پرینکا چوپڑا جیہناں نوں بالی وڈ وچ پگی چوپ دے ناں توں سدیا جاندا ہے اپنے آپ نوں ستویں اسمان تے محسوس کر رہیاں نیں تے کیوں نہ کرن جدوں اوہناں نوں اوہناں دی اداکاری لئی نیشنل ایوارڈ دتا جاوے تے۔۔۔ فلم فیشن وچ اداکاری لئی اوہناں نوں پہلوں ہی فلم فیئر تے کئی ہور ایوارڈ ملے نیں پر نیشنل ایوارڈ ورگا آدر ملنا حقی بڑی گل ہے ۔کیہ ہویا جے پرینکا نے بہتیاں کامیاب فلماں نہیں دتیاں پر اپنے مقابلے دی ہیروئین کرینہ کپور تے قطرینہ کیف نوں تے پچھے چھڈ دتا۔ امریکہ وچ فلم انجانا انجانی دی شوٹنگ کر دی پرینکا نوں جدوں پتہ لگیا پئی اوہناں نے ایہو کہیا اوہ آپنے آپ نوں نویں اسمان تے محسوس کر رہیاں نیں اسیں کہیا اسیں تے اج تیکر ست اسمان ہی سنیا سی پر جدوں بندہ خوش ہووے تے نواں کیہ دسواں گیارہواں کسے وی اسمان تے آپنے آپ نوں محسوس کرے تہانوں کیہ ؟
قطرینہ دا ویاہ
قطریہ کیف ویاہ کر رہیاں نیں۔ ایہہ خبر جنگل دی اگ وانگوں کھلر گئی جدوں کیٹ بے بی نے کہیا پئی اوہ سن دو ہزار باراں وچ ویاہ کر لین گیاں۔ بالی ووڈ تے کیٹ دے چاہن والے بڑے بے چین نیں کیٹ کدوں تے کیہدے نال ویاہ کرن گئیاں۔ ایہہ خبر کیویں پتہ لگی ؟ اصل وچ کجھ دناں توں کیٹ اپنے لئی اک وڈا جہیا فلیٹ لبھ رہیاں سی پر فیر اوہناں نے لبھنا بند کر دتا۔ کیوں بند کر دتا ؟ اوہناں ہسدیاں ہوئیاں کہیا ہن صرف دو سالاں وچ جدوں اوہناں نیں سوہرے چلے جانا ہے تے فیر فلیٹ کیوں لیا جاوے ؟ اُنج کیٹ نے ایہہ نہیں دسیا پئی اوہ سلو نال ہی ویاہ کرے گی یاں فیر کسے ہور نال۔
چور جیا خان
جیا خان چور نکلیاں۔ اٹلی وچ فلم ' ہاؤس فل ' دا پورا یونٹ اکشے کمار، دپیکا پدو کون ، رتیش دیشمکھ، لارا دتہ، جیا خان تے ساجد خان ہوٹل وچ روٹی کھان اپڑے۔ روٹی کھان توں مگروں ویٹر جدوں بل لے کے آیا تے اوہنے میز دے سارے چمچے کانٹے غیب ویکھے۔ اوہنے میز تے موجود سارے جیاں دے پرس چیک کرن دی سدھر ظاہر کیتی۔ ساریاں دے بیگ چیک ہوئے تے سارا سامان جیا دے بیگ چوں نکلیا۔ جیا پریشان اوہناں دیاں اکھاں وچ ہنجو تے فیر سارے کھڑ کے ہس پئے۔ ساریاں رل کے جیا دے نال مخول کیتا سی۔ اوہدے بیگ وچ لکا کے سامان پایا تے ویٹر نوں وی نال رلا لیا۔
سیف دی پسند
تہانوں سانوں ساریاں نوں پتہ ہے پئی سیف دی پسند کرینہ پر کیہ تسی جاندے او پئی سیف نوں کرینہ دا کیہڑا روپ پسند ہے؟ سائز زیرو۔ فلم ' کم بخت عشق ' وچ سائز زیرو بن کے بکنی پاون والی بے بو دی دھم ساری دنیا وچ ہوئی۔ پر اوہناں دے چاہن والیاں تے آپوں اوہناں دی ماں یبیتا دے کہن تے کرینہ نے فیر اپنا وزن ودھا لیا۔ سیف کرینہ دے بھرویں جثے توں ناراض نیں تے اوہ اوہناں نوں فیر سائز زیرو وچ ویکھنا چاہندے نیں۔
عامر دی توبہ
عامر خان نے شراب تے سگریٹ توں توبہ کرلئی ہے۔ اُنج ایہہ توبہ کدوں تیکر قائم رہندی ہے ایہہ پتہ نہیں کیوں جو ایہدے توں پہلوں وی عامر نے سگریٹ توں توبہ کر لئی سی۔ پر فیر جدوں وی اوہناں دی آون والی فلم دا ٹینشن اوہناں دے سر تے ہووے اوہ سگریٹ پینا شروع کردیندے نیں۔ اُنج اسیں اک گارنٹی دے سکنے آں پئی اوہ اپنے وعدے تے گھٹو گھٹ ڈیڈھ سال تیکر پورے رہن گے اوہ ایس لئی پئی ایس سال اوہ کسے وی فلم وچ کم نہیں کرن گے۔ پر عامر نے شراب تے سیگرٹ چھڈن دا کارن کیہ دسیا تہانوں پتہ ہے ؟ اوہناں دا بھار دس کلو ودھ گیا ہے تے ایہہ سمجھن لئی اسیں تہانوں نہیں سلاہواں گے پئی فلم ' تھری ایڈیٹس ' دی کامیابی نے اوہناں نوں ہور بے فکر تے موٹا کر دتا۔ ہن ایس وزن نوں گھٹاون لئی اوہناں دی توبہ جاری ہے۔
