ہندوستان وچ پاکستانی ٹیم دے کھڈاریاں نوں جانوں مارن دیاں تڑیاں لائیاں گئیاں ہین۔اک ہندوستانی پرائیویٹ ٹی وی نوں دو تڑیاں والیاں ای میلاں ملیاں ہین جنہاں وچ پاکستانی ٹیم نوں تڑی لائی گئی ہے کہ اوہ دورہ چھڈ کے مڑ کے پاکستان ٹر جاوے نہیں تاں پاکستانی کھڈاریاں نوں جانوں مار دتا جاوے گا۔
ای میل وچ پورے ہندوستان وچ بمب دھماکے کیتے جاون دی وی تڑی لائی گئی ہے۔جیو ٹی وی موجب مڈھلی پن چھان توں پتہ لگیا ہے جو ایہہ ای میل صوبہ مہارا شٹر توں کیتی گئی ہے تے اک پُلس دی ٹیم اوتھے گھل دتی گئی ہے جدوں کہ پاکستانی ٹیم دی راکھی ہور کرڑی کر دتی گئی ہے۔ چیتے رہوے جو پاکستانی ٹیم نوں ہندوستان دے پچھلے دورے وچ وی تڑیاں لگ چکیاں ہین۔
