امریکی کھوتا صدر دے چون لئی ہاتھی دا مقابلہ کردا ہے

نیپال دے اخبار دی ہمالین ٹائمز موجب جنوب مغربی علاقے باچا پور وچ تھارو قبیلے دیاں زنانیاں نے مینہہ دے دیوتا نوں خوش کرن لئی ننگیاں ہو کے کھیتاںوچ کم کیتا تے پھیر مینہ پین دی خوشی وچ نچ کے مینہ دے دیوتا دا شکریہ ادا کیتا۔ کہندے نیں انج کرنا اوہناں دی اک پرانی ریت ہے جدوں وی خشک سالی نال فصلاں برباد ہوون داخطرہ ہوندا ہے تے مینہ دا دور دور تیکر ناں نشان نہیں ہوندا تے '' تھارو قبیلے '' دیاں زنانیاں ننگیاں ہو کے اپنے تاڑو دیوتا نوں خوش کردیاں ہین تے اوہناں دے عقیدے موجب مینہ دا دیوتا مہربان ہو کے مینہ ورہا دیندا ہے ایہدا مطلب ایہہ ہویا ساڈے گذریل صدر تارڈ توں اوہناں دا '' تاڑو '' دیوتا بوہتا کامیاب ہے۔ ساڈے گذریل صدر رفیق تارڈ نے اپنے وارہے وچ بڑیاں مینہ دیاں نمازاں پڑھوائیاں پر اک تبکا نہیں ورہیا پر نیپال دے تھارو قبیلے دا تارڈ دیوتا اک پل وچ جل تھل کردیندا ہے۔ ہور لکھیا ہے جو ایس قبیلے دے مرد وی زنانیاں دا ساتھ دیندے ہین پر اوہ سارے لیڑے نہیں لاوندے ایہدے توں ثابت ہوندا ہے جو اوہناں دا مینہ دا دیوتا ٹھرکی ضرور ہے پر '' گے '' نہیں۔ قبیلے دیاں وڈھیاں زنانیاں '' مینہ لئی ننگیاں '' ہوون دے پروگرام دی پردھانی آپوں کردیاں ہین تے جوان نونہاں دھیاں نوں ہلاشیری دیندیاں ہین کہ '' جانچ کے دیوتا منا کڑئیے''۔ ساڈے اک بیلی نے ہن توں ہی ارادہ بنھ لیا ہے جو اگلی واری نیپال وچ جدوں مینہ لیٹ ہوون گے اوہ اوتھے ضرور جایا کرن گے تے ننگیاں اکھاں ورہدا مینہ ویکھن گے تے جے اوہناں نوں اوتھے '' برساتی بابا'' یاں پیر مینہ سائیں دا رتبہ مل گیا تے ہوسکدا ہے جو رہندی کھوندی حیاتی اوہ تھارو قبیلے لئی وقف کردیون تے ہمیش ہمیش لئی اوتھے رہ جاون۔ امریکہ تے یورپ وچ خورے ایسے لئی بوہتے مینہ پیندے ہین جو اہناں علاقیاں دیاں زنانیاں وی گھٹ توں گھٹ کپڑے پا کے مینہ دے دیوتا نوں خوش رکھدیاں ہین۔ ساڈے تے مولانا فضل الرحمن ورگے جلالی ملواٹیاں ساہمنے کوئی دیوتا نہیں کھلو سکدا نہ کوئی دیوی نہ مسرت شاہین نہ سری دیوی ایس لئی جنا مینہ دا دیوتا اوہناں توں دور نس دا ہے اینا ہی مینہ ساڈے توں دور نس دا ہے۔

انڈیا وچ وی کجھ قبیلے مینہ لئی رنگ برنگیاں رسماں کردے نیں کجھ چر پہلوں اک خبر سی جو کھوتے تے کھوتی دا ویاہ بڑا گج وج کے کیتا گیا جیہدے وچ انساناں تے کھوتیاں نے بھرویں شرکت کیتی۔ پھیریاں توں لے کے نچن گاون تیکر ساریاں رسماں پوریاں کیتیاں گئیاں تے پھیر اُسے ویلے مینہ پے گیا ہن خورے انساناں دے کارن یاں کھوتیاں دے کیوں جو دوہویں اک دوجے نوں اک ہی نظر نال ویکھ رہے ہوون گے یعنی کھوتیاں دی جنج وچ سارے جانجی کھوتے، بندہ تے کھوتا نہ ہوندا تے مینہ نہ پیندا تے فصل نہ ہوندی سارے کھیت سکھ جاندے کھیت تے پیٹ دے لالو کھیت دی خاطر کیہہ کیہہ کرنا پیندا ہے۔ امریکہ وچ انساناں وچ کھوتا بڑا اہم ہے تے صدر دے چون لئی ہاتھی دا مقابلہ کردا ہے۔ خورے کیوں امریکیاں دی نظر صرف کھوتے تے ہاتھی تے ہی کیوں پئی۔ گھوڑا، ہاتھی، شیر، بلی کتا کیوں پچھاں کردتے گئے۔ کھوتے تے ہاتھی دا کوئی جوڑ ہی نہیں ہے کھوتے تے شیر دا معاملہ ہوندا تے رل مل کے واری واری آوندے رہندے دوہواں دی کہانی بوہت پرانی ہے ایس لئی انڈرسٹینڈنگ دے وی بوہتے امکان ہین۔

ایہہ وی سارا چکر اوہی کھیت تے پیٹ دے لالو کھیت والا ہی ہے دوہویں ہرے بھرے رہن تے ہی چنگا ہے۔ '' پیٹ دے لالو کھیت '' نوں بھرن لئی کھیتاں نوں ہرا رکھنا پیندا ہے چاہے اہناں کھیتاں وچ کپڑے لاہ کے ہی کم کرنا پوے اہناں کھیتاں وچ بیہہ بیجن توں لے کے فصل وڈھن تیکر بڑے کشٹ وڈھنے پیندے ہین۔ فصل نوں کیڑا لگ جاوے تے ساری محنت تے پانی پھر جاندا ہے دوائیاں اسپرے کر کے اوہناں کیڑیاں دا مکا ہوسکدا ہے پر اینی مہنگائی دے دور وچ دوائیاں خریدنا غریب کساناں لئی بوہت اوکھا ہے پر لوڑ ایجاد دی امی جان ہے۔ انڈیا دے علاقے چھتیس گڑھ دے کساناں نے کیڑے مارن لئی اک نواں تجربہ کیتا ہے جیہڑا بوہت کامیاب تے سستا ثابت ہورہیا ہے۔

بی بی سی اردو ڈاٹ کام وچ چھپن والے آلوک پرکاش پتل دے کالم موجب چھتیس گڑھ دے کسان کوک تے پیپسی نوں کیڑے مار دوا دے طور تے ورت رہے ہین جے تسیں ہنے کوک تے پیپسی پیتی ہے تے تہاڈے ڈھڈ وچ کجھ گڑ بڑ ضرور محسوس ہوئی ہووے گی کیوں جو جدوں ساڈی نظر توں ایہہ جملہ لنگھدا سی تے اسیں وی ایس مرحلے توں لنگھے سی پھیر شکریہ ادا کیتا کوک تے پیپسی والیاں دا خورے کدوں توں پوری رازداری دے نال اوہ ساڈے ڈھڈ دے کیڑے مار رہے ہین۔ کوک تے پیپسی والیاں دی ایس چپ کیتی محبت تے سانوں رہ رہ کے پیار آرہیا ہے اسیں کئی وار بے اختیار کوک تے پیپسی دیاں بوتلاں دیاں چمیاں لے چکے آں تہاڈے تے وی فرض ہے جو اہناں دے آدر وچ ادب نال کھلو جاؤ تے کوک تے پیپسی دی ہر بوتل تے ہر ڈبے نوں چم چم کے کدی اکھاں تے کدی دل نال لاؤ سگوں نیانیاں نوں وی ایس نیک کم وچ شریک کرؤ کہ پتر فریج وچوں اک اک کوک تے پیپسی دا ڈبہ کڈھؤ تے چم چم کے ایس مٹھی ٹھنڈی سوادی کیڑے مار دوا بناون تے ساڈا ہولی نال پیاون والیاں دا شکریہ ادا کرو۔ کیڑے وڈھیاں دے مقابلے وچ نیانیاں دے ڈھڈ وچ خورے بوہتے ہوندے ہین ایسے لئی نیانے کوک تے پیپسی بوہتے چاہ نال پیندے ہین ظاہر ہے جدوں ڈھڈ دے کیڑے مرن گے تے نیانیاں نوں سکون وی ملے گا۔ ڈھڈ پیڑ توں وی چھٹکارا ہووے گا تے بھکھ وی لگے گی ثابت ایہہ ہویا کہ کھیت ہووے یاں ڈھڈ دا لالو کھیت کیڑے مارن لئی کوک تے پیپسی ہے سب توں چنگی۔