پنجاب اسمبلی نے اکثریت نال متا پاس کر دتا ہے کہ پنجاب وچ سارے دفتراں وچ تے ہیٹھلیاں عدالتاں وچ وی پنجابی وچ کم کاج لازمی ہووےگا تے ہور اک سکول بھاویں اوہ سرکاری، نجی جاں کسے وی ستھ ولوں چلایا جا رہیا ہے، وچ پہلی توں دسویں تک پنجابی مضمون ضروری پڑھایا جاوے گا۔ ایہہ پہلی وار ہے کہ ساریاں سیاسی پارٹیاں نے اس دی حمایت کیتی ہے۔ جتھوں ایہہ ظاہر ہو گیا کہ پنجابی سارے پنجاب دی بولی ہے نہ کہ کسے اک فرقے جاں مذہب نال جُڑی ہے۔ پر اجے وی رسی سڑ گئی ول نہ گیا دے اکھان موجب بہت سارے سوجھوان آنے بہانے ایہدے خلاف دلیلاں دے رہے ہن۔
ودھیرے کرکے ایہہ ہی لکھیا جا رہیا ہے کہ ویلا گلوبلائزیشن دا ہے تے انگریزی ضروری ہے پر نواں پنجابی لاگو کرن والا متا ایہہ کدوں کہندا ہے کہ انگریزی دی پڑھائی بند ہو جاوے گی۔ انگریزی تاں چلدی رہوے گی، ہندی دی پڑھائی وی کسے منع نہیں کرنی۔ کوئی نواں قانون نہیں بناؤنا سگوں پنجاب سبھ توں پچھڑ گیا ہے تے ماں بولی دی لازمی پڑھائی بارے قانون پہلاں ہی ساریاں صوبیاں وچ لاگو ہے۔
ہماچل پردیش، یو. پی.، ہریانہ، بہار، مدھ پردیش، چھتیس گڑھ مطلب ہندی ریاستاں وچ لاگو ہے تے ہندی ریاستاں توں چھٹ گجرات، مہاراشٹر، چینئی، کرناٹک، بنگال وغیرہ ساریاں ریاستاں وچ پہلاں ہی لاگو ہے تاں پھر ایہہ دلیلاں کہ پردیساں وچ تے قومی طور تے نوکریاں تے وپار وچ کیویں مقابلہ کیتا جاوے گا، تھوتھیاں ثابت ہندیاں ہن کیوں جو اس سال وی بہار وچوں سبھ توں ودھ آئی. اے. ایس. پاس ہوئے ہن۔
ساڈا کہن دا مطلب ہے کہ جیکر باقی ریاستاں وچ پڑھیار آپنی ماں بولی نال انگریزی پڑھ کے ساریاں تھاواں تے کامیاب ہو سکدے ہن تاں پنجابی کیوں نہیں ہون گے؟ اصل وچ دبی زبان نال ایہہ کہنا چاہندے ہن کہ انگریزی نال ہندی ضروری ہووے پنجابی نوں اختیاری مضمون رکھیا جاوے۔
پنجاب وچوں کسے نوں دوجیاں ریاستاں وچ کاروبار کرن جاں نوکری لئی جانا پیندا ہے تاں اوہ پہلاں اوس راج دی بولی سکھدے ہن تاں ہی اوتھے کامیاب ہندے ہن۔ جالندھر توں چینئی وچ کاروبار کردے وپاری تامل جاندے ہن، ایسے طرحاں جدوں کسے قومی بینک دے منیجر دی بدلی چینئی وغیرہ وچ ہو جاندی ہے تاں اوہ اوتھوں دی بولی سکھ کے کامیاب ہندا ہے۔ ایسے طرحاں جو پنجاب وچ ماہر آؤن گے، اوہ پنجابی سکھن گے پر اصل وچ ایہناں ودواناں دا کہنا ہے کہ انگریزی ہندی لازمی ہووے تے پنجابی اختیاری مضمون۔ پر سبھ نوں پتہ ہے کہ کسے بولی دے پڑھن تے پابندی نہیں ہے اُکا پنجابی لاگو کیتی جاوے گی۔
کجھ سجھاء اک سروے موجب جدوں دا ہندی اخباراں دا ہڑھ آیا ہے، اوہ وی سستے بھاء کئی تاں کہندے ہن کہ جنے پیسے ردی ویچ کے اتے ایہناں دے گفٹ لے کے بچدے ہن ایہہ اخباراں مفت پیندیاں ہن۔ ایہناں ہندی اخباراں دی گنتی اج پنجابی دے پرچیاں نالوں کئی گنا ودھ گئی ہے۔ ہندی دے اخبار سستے ہون کارن وکدے سن تے ہن پاٹھکاں نوں نشے دے حالات پیدا ہو گئے ہن۔ ایہہ باہرلے اخبار وپار لئی نہیں آئے سگوں پنجاب دے اخباراں نوں، صرف پنجابی ہی نہیں ہندی اخباراں نوں، گھٹاؤن لئی آئے ہن۔
ساڈے سجھاء ہن کہ سارے پنجابی آپنے بچیاں نال گھر وچ پنجابی وچ گل بات کرن۔ کاروبار وچ وی پنجابی دی ورتوں کرن پر دیکھن وچ آیا ہے کہ ایتھے پردیسی مزدور رکشا چالک تے ہور کاروبار کرن والے کئی دہاکیاں توں ایتھے رہن کارن پنجابی بولدے ہن پر اسیں اوہناں نال ٹٹی بھجی ہندی وچ گل کردے ہاں۔ کاروباری تھاواں تے بورڈ پنجابی وچ ضرور لکھے جان۔
سارے چیک بھاویں اوہ کسے وی بینک دے ہون، نوں پنجابی وچ بھریا جاوے۔ ایہہ ضرور پاس ہون گے۔ کئیاں پنجابی بھراواں نوں ایہہ توکھلا ہے کہ پنجابی وچ چیک بھر ہی نہیں سکدے۔ آپنے بینکاں کولوں پنجابی وچ چیک بک دی منگ کرن جو قانون موجب ہے۔
انٹرنیشنل سکھ کونفیڈریشن اس جتن وچ ہے کہ سارے سکولاں وچ ذاتی طور تے مل کے بچیاں نوں گل بات پنجابی وچ کرن لئی پربندھیاں نوں تھاپڑا دیون۔
جے کدھرے بینکاں وچ جاں ہور کاروبار وچ کوئی اوکڑ آوے تاں سانوں دسیا جاوے۔ مسئلہ حل ہووےگا۔ پنجاب دے بینکاں نوں جدوں دکھن وچ بینک کھولھن لئی لائسنس ملدے ہن تاں ایہہ بینک اوتھوں دا لوکل سٹاف بھرتی کردے ہن تے منیجر تے افسراں نوں جنہاں دی اوتھے بدلی کیتی جاندی ہے، اوہناں نوں اوتھوں دی بولی سکھائی جاندی ہے پر اج پنجاب وچ بہت زیادہ دکھن دے تے ودیشی بینک آئے ہن پر کسے نوں وی نہ تاں لوکل پنجابی سٹاف بھرتی کرن دی لوڑ محسوس ہوئی نہ ہی افسراں نوں پنجابی سکھاؤن دی لوڑ پئی کیوں جو سارے پنجابی بینکاں نال کاروبار ہی ہندی جاں انگریزی وچ کردے ہن۔ جیکر اج وی سارا کاروبار بینک نال پنجابی وچ کیتا جاوے تاں پنجابی صحیح معنیاں وچ ترقی کرے گی۔ ایہہ بینک افسر پنجابی سکھن لئی مجبور ہون گے۔
