ہن تیکر تسی کیٹ بے بی نوں کدی ساڑھی تے کدی ماڈرن لہندے دے کپڑے پائے ہوئے ویکھیا۔ پر ہن تیار ہو جاؤ اوہناں نوں بکنی وچ ویکھن لئی۔ ہاں جی فلم دوستانہ دے سیکوئیل وچ کیٹ بے بی نے بکنی پائی ہے پر اوہناں نوں پانی چوں نکلدیاں نہیں سگوں گھوڑ سواری کردیاں وکھایا گیا ہے ہے ناں حیرانی والی گل۔ اُنج کیٹ نوں سلو دے وڈے مخالف شاہ رخ دی پارٹی وچ وی ویکھیا گیا اوہ آپنے آپ نوں میڈیا دیاں نظراں توں بچا رہیاں سی۔ بے بی تہاڈے تے سلو وچ واقعی دوریاں ودھ رہیاں نیں ؟
خاناں نوں ایوارڈ
ہندوستان دے چار خان اج وی بالی وڈ تے راج کر رہے نیں۔ اوہناں دے چاہن والیاں دی گنتری انڈیا ہی نہیں غیر ملکاں وچ وی آس توں بہتی ہے۔ایس لئی اوہناں دی فلمی سیوا نوں ویکھدیاں ہوئیاں ایس واری دوہواں خاناںنوں یعنی عامر خان نوں پدم بھوشن تے سیف علی خان نوں پدم شری دتا گیا۔ شاہ رخ نوں ایہہ آدر تے سن دو ہزار پنج وچ ہی دے دتا گیا سی۔ ہن صرف اکو ہی خان بچے نیں تے اوہ نیں سلمان خان تے سانوں لگدا ہے پئی اوہناں نوں تے خورے ہی حیاتی وچ ایہہ ایوارڈ دیون دی حکومت ہمت کر سکے، کیوں ؟ کیوں جو اوہناں دے خلاف کالے ہرناں دا شکار کرن تے روڈ ایکسیڈنٹ دے دو کیس عدالتاں وچ لگے ہوئے نیں۔ سیف ورگے اداکار نوں ایوارڈ یون تے شاہ رخ دے پاکستانی کھڈاریاں دی حمیت وچ دتے گئے بیاناں تے جدوں سخت گیر ہندو انتہا پسند ستھ رولا پاسکدی ہے تے فیر تسی سمجھ سکدے او سلمان نوں ایس لئی چننا حکومت لئی کنا اوکھا ہووے گا؟
شاہ رخ نے تحفہ واپس لے لیا
اک ریالٹی شو وچ فاتح جوان نے جدوں شاہ رخ توں اوہناں دی گھڑی تحفے دے طور تے منگ لئی تے خان نے اوہنوں اُس ویلے تے گھڑی دے دتی پر ہولی جئی آکھ دتا پئی اوہ اوہنوں پروگرام مکن توں مگروں واپس وی کر دیون کیوں جو ایہہ گھڑی اوہناں نے اپنی فلم وچ پائی ہے تے حالی فلم دا کم رہندا ہے۔ دوجی گل ایہہ ہے پئی ایہہ گھڑی اوہناں لئی بڑی لکی ہے۔ جوان ونیت سنگھ کجھ بے دل جئے ہوگئے تے اوہناں نے گھڑی واپس کر دتی۔ دوجے دن جدوں خان نے اوہناں نوں فون کر کے اپنے بنگلے منت تے سدیا تے اونی ہی ودھیا گھڑی تحفے طور دتی تے ونیت نوں یقین نہیں آیا۔ تسی ہن ونیت دی خوشی دا گویڑ لاسکدے او۔
پریتی اپڑی سکول
پریتی زنٹا پیار محبت دے سکول وچ بھاویں ناکام ہو گئی ہووے پر بزنس سکول وچ اوہ کامیاب ہو گئیاں۔ بالی وڈ وچ اجکل گھٹ نظر آون والی پریتی ہارورڈ یونیورسٹی دا بزنس مینجمنٹ کورس کیتا ہے تن ہفتیاں دی کلاس توں مگروں اوہناں نوں لگدا ہے پئی ہن اوہ اک سیانی بزنس وومن بن گئی ہے۔ پریتی ایس سال ہن کجھ فلماں وی سائن کرنا چاہندیاں نیں۔ کوئی گل نہیں پریتی گھٹو گھٹ فلماں تے بزنس دوہواں شعبیاں وچ کم کرن نال آپنے آپ نوں رُجھا تے سکن تے دل ٹٹن دی پیڑ وی گھٹ محسوس ہووے گی۔
خان دے بچپن لئی دو لکھ
فلم مائی نیم از خان وچ شاہ رخ دے بچپن دا کردار ادا کرن والے چائلڈ آرٹسٹ ارجان نوں امریکی لہجہ سکھاون لئی فلمساز کرن جوہر نے دو لکھ روپئے خرچ کر دتے۔ ات واد دے پچھوکڑ تے بنی ایس فلم وچ شاہ رخ نوں امریکی مسلمان وکھایا گیا ۔
بٹلر دا عشق
تہانوں پرینکا چوپڑہ دی اوہ پارٹی چیتے ہے جدوں بالی وڈ کلاکار گیرارڈ بٹلر نے اپنے گوڈیاں تے بیٹھ کے اوہناں نال محبت دا وکھالا کیتا سی ہاں کہ اودوں پرینکا تے شاہد دے عشق دیاں خبراں بالی وڈ وچ گھم رہیاں سی۔ پر ہن سنیا ہے پئی دوہواں وچکار دوریاں ودھ گئیاں نیں۔ نیویارک وچ فلم ' انجانا انجانی ' دی شوٹنگ وچکار گیرارڈ بٹلر اپڑ گئے تے سارا دن اوہناں نے پرینکا نال لنگھایا۔ ہن اسیں اہنوں کیہ سمجھیے بے بی ؟
