پاکستان مسلم لیگ (ن) پاکستان دیاں قومی زباناں دی حامی
وچار ڈیسک
July 7th, 2008
وچار ڈیسک (ڈیلس ٹیکساس)
سندھی ایسوسی ایشن آف نارتھ امریکہ (سانا) دے سیمینار وچ بولدیاں پاکستان مسلم لیگ (ن) دے آگو تے گذریل وزیر احسن اقبال ہوراں اک سوال دے جواب وچ کہیا کہ اوہناں دی پارٹی پاکستان دیاں ساریاں زباناں نوں قومی منندی ہے جہناں وچ پنجابی، سندھی، پشتو تے بلوچی شامل ہین۔ اوہناں کولوں سوال پچھیا گیا سی جو کیہہ اوہ لوکاں دیاں قومی زباناں نوں منندے ہیں۔احسن اقبال ہواراں یقین دوایا کہ جے پہلاں اوہناں دے پارٹی پروگرام وچ ایہہ شامل نہیں تے ایس نوں چھیتی شامل کر دتا جاوے گا۔
سیاسی صورت حال بارے گل کردیاں اوہناں کہیا جو اوہناں نے پیپلز پارٹی دا پورا ساتھ دتا ہے تے اوہناں دے وعدیاں تے اعتبار کیتا ہے جیہڑے اجے تیکر پورے نہیں کیتے گئے۔ تے جے گل ایویں ہی چلدی رہی تے اوہناں نوں وکھ ہونا پوے گا کیوں جو نہیں تے اوہناں تے وی الزام لگے گا جو اوہ وی ججاں دی بحالی بارے چپ کر گئے نیں تے وعدہ توڑ بیٹھے نیں۔
اوہناں کہیا جو ایہہ جھوٹ ہے جو سیاست دان مارشل لاء دا سبب بندے ہین۔ اصل حقیقت ایہہ ہے جو جدوں وی فوجی چیف نوں اپنی نوکری دا ڈر ہوندا ہے اوہ مارشل لاء لا دیندا ہے۔
