اقبال قیصر چنگے آہری بندے نیں تے ہر ویلے پنجابی دی گل کرن دا کوئی نہ کوئی ڈھو بنائی رکھدے نیں ـ 19 اپریل نوں کھوج گڑھ وچ بابا فرید کانفرنس کرا کے اوہناں چنگا بھلا میلہ لا لیا پر اخیرلے اکٹھ دے پردھان خواجہ سعد رفیق ہوراں کجھ کوجھیاں گلاں کرکے ججماناں تے پروہنیاں دوہاں دا سر نیواں کرا دتا ـ تے ایہہ وی سانوں چیتے کرا دتا پئی جے کوئی ایہہ سمجھدا پئی جہوریت آ گئی اے تے اوہ غلط اے کیوں جے نہ رہتلی پالیسی دی بدلی ہونی اے تے نہ پاک ہند سانگیاں وچ کوئی بدلی ہونی اے پھیر ساڈے لئی جمہوریت دا کیہ مطلب اے ؟
ایس کانفرنس دا سبھ توں اُچیچا کم اقبال قیصر دا بھارتی پنجاب توں اُگھے لکھاریاں دا پہلی وار پاکستان آون سی جیہناں وچ مہان کہانی کار پریم پرکاش ، جندر ، تلوندر سنگھ ، مشہور رسالے چراغ دے ایڈٹیر ہربھجن سنگھ ہندل، بلدیو دھاریوال، بلدیو سنگھ موگا ، پرو فسیر ستیش کمار ورما تے کوی دیو درد سن۔
تن چار دن واہوا رونق لگی رہی تے ہر کوئی اہناں نوں جاں اپنے گھریں بلاُ کے سیوا کرنا چاہندا سی یاں اہناں نوں ملنا چاہندا سی۔ 18 اپریل نوں سبھ توں پہلاں ورلڈ پنجابی یونین دے پردھان مدثر بٹ ہوراں اہناں پروہنیاں دا اکٹھ رکھیا جس وچ رج گلاں کیتاں گئیاں تے نالے دوپہر دی روٹی وی ورتائی گئی۔
ایس اکٹھ وچ سبھ توں بھرویں گل بات ڈاکٹر بلدیو سنگھ دھاریوال ہوراں کیتی جو پنجابی یونیورسٹی پٹیالہ وچ پروفسیر ہن۔
بلدیو دھاریوال دا بوہتا کم پنجابی کہانی اُتے اے تے اوہناں نے لہندے دے پنجابی کہانی کاراں دی اک لمی گنتری سُنا کے سبھ نوں حیران کر دتا ـ اوہناں کہانی دے رُوپ اُتے وی ودھیا گل بات کیتی تے اپنے علم تے سیانپی گل بات نال ڈاڈھا دل مویاـ ایتھے کہانی کار تلوندر سنگھ ہوراں وی واہوا گل بات کیتی تے دوہاں پنجاباں وچکار سنبندھ ودھان لئی کئی وچار سانجھے کیتے ـ چیتے رہوے پئی ایس جتھے دی اگوائی تے اوس دا پربندھ کرن وچ تلوندر جی دا آہر سبھ توں چوکھا سی ـ تلوندر جی شاہ مُکھی دے چنگے جانوں نیں تے لہندے پنجاب دے لکھاریاں نوں گرمکھی وچ لپی انتر کرن وچ ڈھیر کم کردے رہندے نیں۔ پچھلے کجھ ورہیاں وچ اوہ چار پنج کتاباں پاکستانی پنجابی کہانی کاراں دیاں گُرمکھی وچ لپی انتر کر کے چھاپ چکے نیں ـ اوہناں دا سبھ توں تازہ کم رسالے پنچم دے سودھی تے سُچیت کتاب گھر دے آہری مقصودثاقب دیاں کہانیاں تے ایس کالم دے لکھاری دی کہانیاں دی کتاب دا اُلتھا اے جو چندی گڑھ توں لوک گیت پرکاشن نے چھاپیاں نیں۔ ایس اکٹھ وچ ہور گل بات کرن والیاں وچ جمیل پال، فرزند علی، حسین شاد ، سلطان کھاروی، تے بھارتی پنجابی لکھاری سن۔
ایس دن دوجا اکٹھ پنچم دے دفتر سی جتھے مقصود ثاقب تے ایس کالم دے لکھاری دیاں کہانیاں دیاں کتاباں دی مُکھ وکھالی کیتی گئی تے مڑ کہانی کاراں نال سوال جواب کیتا گیا جس وچ بوہتے سوال پریم پرکاش ہوراں توں کیتے گئے تے اوہناں چنگے جواب دتے۔ ایس اکٹھ وچ جوان تے نویں کہانی کاراں وی رلت کیتی جس وچ خالد دھاریوال تے ملک مہر علی تے سن۔ دوجے پروہنیاں وچ احمد شہباز خاور، پروین ملک، جمیل پال تے نادر علی وی سن۔
پر اصل پروگرام ہفتے نوں کھوج گڑھ وچ سی جتھے اقبال قیصر ہوراں بابا فرید کانفرنس دا اکٹھ رکھیا سی۔ ایس کانفرنس دیاں دو بیٹھکاں ہوئیاں جس وچ پہلے اکٹھ دی پردھانی پیپلزپارٹی دے پچھلے ایم این منظور احمد ہوراں کیتی تے اُچیچے پروہنے صوبائی وزیر اشرف سوہنا سن۔ ایس اکٹھ وچ گل بات کرن والیاں وچ نوید صاحب، بلدیو دھاریوال، خالد مسعود، بلدیو سنگھ موگا سن۔ خالد مسعود ہوراں گل بات وچ آکھیا پئی بابا فرید جی کسے دھرم دے نہیں سن تے اوہناں دا دھرم لوک دھرم سی۔ ایس حوالے نال بلدیو دھاریوال ہوراں چوکھی گل بات کیتی۔
دوجے اکٹھ دی پردھانی وفاقی وزیر خواجہ سعد رفیق ہوراں کیتی تے گل بات وچ سبھ توں پہلاں احمد سیلم، بلدیو سنگھ موگا تے ستیش کمار ورما جی سن تے ایس توں اڈ دیو جی نے نظماں وی سنائیاں۔ پر ایس اکٹھ دے اخیر تے خواجہ سعد رفیق ہوراں احمد سیلم دی پینتی ورھے پرانی نظم اُتے تپ پئے تے اِنج سارے اکٹھ نوں بے سودا کر دتا۔ احمد سلیم دی نظم وچ منڈی بہاؤالدین دی اک وستی گوبند پورے دی کہانی سی جتھے اک مائی اج وی چوری چوری گرنتھ پڑھدی اے۔ خواجہ سعد رفیق ایس گل اُتے تپ گئے تے کجھ اجہیاں گلاں کر گئے جو بھارتی پنجابیاں دے ہوندیاں اوہناں نوں نہیں کرنیاں چاہیدیاں سن۔ اسیں بس ایناں آکھاں گے پئی جمہوریت جے آئی اے تے پھیر سانوں دوجے دی گل سُنن دا حوصلہ وی کرنا چاہیدا اے تے اگلے دی گل نوں سہن تے مڑ اوس دا جواب دین دا جیرا وی ہونا لوڑی دا اے ـ پر لگدا اے خواجہ سعد جی اجے وی پرانی بھارت ویرتا وچ پھسے ہوئے نیں۔
