ست بین الاقوامی فلمی میلیاں تے ملک دے سب توں وڈے 56 ویں نیشنل ایوارڈ وچ سب توں چنگے چائلد آرٹسٹ دا ایوارڈ لین والے کلاکار شمس پٹیل دی فلم ' تھینکس ماں ' ہن ہندوستان وچ پنج مارچ نوں پیش کیتی جاوے گی۔ ممبئی دیاں کچیاں وستیاں وچ رہن والے غریب نیانیاں دی حیاتی تے ایہدے توں پہلوں برطانوی ہدایت کار ڈینی بوئل دی فلم ' سلم ڈاگ ملینئیر ' نوں ساری دنیا وچ بڑا سلاہیا گیا سی تے کئی ایوارڈ جتے نیں۔
ایسے کچی وستی دے پچھوکڑ وچ بنی ایہہ فلم ہندوستانی ہدایت کار عرفان کمال تے اوہناں دے اپنے پروڈکشن ہاؤس دی فلم ہے۔ کمال دی ایس فلم دا مقابلہ اک ہور معنی وچ بوئل دی فلم نال کیتا جاسکدا ہے ایس فلم وچ وی غریب نگر جھگی دے نیانیاں نے کلاکاری کیتی ہے جدوں کہ بوئل دی فلم وچ ایسے کچی وستی توں اظہرالدین تے روبینہ نے فلم وچ اُچیچا کردار ادا کیتا سی۔
کمال دی ایس فلم وچ وی غریب نگر نال چار نیانیاں ماسٹر فیاض ، مسٹر جعفر ، بے بی الماس تے ماسٹر سلمان نوں لیا گیا ہے۔ فلم دا مڈھلا کردار نبھاون والے ایوارڈ یافتہ ماسٹر شمس پٹیل کمال دے بھانجے نیں۔
پر فلم ' تھینکس ماں ' دی کہانی دا موضوع بڑا وکھرا ہے۔ کہانی اوہناں نیانیاں دی ہے جیہناں دے ماپے اوہناں دے جمن تے کچرے دے ڈبے وچ سٹ کے ٹر جاندے نیں فیر ایہہ یاں تے آوارہ کتیاں دی غذا بن جاندے نیں تے جے بچ جاون تے بے رحم دنیا وچ لوکاں دے میہنے تے جھڑکاں سن کے وڈے ہوندے نیں۔
فلم دا اہم کردار کلاکار شمس پٹیل دا ہے جیہناں نوں اوہناں دی چنگی کلاکاری لئی سب توں چنگے چائلڈ آرٹسٹ دا قومی ایوارڈ دتا جا چکیا ہے۔پٹیل دا فلم وچ ناں ' میونسپلٹی ' ہے ۔ کہانی موجب پٹیل دی عمر چوداں سال ہے اوہنوں اوہدے جمن توں مگروں ماپے میونسپلٹی دے کچرے دے ڈبے وچ سٹ کے ٹر جاندے نیں۔ جیہدے مگروں اوہنوں اک آشرم وچ رکھیا جاندا ہے۔ پٹیل اوتھوں نس کے ایسے میونسپل ہسپتال وچ رہن لگدا ہے ایسے آس نال پئی اوہدے ماپیاں نوں کدی اپنی غلطی دا احساس ہووے۔
کمال موجب اوہناں نے ایہہ فلم سلم ڈاگ ملینیئر دے نال ہی پوری کر لئی سی پر اوہناں کول نہ تے اینا بجٹ سی تے نہ ہی کوئی غیر ملکی مشہور ڈسٹری بیوٹر کمپنی دا ساتھ ایسے لئی اوہناں دی فلم نہ تے مشہور ہوئی تے نہ ہی اوہ ناں مل سکیا پر ایس گل دی خوشی ہے پئی اوہناں نوں گھٹو گھٹ ست بین الاقوامی فلم فیسٹیول وچ ہزاراں فلماں وچ اپنی فلم دی نمائش لئی اجازت ملی تے نال ہی اوہناں دی فلم دے اداکار شمس پٹیل نوں چنگی کلاکاری لئی ایوارڈ۔
ممبئی دیاں کچیاں وستیاں ہمیش توں ہی فلماں بناون والیاں دی توجہ دا مرکز رہیاں نیں۔ ایہناں دوہواں فلماں توں پہلوں کئی فلماں ایہناں وستیاں دے پچھوکڑ وچ بنیاں نیں۔ آرٹ فلماں دے موڈھی شیام بینگل دیاں بہتیاں فلماں ایسے پچھوکڑ وچ لکھیاں گئیاں سن۔ ایہدے مگروں میرا نائر دی فلم ' سلام بامبے ' سدھیرا مشرا دی فلم ' دھاراوی ' ممبئی دی کچی وستی دے دوالے گھمدی ہے۔
