گلیمرس گڈی قطرینہ کیف نے سختی نال ہن کسے وی فلم وچ کسے وی ہیرو دے نال کسنک سین کرن توں ناں کر دتی ہے۔ کیٹ بے بی نے اپنے سارے ہدایت کاراں نوں آکھ دتا پئی کسے وی حال وچ پردے تے چمی دا منظر نہیں دیون گئیاں تے نہ ہی بکنی پاون گئیاں۔
اسیں ایہہ خبر سنی تے بڑی حیرانی ہوئی کیوں جو کیٹ نے فلم دوستانہ دے سیکوئیل وچ بکنی پاون تے رضا مندی دے دتی سی تے فیر ؟ ہاں ہن لگدا ہے پئی کیٹ تے سلو وچکار کوئی دوری نہیں تے دوہویں اج وی اینے ہی نیڑے نیں جنہے پہلے سی۔ تسی ایہو سوچ رہے او ناں پئی اسیں اینے یقین نال کیویں ایہہ کہہ رہے آں ؟ اوہ ایس لئی پئی سلو نوں کیٹ بے بی دا فلماں وچ کسنگ کرنا تے بکنی پاونا منظور نہیں سی تے اخیر کیٹ نے سلو دے جذبیاں دی قدر کردیاں ہوئیاں اہنوں منظور کر لیا۔۔۔
کروڑاں ڈالراں دا سوال
خبر آئی پئی کرینہ کپور نوں اک فلم دے ست کروڑ دی پیشکش ہوئی۔ سانوں اندازہ سی پئی ایس خبر دے مشہور ہوندیاں ہی دوجیاں اداکاراں دیاں پی آر ایجنسیاں وی کم کرنا شروع ہو جاون گئیاں کیوں جو اوہ ایہہ کیویں چاہن گئیاں پئی اوہناں دی ہیروئین دی مارکیٹ ویلیو گھٹ دی نظر آوے تے فیر بالکل ساڈے گویڑ موجب ہویا۔ خبر آئی پئی ایشوریہ رائے نوں اک فلم لئی دس کروڑ روپیاں دی پیشکش ہوئی ہے۔۔۔ ہن تسی ایس خبر دے سچے ہوون دا گویڑ لا سکدے او۔
اسیں نال نال آں
سلمان خان نے ایہہ ثابت کر دتا پئی اوہ نڈر تے دلیر ہوون دے نال ایماندار وی نیں۔ ہن ساڈے تے سلمان دی یاری دا الزام نہ لگے تے دس دیو پئی جدوں شیو سینا نے شاہ رخ دے خلاف اک محاذ کھولیا ہویا سی اودوں کسے وی بالی وڈ سٹار وچ اینی ہمت نہیں سی پئی اوہ کھل کے شاہ رخ دی حمیت وچ بیان دیون۔
دوہواں خاناں وچکارواہوا چر توں ٹری آرہی سرد جنگ وچ وی سلمان نے کھل کے کہیا شاہ رخ نے جو کہیا ٹھیک کہیا اوہدے وچ کجھ غلط نہیں ہے۔ سیاست داناں نوں سیاست تے کھیڈ نوں وکھرا رکھنا چاہی دا۔ اُنج اک ہور میدان وچ اجکل ایہہ دوہویں خان نال نیں تے اوہ ہے ' انروئیر ' ۔ ہاں جی ڈجسی سکاٹ کمپنی نے سلمان خان نوں اپنا برانڈ سفیر بنایا تے ' لکس کوزی ' نے شاہ رخ نوں۔۔۔
دلیپ کمار دا شٹ اپ
شہنشاہ جذبات دلیپ کمار نے عامر خان دی فلم ' تھری ایڈیٹس ' دے کردار چتر نوں شٹ اپ کہہ دتا کیوں ؟
اصل وچ فلمساز ودھو ونود چوپڑہ نوں دلیپ کمار دا فون آیا پئی اوہ فلم تھری ایڈیٹس ویکھنا چاہندے نیں چوپڑہ نوں دلیپ کمار کولوں اپنی تعریف سنن دا وڈا سفنا پورا ہوندا نظر آیا۔
چوپڑہ دلیپ کمار دے بنگلے تے اپڑے تے فلم دی سکریننگ شروع ہوئی۔ نال سائرہ بانو وی سن۔ فلم وچ جدوں چتر نے تقریر شروع کیتی تے دلیپ کمار دا ہسدیاں ہسدیاں بھیڑا حال ہو گیا تے اوہناں چتر نوں شٹ اپ ۔ شت اپ کہنا شروع کر دتا۔ چوپڑہ دے نال چتر نوں اوہناں دی اداکاری دا سرٹیفکیٹ وی مل گیا۔
