ہندوستان دے سب توں وڈے گیت لکھاری گلزار تے گانا چوری دا الزام

بالی ووڈ دی فلم انڈسٹری لئی 2010ء کوئی چنگا ورھا ثابت نہیں ہو رہیا۔ اک پاسے جتھے ودھیا فلماں 'تھری ایڈیٹس' اتے 'ویر' تے جھیڑے کھڑے ہو گئے نیں اوتھے ای ایس واری وشال بھردواج دی فلم 'عشقیہ' وی اپنے گانے 'ابن بطوطہ' پاروں جھیڑے وچ پے گئی ہے۔

ایس فلم دے گیت لکھاری گلزار سر الزام لایا جا رہیا ہے پئی اوہناں نے ابن بطوطہ والا گانا مشہور ہندی شاعر سروشور دیال سکسینہ دی نظم 'ابن بطوطہ پہن کے جوتا نکل پڑے طوفان میں' توں چوری کیتا ہے۔

رپوٹاں موجب سکسینہ دی دھی شوبھا ننے فلم عشقیہ بناؤن والیاں تے اپنے پیو دی نظم چوری کرن دا الزام لایا ہے۔ شوبھا دا آکھنا ہے پئی اوہ کسے لابھ لئی ایہہ الزام نہیں لا رہی پر جے گلزار نے ایس نظم توں متاثر ہو کے وی گانا لکھیا سی تے اوہ گھٹو گھٹ اوہدے پیو دا ناں تے لین۔

دوجے پاسے عشقیہ فلم بناؤن والیاں نے آکھیا ہے پئی اوہناں نوں ایس طرحاں دی کسے نظم دا نہیں پتہ۔