پاکستان دے فاسٹ بالر شعیب اختر نے آکھیا ہے کہ فلماں نال بھورا موہ وکھاؤن دا ایہہ مطلب نہیں کہ میں کرکٹ چھڈ دیواں گا۔ اوہناں کجھ لوکاں دے ایس گویڑ نوں رد کر دتا کہ ہندوستانی فلماں وچ کم کرن دی تانگھ نال شعیب اختر کرکٹ چھڈ رہے ہین۔ شعیب اختر دا آکھنا ہے کہ جدوں تیکر اوہ چنگا کھیڈ رہے ہین اوہ کرکٹ نہیں چھڈن گے۔
ہندوستان توں پرتن مگروں شعیب نے اپنے پہلے انٹرویو وچ آکھیا کہ پاکستانی ٹیم دا ہندوستان دا دورہ مکن مگروں دو تن ہفتے اوہ ہندوستان وچ ایس لئی رہے سن کیوں جے اوہناں نے 'انڈیا چیرٹی' ناں دے اک خیراتی ادارے لئی فنڈ اکٹھے کرنے سن۔
شعیب نے پہلے ٹیسٹ میچ وچ چھ وکٹاں لئیاں سن۔ فیر وائرل انفیکشن ہو جاون مگروں وی اوہناں نے دوجا ٹیسٹ کھیڈیا تے دو وکٹاں لئیاں۔ ایس وچکار میدان توں باہر اوہناں دے کماں تے انگلاں وی چکیاں گئیاں۔ اخیرلے ٹیسٹ وچ شعیب دی کنڈ تے سٹ لگ گئی تے اوہناں نے اُکا اک وکٹ لئی۔ پر اوہناں دا آکھنا ہے کہ اوہناں نے اپنا پورا واہ لایا سی۔ اوہناں دا آکھنا ہے کہ اوہناں نے اک دیہاڑ دے میچاں وچ پوری جان نال کھیڈیا پر بھیڑی بیٹنگ پاروں ٹیم ہار گئی تے پہلا ٹیسٹ میچ وی مندی بیٹنگ پاروں ہارے۔
شعیب اختر دا آکھنا ہے کہ ''میں سدا ای اپنے دیس لئی کھیڈ دا ہاں پر فیر وی لوک میری نیت تے شک کردے ہین۔ مین منندا ہاں کہ دوجے کھڈاریاں نالوں مینوں سٹاں بوہتیاں وجدیاں نیں پر ایہدی وجہ ایہہ ہے کہ میں گیند سُٹن لئی پوری جان لا دیناں''
پاکستان دے کوچ جیف لاسن نے شعیب ول دی گل کردیاں آکھیا کہ جدوں تیکر اوہ فٹ سن اوہناں بوہت محنت کیتی۔ جے اوہ فٹ رہے تے اسیں چاہواں گے کہ اوہناں نوں آسٹریلیا دے خلاف سیریز لئی ٹیم وچ رلایا جاوے۔
پاکستان آؤن والے ہفتے وچ زمبابوے دے خلاف پنج اک دیہاڑ دے میچاں دی سیریز کھیڈے گا۔ آسٹریلیا دے خلاف تن ٹیسٹ تے پنج اک دیہاڑے میچاں دی سیریز مارچ اپریل وچ ہووے گی۔
