سڈنی ٹیسٹ وچ پاکستان دی ہار توں مگروں آسٹریلوی کرکٹ دے ماہراں نے محمد یوسف دی کپتانی تے حیرانی دا وکھالا کیتا ہے۔مشہور آسٹریلوی بلے باز تے کمنٹیٹر این چیپل نے کہیا ہے پئی ایہہ گل اوہناں دی سمجھوں باہر ہے پئی محمد یوسف نے میچ دے چوتھے دن کیوں دفاعی حکمت عملی ورتی۔ اوہناں دسیا پئی میچ دے شروع ہوندیاں ہی محمد یوسف ولوں اٹھ کھڈاریاں نوں بانڈری لائن تے کھلیارنا سمجھوں باہر ہے۔
این چیپل موجب پاکستانی کپتان نوں اپنے بولراں تے اعتماد کردیاں ہوئیاں آسٹریلوی کھڈاریاں تے دبا پاونا چاہی دا سی۔ اوہناں کہیا پاکستان جنہے پہلی اننگز وچ دو سو دوڑاں ودھ بنائیاں سی تے اوہدے بالر چنگی بولنگ کر دے پئے سی کپتان نوں اوہناں نوں کیچر دینے چاہی دے سی۔ جدوں تسی مخالف نوں ایہہ دس دیندے او پئی تسی گھابر گئے او تے مخالف ایہدے توں فیدا چکن دی کوشش کردا ہے اُچیچا جدوں تہاڈا مقابلہ آسٹریلیا ورگی ٹیم نال ہووے۔
این چیپل نے کہیا بھیڑی فیلڈنگ نے وی پاکستان دی ہار وچ اپنا کردار نبھایا پر اصلی ذمے وار محمد یوسف نیں۔ جنہاں آسٹریلوی کھڈاریاں نوں آؤٹ کرن دی تھاں دوڑاں روکن تے توجہ دتی۔ مشہور آسٹریلین کرکٹر رچی بینو تے شین وارن نے محمد یوسف دی کپتانی سمجھوں باہر آکھی۔
محمد یوسف نے دفاعی انداز دا دفاع کردیاں ہوئیاں کہیا ہے پئی اوہناں دی کوشش سی پئی مائیکل ہسی نوں دوڑاں بناون توں روکن تے پیٹر سڈل نوں آؤٹ کرن دی کوشش کرن پر آسٹریلوی بلے بازاں نے چنگی بیٹنگ دا وکھالا کیتا۔
این چیپل نے کہیا جے کوئی کپتان سویرے پہلی گیند تے وی جوش نہیں وکھاوندا تے اوہ نہیں جاندے پھیر اوہ کدوں جوش وکھاوے گا۔ اوہناں کہیا مائیکل ہسی نے تیجے دن دے مکن تے ستر دوڑاں ضرور بنائیاں سی پر نویں دن دے شروع ہوون تے بلے باز زیرو دی پوزیشن توں شروع کردا ہے۔
مائیکل ہسی نے دفاعی فیلڈنگ دا فیدا چکدیاں ہوئیاں ہر اوور دی کوئی تقریباََ چار پنج گینداں آپوں کھیڈیاں تے جدوں وی موقع بنیا شاٹ کھیڈ کے دوڑاں بنائیاں تے سگنل لے کے پیٹرسڈل نوں پاکستانی بولراں دے حوالے نہیں کیتا۔
پاکستان دے گذریل کھڈاری عامر سہیل نے محمد یوسف دی کپتانی تے حیرانی دا وکھالا کردیاں ہوئیاں کہیا انج لگدا سی پئی محمد یوسف نوں نہ تے اپنے بالراں تے اعتبار ہے تے نہ ہی اپنے بلے بازاں تے۔ رمیز راجہ نے کہیا پئی محمد یوسف دی کپتانی حیران کرن والی سی تے اوہناں دی دفاعی فیلڈنگ سمجھوں باہر سی۔ رمیز راجہ نے کہیا محمد یوسف نوں کپتانی دے گر سکھن وچ حالی ویلا لگے گاتے ٹیم یونس خان دی بیٹنگ تے چنگی کپتانی دی لوڑ پے رہی ہے۔
