انڈین پریمئر لیگ دا ٹونٹی ٹونٹی ٹورنامنٹ بھلے ہی کامیابی دیاں بلندیاں نوں چھو رہیا ہووے پر ویکھن والیاں نوں رجھاون لئی جیہڑے طریقے ورتے جا رہے ہین اوہ کرکٹ دی روایتی سبھاء نال میل نہیں کھاندے۔کھیڈ دے وچکار کِتے بالی وڈ دے وڈے ستارے نچ دے نظر آوندے ہین تے کِتے سٹنٹ کردیاں ہوئیاں۔ نکے توں نکے تے گھٹ کپڑیاں وچ امریکی مٹیاراں نچ نچ کے جشن دا ماحول بناون دی کوشش کردیاں ہین۔
ایہہ گل ہور ہے کہ اوہناں نوں شائد کرکٹ دی اُکاسمجھ نہ آوندی ہووے تے ویکھن والے وی ٹوینٹی ٹوینٹی دی مار دھاڑ وچکار ایس چمک دھمک دا بھرواں سواد لیندے ہوون کدی کدی تے کرکٹ توں وی ودھ۔ بنگلور وچ سٹینڈ وچ موجود ویکھن والے میچ وچ گھٹ تے چئر لیڈرز وچ بوہتا سواد وکھا رہے سن۔ بالی وڈ دے گیت گا کے اوہ چئر لیڈرز نوں اپنے نال نچن دی دعوت دیندے سنے۔ممبئی وچ چاہن والیاں دا اسرار سی: ' میڈم میڈم، شیک ہینڈ، شیک ہینڈ۔' دو ٹیماں بالی وڈ سٹارز نے خریدیاں ہین۔ کلکتہ نائٹ رائڈرز تے کنگز الیون پنجاب۔ تے اہناں ٹیماں دے مالک شاہ رخ خان تے پریتی زنٹا ہر تھاں نظر آوندے ہین۔
ہندوستان وچ کرکٹ اک جنون ہے تے جدوں بالی وڈ دے وڈے ستارے زمین تے اتر آون تے نشہ دوہرا ہو جاندا ہے۔کلکتہ وچ اک میچ وچکار اک ادھکڑ عمر دا بندہ اُتلے سٹینڈاں توں چھال مار گیا۔ کرکٹ دے نشے وچ نہیں سگوں شاہ رخ نوں نیڑیوں ویکھن لئی۔ جان تے بچ گئی پر ہڈیاں نہیں۔
اپنیاں ٹیماں نوں پروموٹ کرن لئی شاہ رخ تے دوجیاں ٹیماں دے مالک جیس کسے نوں دھرو سکدے ہین، دھرو لیاوندے ہین۔ تے کسے میچ وچ راہل تے پرینکا گاندھی نظر آون گے تے کسے وچ اپنے حیرانی والے تے خطرناک کرتب وکھاوندے ہوئے اکشے کمار۔ تے نکے موٹے ستاریاں، موسیقاراں تے فیشن ڈیزائنراں دی تے کوئی گنتی نہیں ۔سرکس دا ماحول نظر آوندا ہے۔ پر ہن سوال ایہہ وی اٹھنا شروع ہو گیا ہے۔ تماش بین اپنے شہراں دیاں ٹیماں نوں انج ہی حمیت کرن گے جیویں یورپ وچ فٹبال ٹیماں نوں ہوندی ہے، کیوں کہ جے انج نہیں ہوندا تے صرف ناچ گانے دے آسرے میداناں نوں بھرنا سوکھا نہیں ہووے گا۔ کرکٹ نوں بوہتا سوادی بناون دی دلیل تے سمجھ وچ آوندی ہے پر ایس لئی جیہڑا طریقہ ورتیا گیا ہے ایس نال سارے ایکا نہیں کردے۔
تنقید کرن والیاں وچ روایتی کرکٹ پسند کرن والیاں دے نال فلم سٹار شترو گھن سنہا وی رلتی ہین۔ اوہناں دے نشانے تے شاہ رخ ہین تے چئر لیڈر کڑیاں، جیہڑیاں اوہناں دے خیال وچ بے حیائی کھلا رہیاں ہین۔
جیہڑے لوک روایتی طریقے دی کرکٹ پسند کردے ہین اوہناں دا خیال ہے کہ ایس ناچ گانے توں کرکٹ تے بالی وڈ دی کھچڑی پک رہی ہے۔ پر بنگلور دی ٹیم دے مالک وجے ملیا آکھدے ہین کہ ایس تفریح نال کھیڈ نوں فیدا ہووے گا۔
'اولمپکس دے مڈھلے اکٹھ ویکھیے یاں امریکی بیس بال دے میچ اوہناں وچ گلیمر تے تفریح دوہیں ہوندے ہین ہندوستان وچ وی اسیں کرکٹ وچ گلیمر ودھا رہے ہاں۔'' پربندھیاں دا دعوی ہے کہ کرکٹ تے تفریح دا ایہہ اکٹھ کھیڈ نوں ہمیش لئی بدل دیوے گا۔ ویکھنا صرف ایہہ ہے کہ کس پاسے وچ۔
