Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> زبان دی سیاست >> 21 فروری : پنجابی زبان، فن، ثقافت تے میڈیا

21 فروری : پنجابی زبان، فن، ثقافت تے میڈیا

مجیب الرحمن شامی
February 20th, 2015

اج اقوام متحدہ دا دن اے۔ ماں بولی دا دن جیہڑا عالمی سطح تے منایا جا رہیا اے تے بدقسمتی ایہہ وے کہ جیہڑی 21 فروری دی تاریخ اے اوہ لوک ساڈے کولوں ای لے کے گئے نیں۔ 21 فروری نوں فائرنگ ہوئی سی ڈھاکہ وچ، بنگالی زبان نافذ کرن دا جیہڑے مطالبہ کر رہے سن اوہناں لوکاں دے خلاف، تے اوہناں نے آکھیا کہ ماں بولی دا دن منان واسطے سب نالوں چنگا دن ایہو ای اے تے ماں بولی منان دا دن 21 فروری رکھ دِتا۔ بہرحال پنجابی زبان دا مسئلہ، اردو دا مسئلہ، پاکستان بنن دی وجہ توں پیدا نہیں ہویا۔ ایہہ مسئلہ پاکستان بنن توں بہت پہلے پیدا ہویا سی۔ جدوں فارسی سکھ دربار دی زبان سی تے مغل دربار دی زبان وی فارسی سی۔ اوس توں بعد جدوں اردو نے اوہدی جگہ لینی شروع کیتی تے دہلی دے وچ اردو زبان رائج ہو گئی تے جس ویلے فیر انگریزاں نے قبضہ کیتا تے اوس ویلے سوال پیدا ہویا کہ ایتھے میڈیم کیہڑا رکھیا جاوے، ذریعۂ تعلیم کیہڑا رکھیا جاوے تے سرکاری کم کار کیہڑی زبان وچ کیتا جاوے۔ اوس دوران اِک مسئلہ ایہہ وی پیدا ہویا کہ جے پنجابی زبان ذریعۂ تعلیم بنائی جاوے گی تے پشاور وچ کیہ ہووے گا، پوٹھو ہار وچ کیہ ہووے گا تے ملتان وچ کیہ ہووے گا۔ تے ایہدے نال تقسیم پیدا ہووے گی پنجاب وچ۔ پنجاب دے مسلماناں دا مطالبہ سی کہ اسیں اردو چاہنے آں، سِکھاں دا مطالبہ سی کہ ہندی چاہنے آں، سو ایہہ کم پاکستان بنن توں پہلاں دا شروع اے تے اوس ویلے ایہہ فیصلہ کیتا گیا کہ اردو میڈیم ذریعۂ تعلیم ہووے گا۔ زبان دا تعلق اے رزق نال، جس زبان وچ رزق ملے گا لوکیں اوس زبان ول جان گے۔ ہن اردو جیہڑی اے انگریزی دے نال لڑائیاں لڑ رہی اے تے انگریزی اوہنوں پَلّہ نہیں پھڑا رہی۔ پنجابی زبان وچ رسالے تے اخباراں دی حوصلہ افزائی ہونی چاہیدی اے۔ اوہناں واسطے کوٹہ مقرر ہونا چاہیدا اے۔ جس انگریز نے پنجاب وچ اردو لائی سی اوہنے ای سندھ وچ سندھی رائج کیتی سی تے اوسے تاریخ دے کیتے ہوئے فیصلیاں دے مطابق چلدے آ رہے آں۔
پنجابی زبان اردو دی حریف نہیں، نہ ای انگریزی زبان دی۔ ایہہ ساریاں زباناں نال نال چلنیاں نیں، سو پنجابی فلماں، ڈرامے، لٹریچر ول توجہ دینی چاہیدی اے تے ایہناں واسطے وی سرکاری طور تے انعامات مقرر ہونے چاہیدے نیں۔ پنجابی دے لکھاریاں نوں وی انعامات ملنے چاہیدے نیں۔ پنجابی اخباراں دی وی حوصلہ افزائی ہونی چاہیدی اے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels