برطانوی فوج اقلیتی آبادی دے جواناں نوں فوج وچ بھرتی کرن لئی روایتی کھیڈاں ساہمنے لیا رہی ہے تے ایس سلسلے وچ برصغیر دے روایتی کھیڈ کبڈی نوں چنیا گیا ہے۔بی بی سی دے جیتندر سدھو برطانوی فوج دی پہلی کبڈی ٹیم دے ہندوستانی پنجاب دے دورے وچ نال سن۔
زمین تے چٹیاں لیکاں واہ کے بنائے گئے چوکور شکل دے 'کبڈی کورٹ' دے اک حصے وچ پنجاب پُلس دی ٹیم دے چار کھڈاری اک دوجے دیاں بانہواں وچ بانہواں پا کے برطانوی فوج دے نِک برڈک نوں گھیرے ہوئے سن۔ ایس وچکار تسی نِک برڈک نوں بلھاں وچ ''کوڈی کوڈی کوڈی'' آکھدیاں ہوئیاں سن سکدے سی۔نِک برڈک دا کم ایہہ سی کہ اوہناں نے مخالف ٹیم دے چواں وچوں اک کھڈاری نوں ہتھ لا کے لیک پار کر کے مڑ کے اپنی ٹیم دے خانے وچ جانا سی جدوں کہ ایس وچکار مخالف ٹیم دی کوشش ایہہ سی کہ اوہناں نوں لیک پار کرن توں پہلاں ہی پھڑ کے زمین تے سُٹ لیا جاوے۔
چھ فٹ دو انچ قد دے نِک برڈک نے اک مخالف کھڈاری نوں چھو کے اکھ چمکدیاں ہی لیک ول نسنا شروع کر دتا پر اک مخالف کھڈاری اوہناں نوں اپنیاں لتاں وچ قابو کرن وچ کامیاب ہو گیا۔
برطانوی فوج دی کبڈی ٹیم اپنے صرف چواں مہینیاں مگروں انڈیا دے دورے تے نکلی تاں جو اوہ کھیڈ دیاں ماہر ٹیماں دے نال کھیڈ کے اپنی تکنیک نوں چنگا بنا سکے۔
دلی تے ممبئی وچ ہوون والے مقابلیاں وچ کجھ پوائنٹاں توں ہارن توں مگروں برطانوی ٹیم کبڈی دے روایتی گھر یعنی پنجاب وچ اپڑی سی۔ جالندھر دے نیڑے پارسرامپور وچ ہوون والے ایس دو دیہاڑاں دے کبڈی ٹورنامنٹ نوں ویکھ لئی گھٹو گھٹ باراں ہزار لوک آئے سن۔
ایس ویلے تے روایتی موسیقی وجاون والے تے اُچیچا بھنگڑا پاؤن والیاں کئی ٹیماں سٹیج تے آؤندیاں رہیاں جدوں کہ اُچیچے پروہنیاں دی سیوا لئی کھلے میدان وچ لگے تنبواں وچ ہلکے پھلکے کھانیاں تے سنیکس دا پربندھ وی کیتا گیا سی۔ مقامی ویکھن والیاں دی وڈی گنتی کھیڈ دے میدان دے دوالے زمین تے بیہہ کے کھیڈ توں سواد لے رہے سن۔
تاڑیاں وچ جدوں برطانوی ٹیم پنجاب پُلس دی ٹیم دا مقابلہ کرن میدان وچ لتھی تے کھڈاری ہتھ ہلا ہلا کے جی آیاں نوں آکھن والیاں دا جواب دے رہے سی۔ پر توپخانے نال تعلق رکھن والے ٹیم دے مینجر کیپٹن ایل ریڈ دے چہرے تے پریشر سی۔
'سانوں اینے ویکھن والیاں ساہمنے کھیڈن دا کوئی تجربہ نہیں ہے، ایس لئی سانوں کھیڈ توں پہلاں دبا محسوس ہو رہیا ہے پر میں سمجھناں اسیں وی چنگا کھیڈ پیش کرن لئی تیار آں'۔
برطانوی ٹیم دے مقابلے وچ پنجاب پُلس دے کھڈاری پرسکون نظر آرہے سن تے ویکھن والیاں دے وچ حمیت دے سواد لیندے ہوئے ٹیم دے کوچ پرمجیت سنگھ نے بی بی سی نوں دسیا کہ اوہناں نوں ٹیم تے اعتبار ہے۔'برطانوی ٹیم نویں ہے پرساڈی ٹیم تجربے کار ہے۔ایس لئی سانوں پک ہے کہ اسیں جتاں گے۔'
اک ہمہ جہت کھیڈ
فوج وچ کبڈی لیاون والی برطانوی حکومت دا سواد صرف کھیڈ تیکر ہی نہیں ہے۔ فوج دا خیال ہے کہ کبڈی توں برطانوی ایشیائی جوان فوج وچ بھرتی لئی ہور ریجھن گے۔ جتھوں تیکر کھڈاریاں دا سوال ہے تے اوہ ''گیند توں بنا رگبی' نوں پسند کر رہے ہین سگوں اوہناں داخیال ہے کہ ایس نال اوہناں نوں فٹ رہن وچ مدد ملدی ہے۔
اک فوجی دی زندگی نوں ویکھدیاں ہوئیاں کبڈی دے فیدیاں توں متاثر اک کھڈاری سارجنٹ سکاٹ برل دا کہنا سی: 'اسیں ایس سوادی کھیڈ توں بڑا سواد لے رہے آں، اسیں بوہت کجھ سکھیا ہے تے اسیں اپنی کارکردگی توں خوش آں۔'
'ایہہ اِک ایہو جہیا کھیڈ ہے جیس لئی کوئی شے نہیں چاہی دی ہندی سوائے زمین دے اک نکے جہے ٹوٹے دے۔ ایس دا مطلب ایہہ ہے کہ اسیں ایہہ کھیڈ ہر تھاں کھیڈ سکنے آں۔ مثال دے طور تے جے اسیں افغانستان یاں عراق گئے ہوئیے تے اسیںاوتھے وی کبڈی کھیڈ سکنے آں'۔
سیٹی وجن توں مگروں کھیڈ شروع ہویا تے تماش بین برطانیہ دے کھڈاریاں دی کارکردگی توں بڑے خوش ہوئے پر اوہ مخالف ٹیم دی چستی یاں 'فُٹ ورک ' دا مقابلہ نہیں کر سکدے سن۔
ہاف ٹائم دے وچکار برطانوی ٹیم دے کپتان جان کریگ دی پریشانی صاف ظاہر سی۔ اوہ آکھ رہے سن کہ 'اک واری پھیر اسیں سست سی۔''
بھاویں پروہنی ٹیم وچ جذبہ بوہت سی پر اوہ پنجاب پُلس دی ٹیم دی کاری گری دا مقابلہ نہ کر سکی تے پنجھی دے مقابلے وچ اٹھائی پوائنٹ توں مقابلہ ہار گئی ۔
میچ ہارن توں مگروں وی لیفٹیننٹ برڈک دل نہیں ہارے۔ 'سانوں کھیڈ کے سواد آیا۔ تے بوہت کجھ سکھن دا موقع ملیا ہے تے اسیں اپنی کارکردگی توں خوش آں۔ساڈا مقابلہ اوہناں کھڈاریاں نال سی جیہڑے بوہت تجربے کار ہین۔ اوہ چوکھی پریکٹس کر دے ہین جدوں کہ اوہناں توں الٹ ساڈا دھیان فوج دیاں ہور ذمے واریاں وچ ونڈیا ہویا ہے'۔
انڈیا دے پہلے دورے دے مُکن تے برطانوی ٹیم دا خیال سی کہ اوہناں نوں ایس تجربے نال چوکھا فیدا ہووے گا۔ 'اسیں شاندار میزبانی توں سواد چکیا تے ہن اسیں ہندوستانی ٹیم دے جوابی دورے لئی تیار آں'۔
