فرض شناسی: چینی پُلسیئے نے 48 رشتے دار 'اندر' کر دتے
وچار ڈیسک
November 11th, 2008
چین دے اک دراڈے شہر وچ اک پولیس افسر نے وکھرے وکھرے جرماں وچ اپنے 48 رشتے داراں نوں اندر کر دتا۔ اہناں رشتے داراں وچ اوہدے بھرا، مسیر تے چچیر اتے اوہدی گھر والی دے کئی کئے انگ ساک رلتی ہین۔
چین دی سرکاری ویب سائٹ موجب ایس افسر نے اپنے 25 رشتے داراں نوں جیل وی گھلیا تاں جو اوہناں کولوں محنت مزدوری کروا کے اوہناں نوں 'سدھا' کیتا جا سکے۔ ایس توں اڈ کئی ہور رشتے داراں نوں ہور طریقیاں نال سدھا کرن لئی وی اندر کیتا۔
30 ورھیاں دے ایس افسر نے اپنی 10 ورھیاں دی نوکری وچ کئی واری اپنے رشتے دار پھڑے۔ اک واری اوہنے شراب پی کے اک ماسٹر نوں کُٹاپا چاڑھن تے اپنے بھرا تے چاچے دے پُتراں نوں آپ پھڑ کے اندر کیتا۔ اک ہور رشتے دار نوں اک زنانی دا پرس چوری کرن تے اندر کیتا۔
اہناں کاروائیاں دے بدلے اوہنوں رشتے داراں ولوں تڑیاں وی لائیاں گئیاں۔ کجھ رشتے داراں اوہدے ماپیاں نوں گاہل مندا کیتا تے کجھ نے اوہدیاں گاواں دیاں پوچھاں وڈھ دتیاں۔ افسر دا آکھنا ہے کہ اوہ جو کجھ کر رہیا ہے لوکی اوہنوں سمجھدے اتے سلاہوندے ہین۔
