ہندوستان:جناح دے پڑدھوتے نے چندی گڑھ دی ٹیم خرید لئی

بی سی سی آئی دی انڈین پریمیئر لیگ وچ رلتی ٹیماں دی نیلامی وچ صنعت کار مکیش امبانی،وجے مالیا تے بالی وڈ سٹارز شاہ رخ خان تے پریتی زنٹا تے نیس واڈیا نے ٹیماں لیاں ہین۔چیتے رہووے جو نیس واڈیا محمد علی جناح دی دھی دے پوتے ہین تے اوہناں دی منگنی پریٹی زنٹا نال ہوئی ہوئی ہے۔

انڈین پریمیئر لیگ دیاں ٹیماں دی نیلامی ممبئی وچ ہوئی جیس وچ گیاراں وڈیاں ملکی تے غیر ملکی کمپنیاں نے بولی لائی۔ ایہہ بولی ملک دے اٹھ شہراں دیاں ٹیماں لئی لائی گئی جیس وچ سب توں بوہتی بولی ممبئی تے دہلی لئی لگی۔

صنعتکار مکیش امبانی نے ممبئی دی ٹیم لئی 111.90 ملین امریکی ڈالر۔ شاہ رخ ، جوہی چاؤلہ تے جے مہتہ دے گروپ نے کولکتہ ٹیم لئی 75.09 ملین ڈالر، پریتی زنٹا تے نیس واڈیا دے کنشور شیم نے چندی گڑھ تے موہالی ٹیم لئی 76 ملین ڈالر ، وجے مالیا نے بنگلور لئی 111.60 ملین ڈالر دی بولی دتی۔

ایس توں وکھ چینئی لئی انڈیا سمینٹ نے اکانوے ملین ڈالر، دہلی لئی جی ایم آر ہولڈنگ نے چوراسی ملین ڈالر،حیدر آباد لئی دکن کرونیکل نے 107.01 ملین ڈالر جدوں کہ انویسٹرز ان کرکٹ گروپ نے جے پور ٹیم لئی 67 ملین ڈالر دی کامیاب بولی دتی۔

بولی لاون والیاں کمپنیاں نوں اپنی ٹیم بناون دے اختیار دتے جاون گے۔ ہر ٹیم وچ غیر ملکی کھڈاری لئے جاون گے پر اک ٹیم وچ اٹھ توں بوہتے غیر ملکی کھڈاریاں نوں نہیں کھڈایا جا سکدا۔ ایس توں وکھ ٹکٹ ویچن تے اشتہاراں توں ہوون والی آمدن تے اہناں کمپنیاں دے اختیار ہوون گے۔

دوجے پاسے شاہ رخ خان نے اک بیان وچ آکھیا ہے کہ کرکٹ نوں ودھاون لئی اوہناں نے اپنے سنگیاں نال رل کے ٹیم خریدن دا منصوبہ بنایا سی تے پریتی زنٹا دا آکھنا ہے کہ اوہناں نوں یوراج سنگھ بوہت پسند ہین تے اوہناں نوں خشی ہے کہ اوہناں نوں چندی گڑھ دی ٹیم ملی ہے۔

بی سی آئی دے نائب صدر للت مودی نے پریس کانفرنس وچ ایس نیلامی دیاں تفصیلاں دیندیاں ہوئیاں دسیا کہ ٹیماں توں مگروں ہن ست فروری نوں کھڈاریاں لئی بولی لائی جاوے گی۔مودی موجب آئی پی ایل دی ٹورنامنٹ اٹھاراں اپریل توں شروع ہوون گے۔ لیگ دے 59 میچ ہوون گے تے ایہہ انٹرنیشنل کرکٹ کونسل دے ضابطیاں موجب کھیڈیا جاوے گا۔

مودی نے دسیا کہ بی سی سی آئی نے میڈیا دے حق پہلاں ہی سونی ڈبلیو ایس جی نوں ویچ دتے سن۔اک سوال دے جواب وچ مودی نے آکھیا شاہ رخ نوں کدی وی بی سی سی آئی نے کرکٹ گراؤنڈ وچ کھیڈ ویکھن توں نہیں روکیا۔ اوہناں نے آکھیا خورے شاہ رخ نوں کرکٹ پسند سی ایس لئی اوہناںنے بولی لائی ہے۔

بی بی سی دے شکرئیے نال