انڈین پریمیئر لیگ دیاں ٹیماں دے مالکاں نے ایس الزام نوں ردیا ہے پئی تعصب دے تت وچ پاکستانی کھڈاریاں دی بولی نہیں لائی۔ آئی پی ایل وچ کسے وی پاکستانی کھڈاری دی بولی نہ لائے جاون توں مگروں پیدا ہوون والے پاڑ تے اک پریس کانفرنس وچ اوہناں میڈیا تے ایس واپری نوں ودھا چڑھا کے پیش کرن دا الزام لایا۔
راجستھان رائلز ٹیم دی شلپا شیٹی نے میڈیا تے لوکائی نوں درخواست کیتی پئی ذمے وار ورتارا ورتن۔ میں میڈیا تے ہندوستانی تے پاکستانی لوکائی نوں درخواست کرنی آں پئی ذمے وار ورتارا ورتو۔ اسیں کرکٹ دے شیدائی ملک دے شہری آں تے پاکستان وی۔ ساڈے لئی کھیڈ ہی سارا کجھ ہے ۔' کجھ سیاسی جماعتاں تے انتہا پسند بندیاں دا حوالہ دیندیاں ہوئیاں اوہناں کہیا ' کیہ اسیں پاکستانی کھڈاریاں دی سیکورٹی دے سکدے سی ؟ ''
اوہناں ہور کہیا ' اسیں کھڈاریاں دی سیکورٹی دی ذمے واری لینا نہیں چاہندے سی۔ نقصان ساڈا ہویا ہے کیوں جو سانوں بہت چنگے کھڈاریاں توں ہتھ دھونا پئے''۔
آئی پی ایل کمشنر للیت مودی نے کہیا '' سانوں ٹیماں دے مالکاں دے اختیاراں دا خیال رکھنا چاہی دا۔ تسی میڈیا والے ایس واپری نوں ایشو بنا رہے او۔۔۔۔۔ تے پہلوں ہی توں نازک رابطیاں نوں ہور خراب کر رہے آں۔ میرے کجھ چنگے سنگی پاکستانی وی نیں۔''
