Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کلاواں تے کلاکار >> عنایت حسین بھٹی: فلمساز، اداکار، گائیک، کالم نگار تے دینی سکالر

عنایت حسین بھٹی: فلمساز، اداکار، گائیک، کالم نگار تے دینی سکالر

تنویر ظہور
February 7th, 2015
5 / 5 (7 Votes)

عنایت حسین بھٹی فلمساز، گائیک تے اداکار ہون دے نال نال کالم نگار، سوجھوان تے دینی سکالر وی سن۔ بھٹی ہوراں نال میریاں کئی ملاقاتاں رہیاں۔ میں اکثر اوہناں نوں ملن گلبرگ چلا جاندا۔ اڈ اڈ موضوعاں تے اوہناں نال وچار وٹاندرا ہوندا۔ میں وی بھٹی ہاں۔ ایس ناطے اوہ مینوں اپنا نِکّا بھرا سگوں بیٹے دا درجہ دیندے۔ عنایت حسین بھٹی کھرا، سچا تے بے کھوٹ بندہ سی۔ اوہ چمٹا پھڑ کے فن دے میدان وچ اُتریا۔ اپنی سُر بھری آواز پاروں فن دی اوس ٹیسی تے اپڑ گیا جس تھاں نوں حاصل کرن لئی لوک ترسدے نیں۔ جے کر اوہ رانجھا بنیا تاں جھنگ دے جنگل وچ مجھان چران والا نظر آیا۔ جے کر جوگی بنیا تاں ہیر دے دروازے تے جوگ لین لئی نویکلا روپ دھاریا۔ جے کر چوکیدار بنیا تاں عزت تے انکھ دا پورا پہرہ دِتا۔ جے وارث شاہؒ دا روپ دھاریا تاں وارث شاہؒ دے کردار نوں ایس طرح روشن کیتا جیہڑا فلم وارث شاہؒ دی شکل وچ سدا جیونا ہو گیا۔ عنایت حسین بھٹی نوں وارث شاہؒ نال انت دا عشق سی۔ بھاویں اوس دی فلم ’’وارث شاہ‘‘ باکس آفس تے ناکام رہی پر بھٹی ہوریں ایس فلم تے آخر دم تک مان کردے رہے۔ اوہ ویلے کویلے ادیباں، شاعراں، سوجھواناں تے پتر کاراں نوں دعوت دیندے تے فلم ’’وارث شاہ‘‘ وکھا کے اوہناں دی رائے معلوم کردے۔
عنایت حسین بھٹی ذاکر تے دبنگ مقرر سن۔ اوہ 12 جنوری 1928ء نوں گجرات وچ پیدا ہوئے۔ اوہناں پبلک ہائی سکول گجرات توں میٹرک کیتا، زمیندارہ کالج گجرات توں 1949ء وچ ایف۔ اے کیتا۔ ستاراں سال دی عمر وچ اپنی ماں کولوں قرآن مجید حفظ کیتا۔ ایف۔ اے کرن مگروں لاہور آ گئے تے ایم۔ اے۔ او کالج وچ داخلہ لیا۔ اوہ کالج دے ہوسٹل وچ رہندے سن۔ اک دن اوہناں دی ملاقات ہدایتکار نذیر نال ہوئی۔ نذیر نے بھٹی جی دا گانا سُنیا تاں اپنی فلم وچ گان دی فرمائش کیتی۔ بھٹی ہوراں نوں بچپن توں ای گان دا شوق سی۔ جد اوہناں دا پہلا گانا ریکارڈ ہویا تاں اوہناں دے والد ناراض ہوئے تے تِن سال تک پُتر نال گل بات نہ کیتی۔ بھٹی ہوراں دسیا کہ میرے والد نے ایس شرط تے صلح کیتی پئی میں ویاہ دیاں محفلاں وچ گانا نہیں گاواں گا۔ عنایت حسین بھٹی سماج سیوا وی کیتی۔ اوہناں نے گلاب دیوی ہسپتال لاہور وچ ٹی بی دے مریضاں لئی اپنی ماں دے ناں تے برکت بی بی وارڈ بنوائی۔ میو ہسپتال دے اک وارڈ دا پورا پلانٹ خرید کے دِتا۔ 1965ء دی پاک بھارت جنگ دوران دفاعی فنڈ وچ رقم دتی۔ 1971ء دی جنگ دوران وی لکھاں روپے جمع کرائے۔ سیلاب توں متاثر لوکاں دی مدد لئی خود تے لوکاں کولوں رقم لے کے جمع کرائی۔ اوہ بیوہ عورتاں تے یتیماں دی مدد کردے رہے۔
1991ء وچ پاکستان ٹیلی ویژن نے صوفیاء کرام، اوہناں دیاں درگاہواں تے علم دے حوالے نال پروگرام پیش کیتے۔ ایہناں پروگراماں نوں پیش کرن لئی عنایت حسین بھٹی نوں چُنیا گیا۔ ایس پروگرام دا ناں سی ’’چانن ای چانن‘‘ بعد وچ ایس دا ناں ’’اجالا‘‘ رکھ دِتا گیا۔ کجھ عرصے بعد ’’تجلیوں‘‘ دے ناں نال ایہہ پروگرام چلدا رہیا۔ عنایت حسین بھٹی نے 500 فلماں وچ 2500 دے لگ بھگ گانے ریکارڈ کرائے۔ اوہناں نے 400 توں ودھ فلماں وچ کم کیتا۔ 40 فلماں وچ اوہناں نے ہیر دا کردار ادا کیتا۔ بھٹی پکچرز اوہناں دی ذاتی پروڈکشن سی جس دے ہیٹھ اوہناں 50 فلماں بنائیاں۔ کئی فلماں دی ہدایتکاری وی کیتی۔ ہدایتکار تے اداکار کیفی اوہناں دا نِکّا بھرا سی۔ 1967ء وچ اوہناں نے فلم ’’چن مکھناں‘‘ بنائی جیہنے کامیابی دے سارے ریکارڈ توڑ دِتے۔ ایس توں مگروں سجن پیارا، جند جان، دنیا مطلب دی، عشق دیوانہ، سُچا سودا، ظلم دا بدلہ سمیت کئی کامیاب فلماں بنائیاں۔
1971ء توں 1974ء تک پنجابی ادبی سنگت لاہور دا میں سیکرٹری ساں۔ اپریل 1973ء نوں پنجابی ادبی سنگت دے ہیٹھ مذاکرہ کرایا، موضوع سی ’’پنجابی فلماں تے سماجی جاگرتی‘‘ جیہدی صدارت عنایت حسین بھٹی ہوراں کیتی۔ مذاکرے وچ حزیں قادری، خاور نعیم ہاشمی، تنویر کاظمی، نثار ناسک، سائیں اختر حسین تے دوجیاں نے حصہ لیا۔ بھٹی ہوراں صدارتی گل بات کردیاں آکھیا سی، ’’چنگی فلماں نہ بنن دی ذمہ داری سنسر بورڈ تے وے۔ سنسر بورڈ دا فرض اے کہ اوہ بریاں فلماں سنسر نہ کرن۔ چربہ فلماں سنسر سرٹیفکیٹ حاصل کر لیندیاں نیں۔ پروڈیوسر سکرپٹ لے کے آ جاندا اے تے فلم انڈسٹری دے سر اُتے بیٹھ جاندا اے۔ ایس طرح چنگیاں فلماں لئی کون محنت کرے گا۔ سنسر کوڈ وچ ایہہ گل موجود اے کہ چربہ فلماں نہیں بن سکن گِیاں۔ ایس دے باوجود بن تے چل رہیاں نیں۔ ایہہ ذمہ داری سنسر بورڈ دے ممبران دی اے۔ پروڈیوسر فلم انڈسٹری دی مظلوم ترین شخصیت اے۔ اوہ دولت دا مونہہ کھول دیندا اے۔ فیر اوس نوں اداکاراں دے گھراں دے چکر لانے پیندے نیں۔ ایس توں چنگا اے کہ اوہ کوئی ہور کاروبار کر لوے۔ ایس مصیبت وچ تاں نہیں پوے گا۔‘‘ بھٹی ہوراں دا آکھنا سی کہ ’’میں مقصد بھریاں فلماں بنائیاں۔ ایس توں جیہڑی آمدنی ہوئی نیکی، بھلیائی تے رفاہی کمّاں وچ خرچ کیتی۔ فلم ’’وارث شاہ‘‘ فلاپ ہو گئی۔ ایس توں بعد ہور فلماں بنان دا حوصلہ نہ رہیا۔‘‘
بھٹی پکچرز ہیٹھ فلم ’’ظلم دا بدلہ‘‘ بنی۔ ایس فلم دے لیکھک میرے سجن حفیظ احمد سن۔ ایہہ فلم کامیاب رہی۔ حفیظ احمد دے اعزاز وچ میں اک تقریب دا اہتمام کیتا۔ صدارت عنایت حسین بھٹی نے کیتی۔ گل بات کرن والیاں وچ ہدایت کار اقبال شہزاد، مشتاق بٹ ایڈووکیٹ، اسد مفتی، طفیل اختر، ریاض احمد شاد تے دوجے شامل سن۔ مشتاق بٹ ایڈووکیٹ نے آکھیا فلم ’’ظلم دا بدلہ‘‘ ویکھن مگروں عنایت حسین بھٹی مینوں دُلّا بھٹی دے خاندان وچوں لگا جیہنے اکبر بادشاہ دے سامنے جھکن توں انکار کر دِتا سی۔ عنایت حسین بھٹی دے نال مینوں لاہور توں پاکپتن تے ملکہ ہانس تک سفر کرن دا اتفاق ہویا۔ ایس طرح بھٹی صاحب دے خیال، سوچ تے نظریات نوں زیادہ قریب توں سمجھن تے جانن دا موقع ملیا۔ اوہ مذہبی حوالے نال کھلے دل دے، ملی ایکا تے ساکا داری دے حامی سن۔ اوہ اپنیاں لکھتاں تے تقریراں راہیں قرآن و سنت توں رہنمائی دا درس دیندے تے اسلام دے اصولاں سمیت دین دے وڈ وڈیریاں دی برابر عزت تے احترام دے قائل سن۔ اوہناں دے موسیقی بارے علم دا میں پہلاں ای قدر دان ساں۔ ایس سفر دوران دین دے حوالے نال اوہناں دے وِچار سنن دا موقع پہلی وار ملیا۔ بھٹی ہوراں نوں میں اک لبرل مذہبی دانشور دے روپ وچ پایا۔ میں سمجھنا مذہبی اتفاق تے آپسی احترام تے مبنی اوہناں دے نظریات تے علم اُتے عمل کیتا جاوے تاں نہ صرف پاکستان سگوں پورے عالم اسلام وچ مثالی دینی تے سماجی ماحول پیدا کیتا جا سکدا اے۔
ملکہ ہانس وچ وارث شاہ دے حوالے نال پروگرام سی جیہدے وچ بھٹی صاحب نے ہیر وارث شاہ سنائی۔ بعد وچ مشاعرہ ہویا جیہدے وچ میں وی حصہ لیا۔ ملکہ ہانس جان توں پہلاں اسیں کجھ دیر چوہدری کرم علی کیفی دے گھر پاکپتن رُکے۔ چوہدری کرم علی کیفی پنجابی تے اردو دے معروف شاعر تے لیکھک نیں۔ ایہہ بھٹی ہوراں دے گوڑھے یار نیں۔ کرم علی کیفی نال ایہہ میرا پہلا تعارف سی جیہڑا عنایت حسین بھٹی دے ذریعے ہویا۔ کیفی ہوراں نال فیر اینی گوڑھی دوستی ہو گئی جیہڑی اج تک قائم اے تے انشاء اللہ قائم رہوے گی۔ چوہدری کرم علی کیفی نال مل کے مینوں بڑی خوشی ہوئی۔ اوہ نہ صرف چنگے شاعر نیں سگوں مخلص تے ہمدرد انسان وی نیں۔ چوہدری کرم علی کیفی نے مینوں اک ملاقات وچ دسیا کہ عنایت حسین بھٹی نال اوہناں دی پہلی ملاقات 1975ء نوں شاہ نور سٹوڈیو ملتان روڈ لاہور وچ ہوئی۔ اوس ویلے میں دسویں جماعت دا طالب علم ساں۔ بھٹی ہوراں نے میرا ناں پُچھیا۔ میں آکھیا، ’’کرم علی‘‘ بھٹی ہوراں نے آکھیا کہ اج توں تیرے ناں نال ’’کیفی‘‘ دا وادھا کرنا واں۔ کیفی میرا چھوٹا بھرا اے۔ توں وی مینوں نِکّے بھرا دی طرح عزیز ایں۔ اودوں توں میں’’کرم علی‘‘ توں ’’کرم علی کیفی‘‘ ہو گیا واں۔ چوہدری کرم علی کیفی دا آکھنا اے ایس توں بعد عنایت حسین بھٹی نال ملاقاتاں دا سلسلہ شروع ہو گیا جیہڑا اوہناں دی وفات تک قائم رہیا۔ اوہ اکثر پروگراماں وچ مینوں اپنے نال لے جاندے۔ سگوں کئی غیر ملکی دوریاں وچ وی میں اوہناں دے نال گیا۔ معروف سماجی تے رفاہی شخصیت میاں محمد منشی (گورنمنٹ میاں منشی ہسپتال والے) دا اک وار میں انٹرویو کیتا جیہڑا جنگ اخبار وچ چھپیا۔ میاں محمد منشی نوں میں پُچھیا کہ ہسپتال بنان دا خیال تہانوں کیویں آیا؟ اوہناں ایس دا کریڈٹ اپنے دوست عنایت حسین بھٹی نوں دِتا۔ میاں محمد منشی نے دسیا کہ ابراہیم روڈ بلال گنج لاہور وچ اک ایئرکنڈیشن سوہنی مسجد بنوائی۔ عنایت حسین بھٹی نوں دعوت دِتی کہ اوہ آ کے مسجد ویکھن۔ بھٹی ہوراں نے مسجد ویکھن مگروں مینوں آکھیا، میاں محمد منشی جی! تساں اک بڑا چنگا تے نیکی دا کم کیتا اے۔ رب دا گھر بنا کے رب نوں خوش کیتا جے، ہن رب دے بندیاں نوں وی خوش کرو تے اوہناں دیاں دعاواں لوو۔ میں پُچھیا۔۔۔ بھٹی جی! رب دے بندیاں نوں کیویں خوش کیتا جاوے؟ آکھن لگے، گلاب دیوی ہسپتال وچ میں اک وارڈ بنوائی اے۔ اک وارڈ تسیں وی بنوا دیو۔ میاں محمد منشی نے آکھیا۔۔۔ میں سوچیا، وارڈ کیہ بنوانی اے، پورا ہسپتال ای بنوا دینے آں۔ اِنج میں ہسپتال بنوا دِتا۔
عنایت حسین بھٹی 31 مئی 1999ء نوں اپنے لکھاں قدرداناں نوں اداس کر کے اللہ نوں پیارے ہو گئے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels