبادلہ '' وچ بناء مقابلے توں جت ہووے گی۔ ایس میلے وچ کوئی کلا نہیں ہووے گا۔

سجے وی رونق، کھبے وی رونق، اگے وی رونق تے پچھے وی رونق ہووے گی۔ ویکھن والیاں نوں اکھاں نویاں لوانیاں پین گئیاں۔ کیوں جو ایہہ دوہواں اکھاں دے وس دا روگ نہیں کہ سارا میلہ اک واری ویکھ لین۔ دو اکھاں تے پوری عورت ویکھن لئی تھوڑیاں ہین،چہرہ ویکھو تے مہرہ رہ جاندا ہے۔ اکھاں نوں چک چک کے ایدھر توں اودھر رکھنا پیندا ہے۔ اک صاحب دا کہنا ہے کہ سارے جثے تے اکھاں ہی اکھاں ہونیاں چاہی دیاں تاں جو چہرہ چہرے نوں ویکھے موڈھا موڈھے نوں، گوڈا گوڈے نوں تے گِٹا گٹے نوں ویکھے تاں جو اک ہی نظر وچ سر توں لے کے پیراں تیکر اِکو ویلے نظارہ ہو جاوے۔ ویکھن والا وی خش تے وکھاون والا وی خش۔

ہے دیکھنے کی ہر چیز اسے ایک ساتھ دیکھ

بھارتی سرکار دے اک غیر سرکاری بیان وچ ایس طوائفان بدتمیزی دے مچاون دا اک مقصد ہے کہ لوکاں دا جھیڑے توں دھیان ہٹا کے بھنگڑے ول لایا جاوے۔

جے ایہہ تجربہ کامیاب رہیا تے پھیر دوجے شہراں وچ وی انج دے میلے دا پربندھ کیتا جاوے گا تے بلوے نوں جلوے نال نبیڑیا جاوے گا جیس شہر گلی محلے وچ فساد دی فضا ہوئی طوائفاں نال بھرے دو چار ٹرک پا دتے۔ نہ پلس دی لوڑ نہ کرفیو دا چکر ۔

ایہہ سلسلہ چل پیا تے پھیر ہوسکدا ہے ہر گلی ہر نکڑ تے گشتی پلس دی لوڑ نہ رہوے۔ یعنی لفظ پلس ہٹا کے باقی ہی بڑا ہے۔ جے سڑک تے دوہواں بندیاں دی آپو وچ لڑائی ہو گئی تے دوہواں وچ دو طوائفاں آ جاون گئیاں تے جنگ نوں محبت وچ بدل دتا جاوے کرے گا۔ کجھ منچلے تے پیر پیر تے لڑیا کرن گے تاں جو چھڑاون والیاں آسکن۔ پاکستانی جواناں نوں دلی ہرکھ ہووے گا ساڈی حکومت انج دے تجربے کیوں نہیں کردی۔ کیہہ ساڈے ایتھے لڑائی جھگڑیاں دا سلسلہ مک گیا ہے۔ساڈے ایتھے بلوے دا علاج جلوے نال کیوں نہیں کیتاجاندا۔ جلوے دی فرمائش کیتی ہے حلوے دی تے نہیں جیہڑے مولوی رُس جاون گے۔( مولوی تے عالم وچ بہت فرق ہے، ایتھے گل مولوی دی ہو رہی ہے) کسے پنڈ وچ مولوی بمار ہو گیا ڈاکٹر نے پچھیا تسی کجھ کھادا؟ مولوی نے جواب دتا نہیں جی تن دن ہو گئے حلوے دی اک بُرکی وی نہیں کھادی، رُکھی روٹی ہی کھادی ہے ایس لئی مسلسل بھکھا واں۔

پیشہ ور مولوی جدوں کوئی گڑ بڑ کرن تے حکومت نوں چاہی دا کہ ڈنڈے دی سختی دی بجائے حلوے دی نرمی نال کم لین۔ حلوے توں اڈ مولوی نوں ککڑی وی بوہت چنگی لگدی ہے۔ مولوی تے ککڑ تے پسند وچ دو شیواں سانجھیاں ہین اذان تے ککڑی، پر پھیر وی کوئی ککڑ کسے مولوی توں سڑ دا نہیں۔ ایہہ ککڑ دا وڈا پن ہے ایس لئی اوہنوں شتر مرغ دا درجہ ملدا ہے جدوں کہ مولوی بس مولوی ہی رہندا ہے۔